بلطجية الحسين !!

**أبو يوسف** · 08-06-2013 10:13 AM

أولاً : أسف على العنوان
إمبارح خرجت أنا وزوجتى وأختها وزوجها , روحنا نصلى المغرب فى الحسين
وصلت الحسين وجيت أركن , مشلاقى مكان خالص المهم لاقيت واحد بشورلى وبيوقلى عاوز تركن قولتله أه .
قالى تعالى ورايا , ولاقيته بيركنى صف ثالث , وبيقولى هاتقف قد أية , قولتله يعنى أية , هاصلى المغرب وأجى وكان فاضل على المغرب 10 دقائق , قالى تمتم 10 جنيه , قولتله لية يعنى دة أنا واقف فى الشارع وصف ثالث , قالى خلاص أركن بعيد , مشت قدام شوية لاقيت واحد تانى , بيشورلى , وقفت ليته بيوقلى نفس الكلام وهاتدفع 10 جنيه , قولتله بتاعة اية ال 10 جنيه , قالى جراج , إحنا مأجرين الارض من الحى , قولتله حى , طيب طالما أنت مأجر من الحى , أنا عربيتى ( معاقين ) يعنى ليه الاولية فى الركن وبلاش ومش مصدق روح إسئل الحى , وركنت العربية وسيبته ومشيت , والموضوع الحمد لله خلص بدون مشاكل , بس بعد مناهدة .

المشكلة الثانية :
اتفقت انا وزوجتى نتقابل قذاد المسجد بعد صلاة المرغب على طوب بدل من الناس دى تعمل حاجة فى العربية
وفعلاً قبالتها , وقالتلى أنها اتخنقت مع واحد قصاد الجامع لانه حاول ( يتحرش ) ببنت أتختها ( 15 سنة ) وحصلت مشكلة كبيرة بينهم والناس اتلمت عليهم
ووالد البنت طبعاً رجع يدور على الراجل , وكانت خروجة زى الزفت

قادى الثورة واللى خدناه منها

البلد بقت بتاعة البلتجية

أبو يوسف

لقد قمتم باستخدام عنوان (غير لائق للموضوع ) وذلك يعتبر مخالفة للقاعدة رقم (16) من قواعد المنتدى لذا سيتم تغيير عنوان الموضوع إلى (بلطجية الحسين !!) .

يرجى مراجعة قواعد المنتدى .

3 ب
1:30 pm
2013/6/13

**mostafaenany** · 08-06-2013 10:20 AM

بص هى مش الثورة السبب عشان منضحكش على نفسنا
بس الشعب لما صدق لقى فرصة عشان يبين حقيقته و انسى اى حد يقول اصل الشعب المصرى متحضر بطبعة و محترم و متدين
دة كلام فارغ.
السفالة كلها ظهرت اول ما بقى فى مساحة لكل واحد يعمل اللى عايزة

**SAMEH_FOUAD** · 08-06-2013 10:44 AM

هو الحمد لله ياباشا ان الموضوع عدى على خير , بس فعلا مشكلة الركنة بقت مشكلة صعية جداااااااا , خصوصا فى اماكن معينة كدة , بس خلى بالك انها قبل الثورة كانت كدة بردة , بس هما ماوصلوش ل10 جنية كانوا بياخدوا 5 جنية

لكن العيب بقى ان مافيش رادع للناس دية , عشان كدة هما بيعملوا كل اللى هما عايزيينة

والشعب الصراحة اصبح فظيع ربنا يسترها

**mado83** · 08-06-2013 10:56 AM

اخر مره روحت فيها الحسين نفس اللى بتحكى عليه بس اكتر بقه لانهم دخلو على السيدات بالاسلحه البيضا واتضطرو يخرجوهم من عند الجراله
بصراحه بقت حاجه تكسف

**4fun14** · 08-06-2013 11:06 AM

محسسنى انى ملحقتش البلد\ قبل الثورة!!!
الكلام ده كان بيحصل كل يوم ف الحسين من قبل مانا ماتولد اصلا!!!!!!!!!!

**تامر.محمد** · 08-06-2013 11:16 AM

ما تحاول تلعن الداخلية و الشرطة الاول طيب ؟
اصل هي السبب المباشر للي بتقوله ده

بنلعن اي اسباب غير مباشرة لمجرد اننا واخدين منها موقف , و السبب المباشر بنسيبه

**kar!m** · 08-06-2013 11:22 AM

مش عارف ايه الحل في موضوع الركن ده .. يعني أكيد الحكومه مش هتحط عسكري في كل مكان من دول عشان يخلي الناس دي متاخدش فلوس.

موضوع الناس دي كبير و منظم و له ناس بتديره و بتوزع الناس دي في أماكن معينه و بتلم منهم الفلوس و بتديلهم نصيبهم.

الحل الوحيد من وجهة نظري ان احنا نتفق ان كلنا مش هندفع حاجه لما نركن في الشارع .. و المفروض الدوله تعمل حملات توعية بحاجه زي كده.

**mous6fa** · 08-06-2013 11:33 AM

يا باشا إحنا شعب -مع الأسف الشديد- مجرم وقليل الأدب وبلطجي .. وللأسف المشكلة فى الرعية مش فى الحاكم ..
مهما تغيرت الأنظمة الحاكمة هتستمر وساخة الشعب والبلطجة ومحدش هيقدر يغير اى شىء ..
ودليل ع كلامي شوف بنفسك دول الخليج والعمالة الأجنبية اللى فيها .. سبحان الله مفيش حد هناك بيعمل مشاكل ووجع قلب غير العامل المصري !!!!!!!
للأسف الشخصية المصرية أصابها عوااااااار شديد من يوم سقوط الملكية فى 1952 وعبد الناصر باع للشعب أوهام الحرية والديمقراطية والعدالة الإجتماعية ... قارن بنفسك وضع المجتمع قبل 1952 وبعدها .. ثورة يناير 2011 مجرد "كمالة" لمسلسل عوار الشخصية المصرية ..
للأسف الشديد بحاول أكون مش متشائم .. بس فعلا مفيش فايدة .. والله لو عندنا رئيس وحكومة من فوق سبع سماوات مفيش فايدة ..