احكيلكو علي اللي حصل مع عربيتي انهارده

عربيتي نيسان صني 2010 و طبعا الواحد مفترض انا معاه موتور قوي بما انه 118 حصان و ياباني و 1600 سي سي طبعا موتور مش جبار لكن برضه يعتبر كويس

يعني لما بمشي في طرق القاهرة الزحمة و السرعة اخرها 80 - 120 لو علي الدائري او المحور بس الواحد كان بيعتقد انه معاه موتور كويس يوم ما يعوز يقفل عداده او ياخد منه اداء محترم علي طريق سفر العربية مش هتكسفه و لكن للأسف حصل و خذلتني العربية انهارده

العربية بقالها معايا 3 سنين و نص و كنت بحترمها جدا و انهارده عشان زي ما قولت بقالي كتير ما سفرتش بيها و لسه مغير الكاوتش و مركب فلتر هواء رياضي (كماااان) قلت لما اطلع علي طريق السخنة اجريها شويه و افتح الموتور لحد البوابات كده و ارجع تاني.

العربية بتوصل لحد 150 - 160 بــــطــــلـــــوع الـــــروح و حالفة ما تعدي الـ 160 ابدا و كل ما احاول ادوس بنزين اكتر تقول مسقطة علي التالت و الار بي ام يوصل لـ 6000 لفة و صوت الموتور يعلي جدا و مفيش حاجة تحصل برضه 160 اخرها ليه مش عارف فعلا اول مره اكره العربيه دي بالشكل ده مع اني بعاملها احسن معاملة و الصيانة دايما في التوكيل و عامله 66000 كيلو متر يعني لسه العربية شباب

اراهنكم ان الـ 118 حصان دي اشتغالة و العربية دي اخرها 100 حصان بس
اهو التوكيلات تقول اللي تقوله هو في حد هيروح يقيس الموتور كام حصان

طيب ايه السبب الوجيه اللي يخليها تبءي عامله كده مش فاهم
امال ياباني ايه اللي واجعين دماغنا بيه و المواتير الياباني و ابعد عن الكوري

انا بصراحة بعد انهارده بقول المواتير الكوري احسن مليون مره من الياباني و ده عن تجربة مش كلام و خلاص

انا اعتقد هي ممكن تجيب 200 بس علي طريق اسكندرية الصحراوي يعني لو الواحد نوي في اول الطريق في القاهرة يقفل العداد ممكن يعرف يقفله عند العجمي كده!!!!

من الاخر انا مش هركب ياباني تاني بعد كده الماني و كوري و بس