الموضوع: عملت حاجة جديدة لتخفيض درجة حراره الفليشيا المكيفة

المشاركة الأصلية كتبت بواسطة wael_ghreez

السلام عليكم

يا جماعة انا و آلاف زيي من مالكي سكودا فليشيا مكيفة بيشدوا في شعرهم من السخونة يعني لو حطيت ساندويتش برجر ني تحت الكبوت مسافة الطريق تلاقيه استوا

الفيليشيا المكيفة فاشلة يا جماعة و دة اخر الكلام بس لو كان و لا بد يعني يبقى نقول التجربة بتاعتي اللي حسنت كتير من سخونة العربية و التكييف شغال

انا جربت اعمل كل شىء ممكن يساعد في تخفيض الحراره
غيرت وش سلندر جديد
و طبعا جبت جوان اصلي جديد
غيرت رادياتير صيني
غيرته لاحقا برادياتير نحاس
غيرت حساس حراره
شلت قميص المروحة و ركبته يعني عملت كدة و كدة
عليت الكهربا بتاعة العربية ووطتها
حطيت مروحة 2 سرعة ألماني اصلي
ركبت كتاوت للمروحة عشان السلك مايسحش من كتر مالمروحة شغالة مع الحراره السلك بيسيح او بيحمص
عملت كل شىء تقريبا
عملت نص عمره للعربية
غيرت الترموستات بدل العالي جبت الواطي
غيرت الضفيره بتاعة العربية
قللت ضغط الكباس بتاع التكييف عشان مايحملش على الموتور و طبعا تبريد التكييف بقى سىء

عموما مش هاغلبكوا و أطول عليكم

الاسباب و العلاج

1- تنفيس في وش السلندر و دة يعالجه مادة حمراء بلاستيكية غريبة كدة الازازة تقريبا الرخيص ب 12 و الغالي اوي ممكن يوصل لـ 35 انجليزي , اشرح لبتاع الاكسسوارات هي بتعمل ايه و قوله عايز السائل اللي بيعالج تنفيس وش السلندر

اللى حضرتك تقصده ده البلوك سيل وده بيستخدم فى حالات معينة وده عند بداية جوان وش السلندر بنجيبه علشان يسد اى تسريب ومنفتحش على نفسنا فتحة يعنى مش بنستخمه على الفاضى والمليان

طب تعرف انه في تنفيس ازاي هاتلاقي لما تفتح غطا القربة في اندفاع بخار و العربية متوسطة الحراره يعني على 90 مثلا , تحس انه في نفخ و النفخ دة بيولع العربية بمعنى الكلمة و هو اخطر شىء على العربية

العلاج يا ما تجيب السائل الغريب دة يا اما تغير جوان وش السلندر بحوالي 150 جنية مصنعية و 60 جنيه تمن الجوان

2- لو وش السلندر سليم و انت متأكد من كدة يبقى تحمد ربنا و تبص على الرادياتير , لو بقاله كتير اوي معاك اكتر من 5 سنين حاول تفكر تغيره بواحد صيني جديد ماركة فيكا بحوالي 200 جنية

موضوع الردياتير معمول بيه قبل كده مواشع كتير اوى وبننصح انه يتغير لواحد الومنيوم صينى

3- هات مروحة 2 سرعة ألماني اصلي بـ 250 تقريبا من الوكالة او عزبة شلبي بالمطرية هاتفرق معاك كتير و هاتها بقميص و لو عندك قميص يبقى هات المروحة بس و ركبه على القميص اللي عندك

على فكرة المروحة تغييرها بس لو اللى عندك بدات تجيب اخرها علشان لسه واحد زميلنا مغير مروحة استيراد ومكملتش معاه كام شهر وباظطت

4- ركب مروحتين 10 بوصة على سربنتينة التكييف جنب بعض هايفرقوا برضه شوية

دى انا مجربتهاش بس ممكن تبقى حل برده

5 - لتجنب تحميص سلك المروحة من كتر الاستعمال و الحراره اعمل 2 كتاوت واحد للمروحة الشديدة بتاعة الرادياتير 2 سرعة وكتاوت للمروحتين الاماميتين و دة هايخفف الحمل من على السلك و هايتحمص على المدى البعيد جدا
6 - حط مياة خضراء بعد تنضيف دورة الرادياتير و لو لسه جايبه جديد يبقى تمام حط مية خضرا نضيفة اسباني ب 35 جنية
7 - ماتقرصش اوي على العربية و انت مشغل التكييف و اخرك يبقى 90 بالكتير

انا يمكن ماقولتش جديد غير موضوع المروحتين الاماميتين و بجد فارق كتير

دلوقتي الحراره معايا مع التكييف و عدم القرص مش بتزيد عن 90 درجة و دة عظيم جدا بالنسبة للفيليشيا

اتمنى اكون قدرت اقول تجربتي بشكل واضح و يارب كل الفيليشاوية يستفيدوا

حاجة مهمة جدا الناس مش بتاخد بالها منها الاوهى غطا القربة لو السيكس بلف بتاعه باي هيخلى العربية تسخن برده