النهاردة كنت هنضم لأسرة نيسان , بس محصلش نصيب

**wahba87** · 05-06-2013 09:19 PM

اهلا بيكم يا رجالة

بدور على عربية صنى مستعملة , و شفت امبارح واحدة اوتوماتيك 2008 ex , عاملة 44000 كيلو , و اتفقنا على السعر و كل حاجة و اتفقت مع صاحبها انى هكشف عليها فى التوكيل النهاردة

النهاردة الصبح اتقابلنا و روحنا اوتو ايجيبت ابو رواش علشان جنب شغله فى القرية الذكية , للأسف قالوا الكشف على العربية لازم يكون فيه حجز قبليها و قيمته 450 جنيه !!!!! , و اول ميعاد حجز الاحد القادم

روحنا مودرن موتورز و كان قيمة الكشف 300 جنيه + 10% ضريبة = 330 جنيه

التقييم العام للتوكيل انه جيد , فى شوية هرجلة و عدم نظام و تحس ان الفنيين بيهزروا مش بيشتغلوا

بس بصراحة الكشف كان كويس و كان شامل , و طلع كل حاجة فى العربية بما يرضى الله , و لفت نظرى لحاجات كتير انا مشوفتهاش , الكشف شامل ميكانيكا و عفشة و كهرباء و سمكرة و دهان + انه بيطلعلك تاريخ صيانة السيارة فى التوكيل و مقايسة اسعار بالمصاريف اللى العربية محتاجة اليها

و بعد الملحوظات الكتير اللى فى العربية , صاحبها قافش فى السعر 81,500 , و ده يعتبر كتير على عربية فيها ملحوظات زى دى, ربنا يوفقه فى البيع لغيرى و يوفقنى فى الشراء من غيره.

الملحوظات كانت:

بوابة موتور (!)
2 مقص امامى (!)
4 كاوتش تراب مساعدين
طقم سيور
قاعدة موتور امامية (اسمها قاعدة الومنيوم اظن)
شق صغير (طول صباع كده) فى ارضية الشنطة نتيجة خبطة (شق بتشوف منه الاسفلت)
رش اكصدامين و باب و عتب و اجزاء من رفرف و جزء من الكبوت (نظافة بدون معجون)

و شوية رفايع زى خدوش الفوانيس و شرخ فى الزجاج الامامى و لحام الكبوت مع العضم مفكوك , زيت الفتيس يحتاج الى تغيير (ميعاده 40,000 كيلو)

حبيت انى اشارك معاكم تجربتى و لو حد عنده عربية صنى اوتوماتيك فابريكة نظيفة و مش محتاجة مصاريف و ماشية كيلو قليل و بتعمل صياناتها فى التوكيل يا ريت يبلغنى

**Ramy Rateb** · 05-06-2013 09:38 PM

فعلا الكشف على العربية فى التوكيل بيكشف لك حالتها الحقيقية .. ربنا يوفقك و تنضم لأسرة نيسان قريبا :)

**Amr_Moh** · 05-06-2013 09:55 PM

التوكيل احيانا بيبالغ في الصيانات المطلوبه ليخلي مسؤوليته

البيشتري مستعمل عمره محيعمل كل ده

**hossam_elwani** · 05-06-2013 10:00 PM

90% من الى بيبيعو عربيات مستعمله بيبيع وهو جايب اخرها وعارف الى فيها

**wahba87** · 05-06-2013 10:02 PM

المشاركة الأصلية كتبت بواسطة amr_moh

التوكيل احيانا بيبالغ في الصيانات المطلوبه ليخلي مسؤوليته

البيشتري مستعمل عمره محيعمل كل ده

التوكيل بيقوم بدوره , بيقولك تاريخ حياة العربية و حالة كل حاجة فيها

انت تشترى ولا لأ , تغير القطع دى ولا لأ دى حاجة ترجعلك , بس هو بيعمل اللى عليه فى الكشف

**jojojojo** · 05-06-2013 11:02 PM

معظم المستعمل للاسف كده ولو كان فيه الخير مكنش رماه الطير

**KoKyKa** · 05-06-2013 11:19 PM

الغريب باه

لما تيجئ تعمل الصيانات الدورية بتاعتك مافيش حاجة من دة بتطلع خالص

فعلا

عجبئ

**ramymechanics** · 05-06-2013 11:48 PM

انا عربيتى 2009 عاملة 52 ألف كيلو رشة من برة ماعدا سقف وكبوت وعاوزة حبة مصاريف عبيطة ممكن اعملها لو ناوى عالبيع .. صيانة دورية بس مع نفسي برة التوكيل عشان ظروف شغلى مش بتخلينى اعرف اظبط مواعيد الحجوزات .. وكنت عاوز فيها 77 ألف على حالتها .. على فكرة بطاريه جديدة وكاوتش جدبد ورخصة بأسمى 3 سنين الا شهرين والبيع عشان هجيب حاجة اخدث انشاء الله وقدر

**wahba87** · 06-06-2013 12:51 AM

المشاركة الأصلية كتبت بواسطة ramymechanics

انا عربيتى 2009 عاملة 52 ألف كيلو رشة من برة ماعدا سقف وكبوت وعاوزة حبة مصاريف عبيطة ممكن اعملها لو ناوى عالبيع .. صيانة دورية بس مع نفسي برة التوكيل عشان ظروف شغلى مش بتخلينى اعرف اظبط مواعيد الحجوزات .. وكنت عاوز فيها 77 ألف على حالتها .. على فكرة بطاريه جديدة وكاوتش جدبد ورخصة بأسمى 3 سنين الا شهرين والبيع عشان هجيب حاجة اخدث إن شاء الله وقدر

هل حضرتك المالك الاول ؟
ايه المصاريف اللى فى العربية؟
ايه سبب الرش ؟ هل فى حوادث او خبطات ؟ فى حاجة مردودة على البارد فى الشنب او الشنطة من الداخل ؟
هل تحتاج وش نظافة حاليا ؟
حالة الدواخل ؟
حالة الموتور - الفتيس - العفشة - الصالون ؟
لونها ايه ؟ شكل ال 2008 ولا شكل ال 2010 , علشان 2009 فيها الشكلين
مرور ايه ؟
مكان المعاينة فين ؟
اخر حاجة يا ريت تبعتلى نمرة حضرتك :)

**ramymechanics** · 06-06-2013 01:29 AM

المشاركة الأصلية كتبت بواسطة wahba87

هل حضرتك المالك الاول ؟
ايه المصاريف اللى فى العربية؟
ايه سبب الرش ؟ هل فى حوادث او خبطات ؟ فى حاجة مردودة على البارد فى الشنب او الشنطة من الداخل ؟
هل تحتاج وش نظافة حاليا ؟
حالة الدواخل ؟
حالة الموتور - الفتيس - العفشة - الصالون ؟
لونها ايه ؟ شكل ال 2008 ولا شكل ال 2010 , علشان 2009 فيها الشكلين
مرور ايه ؟
مكان المعاينة فين ؟
اخر حاجة يا ريت تبعتلى نمرة حضرتك :)

بص يا باشا انا أمين جدا فى البيع ومش هخبى حاجة لأنى هشترى وعاوز ربنا يكرمنى انشاء الله ...

.... أنا أول مالك ليها من شهر 6 - 2009
.... انا والله مش عارف يعنى ايه دواخل بس عموما انا معملتش شغل فيها من جوة
.... الموتور زى الفل الحمد لله وبحطله زيت 10 آلاف كيلو موبيل وان قبل معاده ... الصالون الحالة الطبيعية وكنت ناوى اركبله جلد قبل مانوى البيع
.... لونها فضى الشكل الجديد اللى الشبكة مع الكبوت مش الاكصدام
.... مرور السلام للأسف .. بس لو عاوز ممكن احولهالك مرور الشروق قبل البيع
.... مكان المعاينة فى الرحاب او اى مكان قريب منها
.... بص بقا يا سيدى .. انا العربية كان فيها شوية خرابيش وخبطات عادية .. نتيجة لظروف سفرى المتكرر كلمت واحد صاحبى وداها لسمكرى معرفته ودوكو بس بعيد عنك طلعوا اى كلام بس هى من بره شكلها حلو مع انها مرشوشة من اكتر من سنة هى بس محتاجة تعير الاكصدام نتيجة ظروف القيادة فى بلدنا الحبيبة ودول انا ممكن اعملهم برة السعر مش مشكلة .. الخبطات الرئيسية كان تاكسى خبط فيا من ورا وطبقلى حتة من الشنطة وكان فيه خبطة فى الباب واعتقد ان الباب مش بيأثر عالفابريكة
.... العفشة فيها صوت خبطة الراجل قاللى عاوزة كاوتش قنطرة او حاجة زى كدة وبردو دى ممكن اعملهالك برة السعر دة حقك طبعا .. يا رب مكونش نسيت حاجة

تليفونى فى البروفايل بتاعى بس هو غير متاح لمدة 4 ايام عشان انا فى شغل فى مكان مفيهوش شبكة

الموضوع: النهاردة كنت هنضم لأسرة نيسان , بس محصلش نصيب

LinkBack

أدوات الموضوع

عرض

النهاردة كنت هنضم لأسرة نيسان , بس محصلش نصيب - انشر الموضوع فى :

-

-

-

-

المواضيع المتشابهه

هنضم ان شاء الله للالنترااوية و استفسارات

مش عارفة اشغل كاسيت نيسان صنى وشرياها النهاردة اعمل ايه

ان شاء الله هنضم لعائلة بروتون خلال ايام

اشتريت نيسان صني النهاردة من سمير ريان

باركولي يا شباب هنضم للعــــائـــله

الكلمات الدلالية لهذا الموضوع

المفضلات

المفضلات

ضوابط المشاركة