شكراً منصور شيفروليه "فرع الهرم"
الموضوع يا جماعة إن كان عندى مشكلة التزييق فى طارة الدريكسيون فى سيارتى الأوبترا 2007 و ده تقريبا بعد صيانة الـ5000 (دلوقتى أنا عامل 18500) و هى عبارة عن تزييقة خفيفة جدا فى الدركسيون لما تلفه يمين و شمال فى مكان هادى و إنت قافل الزجاج و كنت أعتقد إنه مش مؤثر على سلاسة الباور و لو راجعتوا المواضيع الخاصة بهذه المشكلة بوصف الدكتور محمود صلاح و أخونا المهندس هشام عثمان هتلاقوا وصف دقيق لها و لكن من شهر ركبت عربية عمى (أوبترا 2008) لقيت الباور بتاعها خفيف بشكل ملحوظ عن سيارتى فعقدت العزم أن أذهب بها لتوكيل منصور بالهرم لأن الناس بتشكر فيه -على فكرة أنا من إسكندرية - و كمان لأنى عرضت المشكلة عليهم عندنا فى فرع العامرية فى صيانة ال15000 فقعدوا يقولوا أصل الصوت خفيف و مش باين قوى و مش مؤثر على حاجة و إنت لسه فى الضمان و كلام من ده .. شغل إسكندرانى
المهم يوم الثلاثاء الماضى كنت مسافر القاهرة لحضور دورة فى شركة THree brothers فاتصلت قبلها و حجزت و كنت هناك الساعة 11 ظهرا أخذت دورى و سلمت العربية لمهندس الصيانة (م/شِريف) و قلتله على المشكلة فقعد يسمع الصوت و قفل الزجاج و قعد يسمع تانى فقلتله إيه شايف إيه فهز رأسه و لم ينبث ببنت شفه !!!
دخلت العربية الصالة فى حدود الساعة 11:30 وقولت أطلع الإستراحة أشرب كوباية شاى رحت نايمو أنا قاعد فى التكييف اللذيذ حتى الظهر ، قمت صليت و قلت أشوف وصلنا لإيه ، لقيت العربية واقفة مكانها لم تتحرك .. قلت كده تبقى طالبة حته إسكنرانى ، قعدت أدور على المهندش شريف لقيته بعد عناء فى مكتب مدير الصيانة الموجود بالصالة قمت داخل رغم إعتراض فرد الأمن و كانت الساعة دخلت فى 2:00 ظهرا و قلتله إيه الموضوع يا هندسة إنتوا مش ناويين تشتغلوا فيها و لا إيه لقيته رد بهدووووء شديد و قالى و الله أنا داخل للمدير علشان عربيتك.... بإذن الله هنبتدى نشيك عليها قولتله تمام ربنا يقويكم و ما هى إلا ربع ساعة حتى فوجئت بالفنى المختص أخد العربية وو ضعها على الونش وتركها و انصرف ..و بعد 5 دقائق لقيته راجع و شايل معاه كارتونة السكاترا الجديدة فدخلتله و ظبطه و بدأ يشتغل فيها و الصراحة ولد 10 على 10 خلص الموضوع فى حوالى 45 دقيقة و غير طبعا زيت الباور و دخل العربية لتظبيط الزوايا
و أنا طبعا بدورى دخلت للمهندس شريف و لمدير الصيانة و شكرتهم و الحقيقة يا جماعة فعلا منصور من أحسن التوكيلات فى مصر و يستاهل الشكر و التقدير و الثقة و الظاهر كده إن إحنا فعلا فى "إيــــد أمينــــــــــــــــــــة "
يا رب ما أكون زهقتكوا