الموضوع: هبيع الاوكتافيا واجيب نيسان زيرو - تنصحوني بأية ؟

المشاركة الأصلية كتبت بواسطة د.محمدعبدالعال

الشباب كلهم قاعدين يقولوا البيجو وأشك انهم ساقوها وعرفوا ثابتة ولا خفيفة وفيها مشاكل ولا لأ .. الراجل بيقول ميزانيته من 90 ل 95 ألف .. هيجيب البيجو الهاي لاين ب 136 ألف ؟؟؟

يا ريس عليك وعلى الصني الشكل القديم قطع غيارها سهلة ورخيصة إلى حد ما وسهلة في بيعها وثباتها كويس وصاجها احسن من الشكل القديم .. عيوبها ضيقة من ورا واظن ان استهلاكها للبنزين مش هيكون اكتر من الاوكتافيا ..

الصني الشكل الجديد حلوة برضه بس عيوبها ان مشوار دواسة الفرامل كبير شوية وده عيب تصنيع وغير مؤثر في قوة الفرامل أو نظام ال abs وفيه كلام ان المصنع هيصلح كل العربيات اللي طلعت منه .. وعيبها التاني صاجها ضعيف .. يعني متقارنش بينه وبين ال a5 اللي وزنها فوق ال 2 طن والكبوت بتاعها تقيل جدا محتاج اتنين يشيلوه .. لكن العربية في المجمل حلوة وناعمه على الطيق لو غيرتلها الكاوتش .. من الداخل مش فخمة قوي لكن السوبر صالون من جوة حلوة جدا خصوصا الاكر النيكل وتطعيمات الكروم ف بتدي احساس بالفخامة شوية .. لكن دلوقتي سعرها وصل ل 126 ألف بالاوفر برايس ولو هتحجز في التوكيل هتستنى 3 شهور

نصحيتي ليك اتكل على الله في الصني الشكل القديم .. هتبقى انسب لك من غيرها ولو تقدر تزود الميزانية شوية هاتها اوفر برايس لأنك مش ضامن السوق .. أنا شاري عربيتي النيو صني سوبر صالون من 3 شهور ونص بأوفر برايس كانت عاملة 120 ألف عند سمير ريان .. ولو كنت حجزت في التوكيل كنت هستلمها دلوقتي برضه ب 120 ألف .. ف اللي في ايدك تضمنه احسن من الانتظار

الله ينور يا باشا الف شكر
بس معلش عند استفسار
هو النيسان صني الشكل القديم لسة فيه منو جديد ولا لازم اجيب مستعمل، عشان انا مش فاهم اوي النقطة دي
بالنسبة للاوكتافيا والله عربية روعة، ثبات وسرعة وصاج وصدمات وتتحمل معاك وتسافر، بس قطع غيارها فلست اهلي، وبصراحة مش قادر على مصاريفها، فبقول خلينا في الحنين افضل

ومعلش لو تقلت عليك
هى الصني الشكل القديم تعملها كام مانيوال وكام اوتوماتيك، طبعا جديد مش مستعمل ، انا نفسي في الزيرو زهقت من الاستعمال

فيه منها جديد والمصنع لسة بينتج الشكل القديم وهاتلاقيها عند السبع وأوتو إيجيبت ... سعرها في نفس ميزانيتك مش معدية الـ 100 ألف بس اللي جابوا منها 2013 لقوا ان السماعات الخلفية مش موجودة ...ده عيبها الوحيد حالياً :)


بصراحة صفقة رابحة بإذن الله وموفق من عند ربنا في البيع والشراء , وأياً كان قرارك ربنا يباركلك فيه وفيما رزقك ويكفيك شرها ويرزقك خيرها

تحياتي

هو ايه حكاية صني الشكل الجديد دي ؟؟؟!!!!!! مالها يعني توكتوك متنكر مثلا ؟؟!! العربيه معايا وزي الفل شكلا وموضوعا . وبعدين مين يجيب عربيه شكل قديم والجديد موجود ؟؟!! اذواق فعلا .. كل واحد يدخل يقول قديمه وهو من ملاك القديم او مقتني عربيه تانيه !!! بالراحه علينا شويه . الشكل الجديد لايقارن بالقديم - رأي شخصي - الجديد احسن مليون مره . الباور الكهربا والمساحه الداخليه والارتفاع عن الارض وهدوء المحرك والاقتصاديه في استهلاك البنزين والشكل الاحدث طبعا التاني اتهرى كام سنه وكان اصلا قريب من اللي قبله لما نزل . abs . ebd . ايمبولايزر . اضاءه افضل . ...

ياباشا فكر كويس صعب بعد متركب الالماني تنزل للصني مش عشان هيه ياباني عشان اردئ فئة في اليباني
الموديل القديم 2010 صوت المكنة عالي وهيقرفك حبتني
حاول تركبها ابل متشتريها

المشاركة الأصلية كتبت بواسطة grumby78

اولا السلام عليكم
بص ياسيدي انا عارف شعورك عشان انا كان معايا مستعمل -ابيزا - وفيكتر - وتعبوني بصراحه . المستعمل مقرف خصوصا لو كانت قطع الغيار غاليه . ده غير الوقفه عند الورش وفتي الصنايعيه . صدقني الصني اختيار ممتاز كسعر وامكانيات . انا مش عارف ايه موضوع الالماني ده مع الناس انا كانت معايا العربيتين وكانت قطع غيارهم الماني وكانوا مقرفين في كل حاجه . وكان واحد صاحبي معاه صني 2010 وعمره مشتكى منها مع ان استعماله زفت . وللسبب ده انا غيرت للصني . ملحوظه : انا عمري ماشفت عربيه الماني تكييفها بقوة الياباني . حتى المرسيدس مع خالي c180 وتكييفها على قده . والباور الكهربا في الصني مريح جدا واحسن من عربيات كتير . باختصار الصني صفقه رابحه وفيها مميزات كتير واكيد كعربيه زيرو احسن من الاوكتافيا المستعمله - رأي شخصي جدا - ده كفاية ثقتك في العربيه وانت ماشي بيها في الزيرو

والله يا باشا انت جبت فعلا من الاخر
انا المستعمل قرفني بجد
وخصوصا انك هتعد تصلح وفي الاخر برضو هتخسر في البيع
العربية حلوة مفيش كلام كالماني، لكن الزيرو وريحة الفبريقة جوا العربية ليها طعم تاني
وشكرا على النصيحة يا وحش

المشاركة الأصلية كتبت بواسطة toty_305

-الجديد حلو مفيش كلام بس لازم تبقى متخيل الفرق عشان مش تتصدم النيسان بعد ال octavia هتبقى ألش

- و كمان الجديد بيجيب ضفيره و فيه عيوب بردو

متقلقش يا ريس انا مش مولود في اوكتافيا هههههههه
انا سوقت ماروتي ولادا و27 وعادي كلو شغال
الالماني طبعا مفيش زيو بس كلو كويس والله
والزيرو لو نوع معتدل متزعلش مني افشخ من اي عربية مستعمله ولو كانت مرسيدس

معلش يا جماعه عشان الموضوع استفزني جدا الناس اللي بتقول هتحس بفرق بين اوكتافيا وصني الجديده هيزعلك معلش هو بيتكلم علي اوكتافيا موديل 2012 ولا 2013 ولا حاجه انتو بتتكلمو فيه ايه يا جماعه عربيه زيرو وعربيه من 2005 ازاي هيتصدم من الصني يعني يعني ياريت اللي يتكلم يوضح الصدمه هتكون من ايه يعني كل حاجه واضحه في العربيتين والاعضاء وضحوها مليون مره سواء كانت الصني القديمه او الجديده والجديده اللي كل عمال ينتقد فيها دي مفيهاش غير عيب الصاج وعيب الضفيره اللي بيتعمل في الضمان لو حصل يبقي ليه الكلام الكتير وفيه ناس بتقول مش متقبله شكلها ودي حريه شخصيه لو معجب بشكلها اشتريها غير كده برضه الصني القديمه عيوبها من ضيق الصالون و الضفيره والموتور اللي بيقولو صوته عالي ودي عيوب لو متقبلها اشتريها وجرب العربيتين قبل الشراء وسوقهم عشان تبقي مطمن غير كده من ناحية قطع الغيار والتوكيل مفيش كلام علي نيسان في الموضوع ده اما بقي موضوع السي اليزيه والبيجو 301 نفسي أسال اي حد بيقول عليهم انت جربتهم ولا ركبتهم ولا حتي عارف ايه نظام توكيلهم ولا اي حاجه عنهم غير انك شفت صورهم ولا هو الشكل وخلاص واسم الماركه جاي علي كيفك واقرب مثال للناس اللي بتتكلم وخلاص العربيه سكودا رابيد اللي الناس طلعتها السما وفي الاخر التقارير وبعد ما الناس بدأت تركب والعربيه تنزل السوق كله قال عليها سكودا فابيا من جديد يا جماعه ياريت بجد اللي يتكلم علي عربيه يكون ركبها عشان حالة الفتي اللي ماشيه في المنتدي اليومين دول ميتسكتش عليها ابدا