الموضوع: هبيع الاوكتافيا واجيب نيسان زيرو - تنصحوني بأية ؟

المشاركة الأصلية كتبت بواسطة احمد رشدي

الله ينور يا باشا الف شكر
بس معلش عند استفسار
هو النيسان صني الشكل القديم لسة فيه منو جديد ولا لازم اجيب مستعمل، عشان انا مش فاهم اوي النقطة دي
بالنسبة للاوكتافيا والله عربية روعة، ثبات وسرعة وصاج وصدمات وتتحمل معاك وتسافر، بس قطع غيارها فلست اهلي، وبصراحة مش قادر على مصاريفها، فبقول خلينا في الحنين افضل

ومعلش لو تقلت عليك
هى الصني الشكل القديم تعملها كام مانيوال وكام اوتوماتيك، طبعا جديد مش مستعمل ، انا نفسي في الزيرو زهقت من الاستعمال

والله يا باشا اللي اعرفه ان صني الشكل القديم بينزل منها زيرو دلوقتي ال Ex saloon بس للأسف مفيهاش ABS .. وسعرها اوتوماتيك 96 ألف لو هتحجز ومش هتدفع اوفر برايس .. مانيوال مش عارف بالظبط بس اظنها بتقل من 8 لـ 10 آلاف جنيه .. بس هات الاوتوماتيك اريح يا ريس في الزحمة اللي في مصر دلوقتي دي .. وحاول تلحق تجيب ولو حتى بأوفر برايس لأن فيه توكيلات بتستهبل في مواعيد التسليم .. لسه فيه واحد قايلينله في توكيل السبع الاستلام بعد 8 شهور .. يعني شكرا ..
نصيحتي ليك انزل على سمير ريان لو انت من القاهرة وخلص على طول

الاوكتافيا عربية جميلة جدا بس طلعتها بطيئة شوية بسبب تقلها لكن ثبات مفيش كده وسرعة في الطوالي محدش يعرف يحصلها ..

المشاركة الأصلية كتبت بواسطة the_air_devil

فيه منها جديد والمصنع لسة بينتج الشكل القديم وهاتلاقيها عند السبع وأوتو إيجيبت ... سعرها في نفس ميزانيتك مش معدية الـ 100 ألف بس اللي جابوا منها 2013 لقوا ان السماعات الخلفية مش موجودة ...ده عيبها الوحيد حالياً :)


بصراحة صفقة رابحة بإذن الله وموفق من عند ربنا في البيع والشراء , وأياً كان قرارك ربنا يباركلك فيه وفيما رزقك ويكفيك شرها ويرزقك خيرها

تحياتي

ألله يطمنك يا باشا الف شكر

المشاركة الأصلية كتبت بواسطة dr/ p.k.sh

لو هاتجيب صنى هات الشكل القديم اتوماتيك هاتبسطك قوى قوى
بلاش الشكل الجديد عشان متحسش بفرق رهيب بعد الاوكتافيا
او تبيع الاوكتافيا اللى معاك و تجيب اوكتافيا تانيه
اختار من الحلين دول فقط

ان شاء الل هرسيت بشكل كبير على الشكل القديم
ربنا يقدم اللي فية الخير ان شاء الله

المشاركة الأصلية كتبت بواسطة mohamedbook

ياباشا فكر كويس صعب بعد متركب الالماني تنزل للصني مش عشان هيه ياباني عشان اردئ فئة في اليباني
الموديل القديم 2010 صوت المكنة عالي وهيقرفك حبتني
حاول تركبها ابل متشتريها

يا باشا انا مش مولود في عربية الماني
بعدين مع احترامي ليك انا ركبت عربيات ياما
منها عربيات معفنة متتسقش
الفكرة في تأقلمك مع العربية في البداية والراحة النفسية
وانا زهقت خلاص من المستعمل وبجد الاوكتافيا مقرفة في تصليحها وقطع غيارها
بخلاف ان ميزانيتي محدودة
واكيد مش هفكر في مستعمل تاني او مش هجيب فيرنا ولا افيو ولا حتى بيكانتو
فمقدامايش غير الصني
وهي عربية مش وحشة للدرجة برضو العربية جميلة، فرق مستوي اة لكن ان شاء الله تكون جميلة

المشاركة الأصلية كتبت بواسطة elsebily

معلش يا جماعه عشان الموضوع استفزني جدا الناس اللي بتقول هتحس بفرق بين اوكتافيا وصني الجديده هيزعلك معلش هو بيتكلم علي اوكتافيا موديل 2012 ولا 2013 ولا حاجه انتو بتتكلمو فيه ايه يا جماعه عربيه زيرو وعربيه من 2005 ازاي هيتصدم من الصني يعني يعني ياريت اللي يتكلم يوضح الصدمه هتكون من ايه يعني كل حاجه واضحه في العربيتين والاعضاء وضحوها مليون مره سواء كانت الصني القديمه او الجديده والجديده اللي كل عمال ينتقد فيها دي مفيهاش غير عيب الصاج وعيب الضفيره اللي بيتعمل في الضمان لو حصل يبقي ليه الكلام الكتير وفيه ناس بتقول مش متقبله شكلها ودي حريه شخصيه لو معجب بشكلها اشتريها غير كده برضه الصني القديمه عيوبها من ضيق الصالون و الضفيره والموتور اللي بيقولو صوته عالي ودي عيوب لو متقبلها اشتريها وجرب العربيتين قبل الشراء وسوقهم عشان تبقي مطمن غير كده من ناحية قطع الغيار والتوكيل مفيش كلام علي نيسان في الموضوع ده اما بقي موضوع السي اليزيه والبيجو 301 نفسي أسال اي حد بيقول عليهم انت جربتهم ولا ركبتهم ولا حتي عارف ايه نظام توكيلهم ولا اي حاجه عنهم غير انك شفت صورهم ولا هو الشكل وخلاص واسم الماركه جاي علي كيفك واقرب مثال للناس اللي بتتكلم وخلاص العربيه سكودا رابيد اللي الناس طلعتها السما وفي الاخر التقارير وبعد ما الناس بدأت تركب والعربيه تنزل السوق كله قال عليها سكودا فابيا من جديد يا جماعه ياريت بجد اللي يتكلم علي عربيه يكون ركبها عشان حالة الفتي اللي ماشيه في المنتدي اليومين دول ميتسكتش عليها ابدا

انت جبت من الاخر يا برنس
في نظري محدش يقارن عربية 2005 بحاجة 2013 حتى لو كان صني واوكتافيا
الزيرو برضو له زهوته

المشاركة الأصلية كتبت بواسطة youssef.awad

المشكلة يافندم مش فى الصنى الجديدة ..
المشكلة ان العضو الفاضل صاحب الموضوع نازل من اوكتافيا a5
انا من ملاك الصنى القديمة ex مانيوال مو2010 وسوقت الصنى الجديدة وركبت الاوكتافيا
الاوكتافيا عربية تقيلة على الطريق بمعنى الكلمة خشنة عفية كل ده يخلى اى واحد ساقها او اتعود عليها لما يركب صنى جديدة ناعمة خفيفة طرية (كفاية فرق الصاج بس !!!) يحس بعدم الامان تماما .. ده ايحاء نفسى مش اكتر ومش شرط هو او غيره يحسوا بيه لكن فى الاغلب ده اللى هايحصل

انما لو ركب صنى قديمة ex واللى لسه بتنزل اتوماتيك بسعر 98 الف تقريبا (الله اعلم بكام دلوقت ؟!!) الى حد ما مش هايحس باختلاف كبير اوى على الطريق الا فى عزل الاصوات والهواء فقط لا غير
والله اعلم اولا واخيرا .. العربيتين موجودين وممكن العضو يركب الاتنين واللى يرتحالها يشتريها لأنه مش كل يوم هايركب او يشترى عربية زيرو .. والله اعلم

لو على الارتياح النفسي اقدر اقولك انا فقلت قافلة سودا من الاوكتافيا، راكنها تحت البيت لحد ما ابيعها واروح مشاوريري مشي او مواصلات، وفعلا نصيحة كل الاعضاء كانت هات الشكل القديم, وبخلاف انه في حدود ميزانيتي حاسس انه هيكون افضل، فأنا هستخير ربنا واتوكل على الله

المشاركة الأصلية كتبت بواسطة akmall

بص يا باشا انا كنت واقع فى نفس مشكلتك كنت راكب اوكتافيا a4 2004 الحقيقة تعبت جدا من حاجتين :- سعر قطعة الغيار اذا لقيتها بسهولة وتاني حاجة فتي "الدكاترة " الصنايعية كل واحد عامل فيها بروفيسير - صعوبة الصيانة بشكل مقرف عشان توصل لمسمار ممكن تفك اقبله مليون حاجة - المهم اني طبعا بعد معاناة قررت اجيب زيرو اريح نفسي فاتصدمت من الاسعار لقيت انسب حاجة فى حدود 100000 الصني الشكل القديم - طبعا فى الاول كنت معترض ازاي اركب صني بعد الاوكتافيا - المهم قررت اجيب الصني للاسباب الاتية :- سعر قطعة غيار جيد - توكيل محترم ومتوافر - عربية منتشرة - بعد انتهاء الضمان ممكن اي حد يشتغل فيها بسهولة وبدون فتي زي اي ياباني او كوري - الفتيس والمكنة الياباني - لكن مكنتش طبعا مقتنع جدا مش هاكدب عليك .

المهم اتكلت على الله واشتريتها طبعا مش عاوز اقولك فى الاول حسيت اني مش عارف اسوقها خالص فرق كبير فى الوزن والتقل على الطريق انت هتحسه - العزل - استجابة الموتور - احساسك بالامان وارتفاع العربية - كلو فى صالح الاوكتافيا طبعا - اكيد الفرق فى العربية وفى نفسية اللى سايق .

لكن بعد فترة حوالي 3 شهور حاليا :- الفرق دوة مبقاش موجود تأقلمي على العربيية خلى الفرق راح بشكل كبير الموتور استجابته جيدة جدا - الثبات جميل - التكييف رائع - العزل هو اللى نوعا ما اقل من الاوكتافيا بس فى السرعات العالية بس لكن فيه ناس كتيت فى المنتدى عن حاجات زودوا بيها كفاءة العزل - ميزة انك راكب عربية مش قلقان منها فى صيانة او قطعة غيار " طبعا الزيرو مفيهوش الكلام دوة الا بعد كام سنة" لكن بشكل عام الموضوع مش سيء طبعا اكيد التابلوه مش فى فخامة الاوكتافيا والبرستيج بتاعها لكن انا مرتاح وحابب العربية وحاسس انها تستاهل فلوسها وشايلاني فى القاهرة الجميلة وحرها فاتكل على الله

اخيرا لقيت حد فهم نفس مشكلتي
والله يا جماعة الاوكتافيا مش وحشة جميلة
لكن مقرفة في حاجات زي قطع الغيار والصنيعية والاسعار بتاعها وخصوصا لو جبتها مستعمله بجد هتكره نفسك
يكفي ان الجريدة في عربيات ياما بتتباع ب12 جنية، عندي ب75، ليييييييييية كل الفرق دة
باغت الفانوس بتتباع ب17 جنية لموديلات ياما لقيتها عندي ب160
انا برضو راجل على قدي وورايا بيت ومسؤلية ومش حمل كل المصاريف دي
وانا مستعد اضحي بشعور الراحة النفسية في الاول مقابل اني اركب زيرو وحاجة ضامنها والناس بتشكر فيها

الف شكر يا برنس على النصيحة وربنا يباركلك في عربيتك