المشورة والنصيحة بخصوص شراء شقة

**Amr_MO** · 19-06-2013 10:16 AM

السلام عليكم ورحمة الله وبركاته

الاخوة الافاضل عندي موضوع عاوز اخد آراء الناس فيه

انا الحمد لله بشتغل في وظيفة ثابتة صافي مرتبي الشهري 3000 جنيه ولله الحمد والشكر ربنا رزقني بتوأم لسة مكملوش سنة

مشكلتي تتلخص في اني لا أملك من حطام هذه الدنيا والحمد لله غير مرتبي من شغلي وفقط، لا عندي ارض هبيعها مثلا ولا عربية ولا غيره فقط مرتبي لا اكثر ولا اقل

وساكن في شقة ايجار ب 1000 جنيه في الشهر وطبعا بالزيادة السنوية 100 كل سنة

مصاريف الحياة بتزيد والمسؤوليات بتزيد وكل حاجة في البلد بتولع نار ومفيش استقرار في اي حاجة

فكرت اخد شقة تمليك اشطب فيها حتى نص الصالون بتاعها وحمامها ومطبخها والم اسرتي وعفشي وكل حاجة واقعد فيها وبعد كدة ابقى اشطبها واحدة واحدة كل كام شهر مفيش مشكلة

لفيت كتير لاقيت انسب حاجة في منطقة متوسطة في عين شمس الغربية في عمارات على الشمال بعد منزل كوبري عين شمس على بعد خطوات من محطة المترو منطقة متوسطة ومعقولة منا مش عاوز اسكن اسرتي في منطقة لبش وقلق ومليانه ورش وسمكرية ونجارين والناس الي شغالة ليل نهار دي مبتراعيش الي نايم والي تعبان ولا غيره

اقل شقة تمليك هناك 150 الف جنيه اوضتين ورسيبشن وفي تقسيط، فكرت اروح اخد قرض من البنك اقصى ما يسمح بيه مرتبي 50 الف بعد ما سألت في دار الافتاء فقالولي طالما للسكن او العلاج ولضروريات الحياة فيجوز، رجعت سألت نفسي طب انا بعد كدة هسدد القرض ولا هسدد قسط الشقة نفسها ولا هصرف على اسرتي اكل وشرب ولبس وعلاج ومواصلات وخلافه ولا هشطب الشقة على مهلي ولا هعمل ايه، لقيتها بصراحة اتسدت في وشي وجاتلي حالة اكتئاب لأن ضغط المصاريف الشهري بيزيد فعلا مع الوقت

يارييت الي عنده افكار او طرق تكون غايبة عني ينصحني ويفيدني ايه الي ممكن اعمله لأني في موضوع شراء العقارات ده والطرق الي ممكن استفيد بيها اني اقدر احصل بيها على شقة مفهمش فيها اوي

ولكم جزيل الشكر

**ahmedteam** · 19-06-2013 10:59 AM

نصيحه بلاش قرض البنك و هتلاقى ربنا ميسرلك باب رزق تانى تجيب منه الشقه

**prof2013** · 19-06-2013 11:09 AM

اشتري ارض زراعيه رخيصه في المدن اللي بتتبني جديده وطلع تصريح مباني

**Dr.cairoky** · 19-06-2013 11:33 AM

طيب اقتراح ممكن ينفع :-

ما تحاول تدور على شقه إيجار قديم ....يعنى تدفع مبلغ مثلا حاولى 50 الف جنيه اللى بتفكر تاخده قرض

والنظام المتبع إنك بتدفع نصف إيجار الشقه من مبلغ ال 50الف دول لحد ما يخلصوا...وتقدر تسدد القرض برده

ده إقتراح من وجهة نظرى يعنى ممكن يفيدك

وربنا يفتحها عليك ويباركلك فى أولادك

**احمد المصرى** · 19-06-2013 11:54 AM

ربنا يعينك ان شاء الله

**new_man** · 19-06-2013 12:11 PM

ايجار قديم فى الهرم هتكون مناسبه ليك اوى
هناك الايجار القديم فى ابراج بأسانسير ومساحات مش اقل من 100 متر
ومعاك بقى من 25000 لو مش متشطبه
وب 50000 لو متشطبه
والاعلانات مغرقة الوسيط والنت
وروح وهتلاقى مناطق كتير

**corsair** · 19-06-2013 12:17 PM

بص يا بشمهندس انا من المنطقة دي والعماير دي قدام العماره عندي انتا تقدر تدفع مثلا 70 الف كاش وتاخدها ايجار قديم هيكون حوالي 300 جنيه شهريا حوال تتكلم مع المسئول هناك والله كانت في شقه جمب سنترال المطرية متشطبه بالكامل وفي عمارة جديدة ودور أول وكانت علي 90 الف بس انا علشان مبعرفش اقعد في شقه مفيهاش بلكونه فرفضتها في لقط واسئل متيئسش وانزل بردك علي شارع الخمسين علي جسر السويس ورا بافاريا هتلاقي هناك ال 100 متر ب 90 الف وتقدر تخلصها علي 80 لو فلوسك كاش بالنسبة لموضوع القرض بلاش الله يباركلك والله شوية حرامية وهتلاقيهم واخدين فوق ال 50 الف 25 الف فوايد علي ال 5 سنين وهتكره نفسك واليوم اللي خدت فيه قرض زي حالاتي حاول تدخل جمعيات وتظبط امورك منها وتستحمل كام سنه في ايجار جديد لحد بس ما تقدر تلم امورك وربنا يفتحها عليك وتلاقي الحاجه الكويسه اللي تريحك وتريح اسرتك الجمعيات احسن مليون مره من القرض علي الاقل مفيش فوايد ولا وجع دماغ وحاول زي ما قولتلك تسيبك من التمليك وتدور علي ايجار قديم اوفرلك

**Amr_MO** · 19-06-2013 12:21 PM

اشكركم جميعا على دعواتكم وعلى اقتراحاتكم جزاكم الله كل الخير

موضوع مصدر دخل تاني حاولت فيه لكن ملقيتش فيه نصيب لكن كانت المحاولة بتترفض لأنهم عاوزين حد متفرغ طول الاسبوع للوظيفة وده طبعا مينفعش لأن عندي وظيفتي الاساسية الي مينفعش اغيب فيها

موضوع الايجار القديم فكرت فيه برضه ولكن ناس خوفتني منه لأن فيه قوانين هتطلع بخصوص الايجار القديم وان ممكن اخد شقة ايجار قديم دلوقتي وبعد فترة تطلع قوانين او الدنيا تتغير وادخل في مشاكل مع صاحب الشقة وحاجات من دي

موضوع الاقامة مع اهلي او اهلها غير وارد خالص لأن حالهم يادوب على الأد فمفيش مجال خالص للموضوع ده بصراحة

اتمنى لو حد عنده خبرة اكتر او عارف مسالك الموضوع ده خصوصا مع البنوك يفيدني لأنها هتفرق معايا كتير اوي واشكركم كل الشكر مرة اخرى

**Amr_MO** · 19-06-2013 12:27 PM

المشاركة الأصلية كتبت بواسطة new_man

ايجار قديم فى الهرم هتكون مناسبه ليك اوى
هناك الايجار القديم فى ابراج بأسانسير ومساحات مش اقل من 100 متر
ومعاك بقى من 25000 لو مش متشطبه
وب 50000 لو متشطبه
والاعلانات مغرقة الوسيط والنت
وروح وهتلاقى مناطق كتير

الهرم وفيصل والجيزة عموما مستعبدة من تفكيري نهائيا لأنها بعيدة جدا عن شغلي، انا اروح الشغل من بنها هوصل اسرع من لو كنت في الهرم وبشكرك جدا على اقتراحك

-

الموضوع: المشورة والنصيحة بخصوص شراء شقة

LinkBack

أدوات الموضوع

عرض

-

-

-

المواضيع المتشابهه

محتاج المشورة فى شراء نيسان 2005ex

رجاء المشورة شراء سماعات دبل بيز

ارجو المشورة فى شراء لانوس 2008

اريد المشورة في شراء سيارة صغيرة بس قوية

أرجو المشورة والنصيحة وخاصة من أستاذ طارق

الكلمات الدلالية لهذا الموضوع

المفضلات

المفضلات

ضوابط المشاركة