السلام عليكم
من يومين نزلت الصبح وجدت الزجاج الامامي لسيارتي الكورولا 2008 متهشم والحمد لله (واضح حاجة اترمت عليه من العمارة وده الارجح) ... ومش هي ده النقطة المهمة ... اللي جاى هو المهم ... قلت قبل ما ادور عليه عندلو بتوع زجاج السيارات أسأل في التوكيل وأعر سعره الأول علشان انا كده كده ها اكون هناك لعمل صيانة الـ 5000 ولو سعره مناسب اركبه عندهم اضمن ... فاتصلت بابو رواش قسم قطع الغيار وسألت عن الزجاج قالوا لي سعره حوالي 1900 جنية وشويه من غير ضريبة المبيعات وبالضريبة بيعمل 2200 جنيه سمعت الكلام وقفلت الخط وعاودت الاتصال بهم بس بقسم السمكره والدهان وده القسم المسئول عن تركيب الزجاج سالته هل الزجاج موجود قالي نعم وانتظرت معه شوية علشان يحسب ثمنه وتكلفة التركيب كام ... تفتكروا كام يا تري الاجمالي ؟ ... بصراحة مش قادر اقول ....
هاقول بس علشان الامانة تقتضي ذلك .. قال لي ببساطة اجمالي سعره + تركيبه تعمل 2750 جنيه مصر ... لولا الملامه كنت لطمتله في التليفون .... يعني ببساطة ... مش ها نتكلم علي سعره الزجاج المبالغ فيه جدا جدا .. ها نتكلم بس عن رسوم تركيب لوح زجاج لا ياخذ من الوقت فك وتركيب اكثر من نصف ساعة ... 550 جنيه اصلهم ها يركبوه بمية الدهب .....
المهم طنشت الكلام ده وشلته من دماغي ... وعملت اتصالاتي وربنا ساق لي احد المعارف قريبه عنده محل زجاج في ش شامبليون بوسط البلد ... روحت له ولاقيت عنده (وفقا لكلامه واظن ان الراجل صادق في كلامه) كان عنده بتاع د/ جريش بـ 550 وبتاع التوكيل بـ 650 (بيؤكد انه بتاع التوكيل اللي بيركبه وذكر لي سعره في التوكيل زي ما قالوا لي بالضبط) ولما ركبه معرفتش افرقه عن اللي كان راكب وكان عليه علامة تويوتا زي التاني تماما ... سالت الزجاج ده صناعه ايه ... قالي بيتباع علي انه مستورد ... وهو في الحقيقة مصري مصنوع خصيصا للتوكيل وبيخموا بيه الناس علي انه مستورد.... نسيت اذكر انى قبل ما اروح محل قريب صديقي ده سالت محل تاني عن النوع والسعر قالي عنده جريش وعنده هولندى ... شفته لاقيته هو هو اللي ركبته بعد كده .....

معلش طولت عليكم ... ولكنها تجربه حبيت اعيشكم معي فيها ... وعلي فكرة التركيب كان نضيف جدا وماخدتش اكتر من 40 دقيقة ..... وعلي فكرة الراجل كلامه ومظهره يبعث علي الثقه + انه قريب صديقي ووصاه علي جامد ... علشان كده صدقت كلامه

في انتظار تعليقاتكم .... السلام عليكم