الموضوع: تجربة قياده استرا انجوي (و موقف مع النهضه)

السلام عليكم جميعا

قريبه ليا بتدور علي عربية جديده و بما اني خبير العربيات اللي في العيله فلجاءت ليا اساعدها في التدوير خصوصا و انهم مستعجله لان العربية اللي معاهم تقريبا باظت و عايزه متور تقريبا و هي قررت تتخلص منها
و كان الطلب انها تكون اوروبي

وقع الاختيار في الاول علي البيجو 301 بسبب مواصفاتها و سعرها المنافس بس لانها مش موجوده تقريبا و هما مستعجلين قرروا يزودا الميزانيه لحد 175 الف و طبعا في الرينج ده مفيش الا الفلوينس و الاسترا و الفوكاس تقريبا

و شفنا الكل و الاوبل نالت علي اعجابهم و توكلنا علي الله و خلصنا في الانجوي اللون البترولي من عند سمير ريان بسعر 173 الف مع انها في التوكيل ب 176

و هنا كان لي شرف استلامها و سواقتها لان صاحبه العربية كانت مقلقه تسوقها و ده تقيمي البسيط ليها


اولا كشكل العربيه تصميمها جميل و انسيابيه و كان نفسي الانجوي تنزل بجنط و لو 15 لانه فارق في شكل العربية جدا و بشكل عام تعتبر من العربيات الجميله من وجهة نظري و اللون البترولي ده اختراع و العربيه الصبح بتبقي غير بليل

التصميم الداخلي انيق جدا و الحركه اللي في الطبلون من فوق ظريفه (فكرتني بالجاجوار ال xj) و الزراير واضحه و قريبه من الايد و الشاشه اللي النص لا باس بيها و العدادات شيك و عجبتني حركتهم اول ما تدور العربيه و الشاشه اللي النص واضحه و كبيره لكن استخداماتها محدوده شويه

الكراسي ظريف و مريحه الي حد كبير و الدعم الجانبي فيها كويس و المساحه في الامام جيده جدا لكن من الخلف للاسف العربية ضيقه و خصوصا في مساحه الارجل و سحبه السقف و تصميم النوافذ الخلفيه بيساهم بشكل كبير في زياده الشعور بده و يدي احساس بالانغلاق كده

مع الانطلاق حسيت ان الدواسه خفيفه شويه و العربية عايزه تجري و الباور ظريف جدا و مش بيحسسك بحجم العربية و في نفس الوقت في نسبه دقه عاليه من ناحيه التوجيه
و لاحظت ان احيانا العربية بتكركر في اول الطلعه و مش عارف ده بسبب البنزين و الموقف اللي حصل و لا عشان في التليين

دواسه الفرامل اعلي شويه من البنزين و ده ممكن يكون مرهق شويه و مشوارها طويل شويه (بالنسبه ليا) لكن الفرامل جيده جدا من خلال تجربتي

طبعا الكوتش مكانش مظبوط لكن العفشه كانت طريه و مريحه و ارتفاع العربية هايل و مناسب تماما لشوارعنا الجميله و بعد ظبط الكوتش الدنيا بقت احسن و للاسف مقدرتش احكم علي الثبات بشكل قاطع لاني كنت ماشي علي مهلي طبعا لكن اقدر اشتشف انه كويس و خصوصا مع توفرها بنظام الثبات ال esp

و حصل موقف محرج جدا و كان كفيل بافساد اليوم و التجربه كلها
طبعا زي ما هو معروف في مصر المعارض بتسلمك العربية و فيها بنزين يكفيك لاقرب محطه و ده بصراحه حركه نتانه كبيره
و بما ان في ازمه بنزين في البلد فكل البنزينات من عند سمير ريان لحد مدينه نصر مفيهاش بنزين و حصل الاسوء و العربية قطعت بنزين و في وسط الشارع و ربنا سترها و عرفت الم نفسي و زقيتها علي جنب
طبعا اعصاب قريبتي كانت بتنهار و قعدت اهدي فيها و اتفقنا اني هقف جنب العربية و وقفتلها تاكسي و شرحتله الوضع و راحوا يدوروا علي بنزين و بعد ساعة وربع وصلت و معاها جركن حوالي 5 لتر و ده اللي عرفت تجيبه و سواق التاكس طلع شهم و وقف معانا لحد ما العربيه دارت
و ابتدت رحله للبحث عن بنزين و حتي البنزينه اللي قريبتي ملت منها الجركن كانت شطبت و بقيت مش عارف اعمل ايه اكمل تدوير و لا اوصلها لبيتها و بعدين نتصرف و في الاخر ربنا كرم و لقيت بنزين عند وطنيه اللي جنب جامع السلام


المهم فولنا و اتجهنا لبيتها و كانت فرصه ارجع مود التست دريف تاني و اركز مع العربيه و اخرج بالنتائج

و ده تثرير بسيط عن العربية و سامحوني مفيش صور عشان اللي حصل مخلاش الواحد مركز

و شخصيا العربية عجبتني و شايف انها صفقه رابحه و احسن من بدائل كتير في السوق و المنافسه بينها و بين الفلوينس هتبقي شديده
طبعا الفورد معاهم لكنها اقل انتشارا
اتمني بس توكيلها يكون قد العربية لان سمعته مش ولا بد

المشاركة الأصلية كتبت بواسطة hilal

ألف مبروك ، وخليها تدبح حاجة باربع رجلين ، (حتى ولو أرنب) للفقراء
لان البداية مجرد انذار
ربنا يديكوا خيرها ويكفيكوا شرها

الله يبارك فيك
و ربنا يتقبل دعائك

و انا نصحتها بده فعلا و ده عن تجربه
لكن هي اتاخرت و العربية اتحكت بالفعل و البويا قشرت
و هتدبح في اقرب وقت و غالبا انا اللي هتولي الموضوع ده هههههه

المشاركة الأصلية كتبت بواسطة hilal

لا حول ولا قوة إلا بالله
معلش هي العربية الجديدة بتكون موضع حسد
ربنا يكفينا ويكفيكوا شر العين

امين يا رب