السلام عليكم ورحمة الله

اللى متابع اللى انا بعمله فى عربيتى هيعرف انى كان لازم أغير الشكمان كااااااامل لأنى شايل الموتور الـ1000 ومسقط 1600 الـ101 حصان http://www.nilemotors.net/Nile/341077-98.html

انا مستلم العربية يوم 14/2 وطوول الفترة دى وانا عمال أجرب فى موضوع الشكمان ده عشان عايز افهم الفكرة ايه, كان ممكن قوى انى من البداية اروح واركب شكمان كامل جديد واريح دماغى, بس انا كنت قررت انى افهم النظرية وفعلا طلع الموضوع فيه نظريات كتير

طيب فى البداية لازم نعرف ايه لازمة الشكمان؟؟؟
معظم الناس متفقين ان علب الشكمان الهدف منها كتم الصوت
وان لو علبة الشكمان مخرومة العربية متسحبش
وان لو علبة الشكمان مسدودة العربية تسخن

معنى كده ان علب الشكمان دى مؤثرة جدا

معنى كده انى لو ركبت علبة شكمان مرسيدس هلاقى العربية بتمشى لوحدها؟؟؟

طيب وانا ايه اللى يخلينى أغير علبة الشكمان بتاعت عربيتى طالما سليمة؟؟؟
ايه يعنى سقطت موتور أكبر من الموتور الفبريكة على شكمان الفبريكة؟؟؟

ده شكل شكمان الفبريكة بتاع عربيتى من ناحية الموتور (بعد شجرة شكمان الموتور قبل علبة البيئة)



وده شكل شجرة شكمان الموتور اللى انا سقطه



حد لاحظ حاجة؟؟؟

انا حسيت ان الاتنين مش نفس القطر, وعشان أتاكد جبت متر عشان أقيس بيه ولقيت أن مقاس قطر شكمان الفبريكة 42ميللى ومقاس قطر الشجرة 50 ميللى

يعنى كده فيه فرق 8 ميللى
طيب و ايه يعنى 8 ميللى؟؟؟ دوول مكملوش سنتيمتر واحد
خليت بتاع الشكمانات يلحم الاتنين ببعض وفى الأخر المنظر طلع كده



طبعا حاجة قرف
ده غير انى كنت حاسس انى راكب جرار زراعى بسبب الصوت لأن اللحام مكانش قافل كويس بسبب اختلاف الأقطار

كان من ضمن النواقص حساس الشكمان ولما اشتريته كان لازم بتاع الشكمانات هو اللى يركبه
وعشان يركبه كان لازم ينضف العك ده

الطبيعى ان عربياتنا بيكون فيها علبة خلفية + علبة نص + علبة بيئة
أنا ملقتش عندى علبة بيئة ولقيت مكانها علبة شبه علبة النص
يعنى انا كده عندى علبتين نص وعلبة خلفية ومعنديش علبة بيئة

الرجل قاللى ان العلبة اللى مكان علبة البيئة مسدودة ولازم تتشال عشان يعرف يلحم على نضافة وهيحط مكانها ماصورة

دى العلبة اللى شالها



وده مكانها بعد ما اتشالت



ودى الماصورة اللى حطها مكان العلبة وجنبها حساس الشكمان



الصوت أختفى تماما والعربية بقيت أهدى وسافرت بيها مقابلة القاهرة عادى جدا و 180 والحياة حلوة
بس كنت بسمع صوت كركبة فى الشكمان ومكنتش فاهم من ايه

حسيت ان العربية لسه فيها أكتر وقولت ان اكيد الشكمان هو اللى عامل الكلام ده كله

أيام وليالى وأنا ببحث عن مواصفات شكمان الفبريكة للموتور بتاعى لحد ما لقيت الصورة دى

دى صورة شكمان الموتور بتاعى



ودى صورة شكمان الفبريكة بتاع الـ 1000



معنى كده ان الكلام ده بيفرق وان كل موتور ليه مقاسات خاصة بيه عشان يطلع كل امكانياته ويكون مرتاح

طيب بمقارنة الصورتين لقيت ان الاختلاف فى قطر المواسير و كمان مقاس علب الشكمان
طلعت جرى على بتوع الاستيراد وبتوع الشكمانات عشان اجيب الشكمان اللى انا عايزه
سمعت كمية فتاوى بعمرى
اللى يقولك شكمان الابيزا كله واحد
واللى يقولك العلب دى كاتم صوت بس
واللى يقولك يا بيه شكمانك يشيل لحد 2000 سى سى

طيب يا جدعان وابن التيييت اللى مخترع العربية ليه معملش كله زى بعضه طالما مش بتفرق!!!!!!

بالصدفة واحد صاحبى كان عنده علبة شكمان خلفية سبور نوعها Jasma يابانى أصلى وكان مركبها فى ابيزا بس موتور VR6
قولتله هجربها, وفعلا ركبتها ولقيت العربية بقت بتجمع فى الـRPM الواطى أحسن من الأول بس بتموووووت بعد 4 RPM + ان صوتها جمييييل ومش عالى لأنى مش بحب الصوت العالى

شيلت علبة النص وركبت مكانها ماصورة 2 بوصة (50 ميللى) عشان انسياب الهواء يزيد, لقيت ان استجابة الدواسة بقت أحسن لكن الأداء أضعف بكتير ومفيش عزم والنقلات بتخلص بسرعة والصوت بقى مزعج جداااااااا



شيلت العلبة الاسبور وركبت العلبة الفبريكة بتاعت الـ 1000 الأداء بقى أحسن بس حاسس ان فيه هدر كتير فى الموتور وان مش دى قوته + انى لما كنت اجيب 5500rpm وانقل النقلة اللى بعدها بيحصل back fire كأنك ماسك مسدس خرطوش وضربت منه طلقة



لما بحثت أكتر فى الشكمانات وفكرتها, لقيت ان الهدف من علبة النص انها تعمل حاجة اسمها back pressure ودى اللى بتدى الدفع للعربية وبتخليها تجرى
الموضوع بالظبط عامل زى واحد بينفخ وفاتح بقه على الأخر (بدون علبة النص) وواحد تانى بينفخ بس ضامم بقه (بعلبة النص) هتلاحظ ان اللى بينفخ وضامم بقه بيكون الهواء اللى طالع منه قوته أعلى من اللى فاتح بقه

قولت يبقى بلاش فتى وركب الشكمان كامل فابريكة وشوف النتيجة
لقيت ان الافضل انى اجيب جديد لأن الاستيراد ممكن يبقى مسدود بسبب الركنة
طبعا أبو اليزيد مشهور بس للأسف فى القاهرة ولما اتصلت بيهم دلونى على واحد فى اسكندرية بيشتغل فى العلب بتاعتهم اسمه غباشى فى السيوف
روحتله قاللى انه مبقاش بيجيب منهم بس هو فى الأصل مستورد كبير للشكمانات وبيجيب ماركات كويسة زى walker امريكى و bosal بلجيكى و zara ايطالى وعنده كمان علب سعودى واستثمارى
لقيت ان السعودى مناسب ليا كسعر وكعمر افتراضى وكخامات (3 سنوات ومقاوم للصدأ) لأنه مصنوع من مادة اسمها aluminus

فى النهاية ركبت علبة خلفية سعودى وعلبة نص ألمانى لأنى ملقيتش المقاس بتاعى فى علبة النص سعودى





ودى صورة المرحوم



الميزة فى الموضوع ان العلب جاية بالمواسير بتاعتها على مقاس العربية بالزوايا اللى فيها ودى حاجة مهمة جدا للى بيفكر انه يعمل مواسير شكمان عمولة فيها منحنيات لأن المنحنيات دى لازم تتعمل بطريقة معينة اسمها تكسيح والهدف منها انه قطر المنحنى يكون نفس قطر الماصورة وده بيحتاج ماكينات معينة عشان تعمل موضوع التكسيح ده وللأسف الماكينات دى مش موجودة عند ورش الشكمانات لكن هتلاقيها فى مصنع زى أبو اليزيد, لكن الورش بتعمل المنحنيات دى عن طريق العصر وده بخلى القطر يضيق عند المنحنى وده بيخنق انسياب الهواء + أن الماصورة بتكون عرضة أكتر انها تتقطم

المهم خلصنا التركيب ودفعت 575 جنيه ثمن العلبتين بالتركيب

التقييم:

الصوت شبه صوت الجولف 3 (الصوت المكتوم) جميييل جدا
استجابة دواسة البنزين بقت أقل وده لأن بقى فيه عائق جديد وهو علبة النص
بس مقابل كده العربية بقت بتفرك فى الطلعة بدون ما أكون قاصد, معنى كده أن العزم زاد
استهلاك البنزين قل لأن مبقيتش محتاج أنى أجيب أخر الدواسة عشان أجرى العربية
المروحة مبقتش بتشتغل كتير
طلعت على طريق سريع عشان أجرب, بقيت بحس أكتر بالعزم وكمان بقى مستمر لحد الـrpm العالى بعد ما كان بيخلص فى 4rpm
يعنى دلوقتى بيفضل دهرك لازق فى الكرسى لحد أخر الغيار
الغيار الأول:
قبل التركيب: 40
بعد التركيب: 50 + سرعة التجميع بقت أسرع فى كل الغيارات

الغيار الثانى:
قبل: 70
بعد: 90

الغيار الثالث:
قبل: 100
بعد: 125

الغيار الرابع:
قبل: 155
بعد: 165

الغيار الخامس:
قبل: 180
بعد: برده 180 وده مش بسبب الشكمان, لكن بسبب حاجة تانية بس مستنى أتأكد لأن الموتور ده مش أقل من 200

الخلاصة:
الشكمان ده من الأجزاء المهمة جدااااا فى العربية ومينفعش فيها افتائات
علبة النص مهمة جدا عشان تستفاد بعزم الموتور

معلش طولت عليكم بس الموضوع ده أنا بقالى 4 شهور بجرب فيه وصرفت فيه قد ثمن الشكمان مرتين ودى النتيجة النهائية اللى وصلتلها وحبيت انقلهالكم