الله يخربيتك يا مرسي
الله يخربيتك يا قنديل
الله يخرب بيت الثورة
حد يقنعني ازاي رئيس بقاله سنة و حكومة شغالة بقالها سنة إلا حاجة بسيطة مش قادرين يقضوا على تهريب السولار و البنزين؟!
سيبك يعم من السولار و البنزين بيتهربوا ماشي طب و الكهربا؟ بتقطع ليه؟ مش نفس المحطات اللي كانت موجود أيام مبارك؟ نفس المحطات و نفس المولدات طب اشمعنى دلوقتي الكهربا بتقطع؟
ولا كهربتنا منورة غزة؟ هاااا؟
نرجع بقى لحوار البنزين
العربية خلاص شطبت بنزين و داخل على الاحتياطي و عندنا هنا ف المنيا مفيش بنزين خالص لا 80 ولا 92 ولا حتى سولار
البنزينات كلها قافلة و العربيات واقفة طوابير طويلة مالهاش نهاية و البنزينات قافله، في اللي سايب عربيته موقفها فالطابور و روح و في اللي قاعد جنب العربية ف البنزينة مستني البنزين يجي
والله وضع مأساوي جدا
و سواقين التاكسيات على فترات بيقطعوا الطريق و بيقفلوه بالحجارة احتجاج على عدم وجود بنزين و قيادات من مديرية الأمن بتروح تتفاوض معاهم عشان يفتحوا الطريق و بيجيبولهم بنزين بس طبعا مش بيغطي كمية العربيات الرهيبة اللي واقفة فالطابور و بعد ما البنزين يخلص الناس اللي بقالها 3 ولا أربع ساعات و ممكن ناس بقالها فترة اكتر من كدا واقفة اول ما البنزين يخلص من البنزينة هوب يروحوا بردو قاطعين الطريق و قافلينة بالحجارة
و لك ان تتخيل المشهد المروري العبثي و طريق حيوي مقفول بالحجارة في ساعة الذروة تخيل كدا الطريق قدامك مقفول بالحجارة و وراك عربيات كتير، يعني لا عارف تطلع لقدام ولا ترجع لورا
بجد وضع مأساوي جدا
انا خلاص ركنت عربيتي و غطيتها لحد ما الأزمة دي تخلص دا اذا خلصت أصلا
خلاص ابجديات الحياة و ابسط حقوقنا ف الحياة بتتسلب مننا
لا احدثك عن حرية و عدالة اجتماعية؛ احدثك عن الماية و الكهربا و البنزين و السولار
حسبي الله و نعم الوكيل