الموضوع: استفتسارات عن نيو واجا و ارجو المساعده و الأيضاح

أصل أنا قلقان من الجماعة بتوع عز العرب لأني وأنا بتفرج على الواجا2 شوفت فرق ملحوظ في فرش الباب فبسأله وديه يتعمل فيها إه قلي ولا حاجة ديه جاية من بلده كده

فهل الحجات ديه بتتعالج وكلام بتاع المبيعات ده غلت

شكرا ياهندسة أشكرك على أهتمامك يبقي أكيد هوه غلطان

المشاركة الأصلية كتبت بواسطة bassem_sams

شكرا يا استاذ احمد على ردك و اهتمامك و احب اقولك انا بأسأل الأسئله دى لأنى بقالى فترة كنت محتار فى عربيات لحد ما استقريت على سيراتو المانيوال لكن حاسس انهم منفضنها فى كماليات و لما لأقيت الواجا جديده بسعر ارخص و كماليات حلوة روحت شوفتها عجبتنى لكن مش كنت عارف عنها حاجه فلما دورت فى المنتدى لأقيت ناس اشتكت منها فى انها بتحدف يمين مش عارف دى حاله استثنائيه على اساس انها كانت مستعمله و لا ده عيب فى العربيه و ماتور جديد اللى ركب فيها هو نفسه بتاع جين و دى حاجه جميله لكن قرات ان ناس بتقول صوته عالى و كمان لما جيب ال 130 بيأخذ وقت عقبال مايجيب سرعه اعلى فكنت عايز اطمن عليها فى موضوع الحدفه و مساعدين و فرامل و موتور و دركسيون مع الوقت ممكن يعمل بوش
و ارجو انى اكون وضحت الفكرة

بص يا استاذى الفاضل ... واضح ان حضرتك جبت كلام من الواجا ال 4gi8 و عيوب انا نفسى كنت اتكلمت عليها ...


بالنسبه لموضوع الحدفه . ده كان عيب اغلب مالكين بروتون لاحظوه " خصوصا الواجا و الويرا "

علبه الدركسيون فى الواجا فيها عيب ... وده بيظهر فى صوره " بوش فى الدركسيون تقريبا 4 ملى , تخبيط فى الدركسيون فى الطرق الى فيها زلط و نقر كتير و المدقات , صعوبه ظبط الزوايا مع الدركسيون ............ موضوع علبه الدركسيون ده مظهرش فى العربيات الى الدركسيون بتاعها ناحيه اليمين " زى ماليزيا و انجلترا " ... بس عندنا فى مصر كتير اشتكو من الموضوع ده وانا من الناس ديه .و ناس تانيه مظهرش عندهم المشكله ديه نهائى .

فى الواجا القديمه صوت الموتور بيبقى عالى بعد ال 3000 ... 3500 RPM ....معرفش ايه نظام الواجا الكامببرو ؟؟... بس من كلام الناس على المنتديات الاجنبيه ان صوت موتور الكام برو اهدأ بعض الشى من موتور المتسو 4g18 .

الواجا القديمه التسارع بتاعها من الصفر لحد ال100 ممتاز .. وفيها عزم ممتاز جدا وعملى جدا جدا جدا فى التخطيات

الموتور ال 4g18 استجابته رائعه لحد 130 .. 140 .. بعد كده بتلاقى صعوبه فى التسارع ...... وده مش عيب فى الموتور .. لانه هو تصميمه كده " عزم عالى عن RPM واطى , على حساب القدره الحصانيه و السرعه القصوى ....بس بيديك الافضليه على السرعات اقل من 100 كيلو متر .و طبعا ده الافضل لقياده المدينه ..

الكامبرو خصائصه عكس موتور ال 4g18 لانه بيطلع اقصى عزم عند 4000 دوره و 2 كامه ...و ده بيديك سرعه قصوى اكبر .... و سلاسه فى التسارع فى السرعات العاليه .... بس طبعا على حساب ال Low end torque ....بس هو موتور بتاع جرى و حرق

طبعا المواتير الحديثه الى فيها VVT حلو المشكله ديه و بقى بيديك 80 & من عزم الدوران عند RPM واطى و فى نفس الوقت بيديك طاقه حصانيه عاليه .... الكلام ده ينطبق على موتور الكامبرو CPS الى للاسف مش حنشوفه فى مصر .


بالنسبه للمساعدين ف ديه كانت مشكله " عباره عن صوت طقه مع المطبات " فى المساعدين الخلفيه فى موديلات الواجا و و الويرا قبل 2006 ...و التوكيل كان بيغيرها مجانا ... و فى عربيتى فعلا غيرو المساعدين الخلفين مجانا فى الضمان ... بالرغم من ان مالك السياره الاول مكانش شايف ان فيهم مشكله .

بالنسبه للواجا 2 .... لسه العربيه ماتباعتش علاشان حد يقدر يحدد اذا كانت العيوب ديه لسه موجوده ولا لا ... وان كان من وجهة نظرى المتواضعه تحت اى ظرف انتا بتشترى عربيه بكل الكماليات ديه و ب 85 الف جنيه و معاها ضمان 3 سنين او 60 الف كيلو و وواخده 3 نجوم فى اختبار التصادم الاوروبى و هندسه لوتس , مساحة صالون ممتازه ...... لو مسمار وقع من العربيه او حاجه باظت بتروح عز العرب بيغيرها فورا فى الضمان .... وهما فى موضوع الضمان معندهمش تهاون .. وده انا شوفته بعينى فى التوكيل ..... و سعات كتير بيصلحو حاجات فى العربيه حضرتك مش واخد بالك منها " طبعا ده مايمنعش ان عندهم مشاكل كتير فى نفس الوقت ... بس ده مش مجال الحديث دلوقتى "

بالنسبه للفرش الداخلى ... ممكن تروح عند احسن سروجى فى مصر تعمل احسن فرش جلد على الكراسى و الابواب ... حيكلفك كام 3000 جنيه فى اقصى الظروف مثلا .... برده انتا الكسبان .

على فكره انا مش بشجعك على شراء الواجا 2 لان ده قرار انتا بس الى تتخذه لان ال85 الف جنيه الى ممكن تدفعهم دول فلوسك انتا , و مش بقولك انها احسن عربيه فى مصر لانها اكيد فيها عيوب زيها زى اى عربيه تانيه......لكن انا بس بتناقش معاك .

والله الرجاله دى كلها بتتكلم صح الصح
ههههههههه
10%10
ادعولى ربنا ييسرلى الحال واشترى البروتون قريب
ان شاء الله

كفايه بس انها اول سياره تصنع من دوله اسلاميه فى العالم
وبعدين الناس بتتكلم على التأفيل والخامات كعيب فى بروتون يعنى هيكون اسواء من تأفيل هيونداى فى مصر ولا تأفيل اسبيرانزا الصينى
مهو الناس بتجيب التويوتا كورولا 2008 ب 140 الف جنيه ويابانى وبتشتكى منها فى مشكله فى الفتيس تقريبا على ما قريت
يعنى مفيش عربيه فى العالم كله هيركبها اى انسان الا لما يطلع فيها عيوب من وجهه نظره الشخصيه
وبعدين الخامات الرديئه اللى بيتقال عليها دى ممكن يكون موضوع نسبى ممكن يكون مقبول بالنسبه لأنسان وانسان تانى لا
وكمان عيوب التأفيل موضوع نسبى فى حاجات ممكن انسان ميلاحظهاش وانسان تانى يلاحظها
اهم حاجه انا احدد انا عايز ايه وبكام
لان مفيش عربيه كامله بنسبه 100 فى 100
طالما بقا جميع العربيات وارد ان يكون فى عيوب يبقا نشجع المنتج الاسلامى على الاقل مفيهوش عيوب تقنيه وجوهريه توقف العربيه
وعلى فكرة دة رأيى الشخصى يحتمل الصواب والخطأ
انا عارف ان كلامى ممكن ميعجبش ناس بس دة رأيى الشخصى

انا اعتذر فى المقام الاول
انا لما قولت 140 حصان كنت ابدى اندهاشى
و المعلومة دى انقالت فى العرض وساعتها حسيت باحباط شديد
على العموم شكرا على تصحيح المعلومة
ولكن مازلت مصر على ان السيارة تحس انها مأفلة فى الصين
على عكس الجين 2