سؤال بخصوص توكيل العربية ونقلها مرور اخر

**Karim_Monir** · 20-06-2013 05:15 PM

السلام عليكم
انا مشتري عربيتي بتوكيل من الرخصة مباشرة
فالتجديد هايخلص في رمضان
فطبعا محتاج اروح المرور قبل رمضان
فعايز اعرف الاجرائات ببساطة العربية مرور النزهة وهاوديها مرور الجحيم باسمي (مرور السلام)
عايز انقل العربية باسمي
كدة اكيد مش هاحتاج شهادة بيانات عشان الرخصة سارية
لكن هاهتاج شهادة مخالفات من مرور النزهة
ممكن بقي حد الله يكرمه يكتبلي التفاصيل عشان اجهز ورقي كلها وحاجتي عشان اعملها مرة واحدة واخلص

شكرا مقدما

**Ahmed_Adham** · 20-06-2013 06:07 PM

المشاركة الأصلية كتبت بواسطة nadernabil

أول حاجة تعملها تطلع على الشهر العقاري و تبيع العربية لنفسك هناك بموجب التوكيل اللي معاك و تدفع رسوم التسجيل طبعاً و هاتمضي مشتري

و بعدين تطلع شهادة مخالفات من مرور العربية الأصلي اللي هو النزهة في الحالة دي

تاخد بعضك و تطلع على السلام و تشتري ملف نقل ملكية و تعمل فحص و تخش على شباك نقل الملكية...

هاتدفع بعد كده الضريبة و تسلم نمرك القديمة و هايدوك نمر جديدة و رخصة جديدة بإسمك...و شكراً على كده

العملية دي كلها عملتها في 3 ساعات شاكب راكب بين مرور حلوان و الدراسة...معرفش السلام هايبقى إيه ظروفه

ربنا معاك و يوفقك :)

الخطوات دي مظبوطه بس انا لما نقلت عملت فحص تاني في المرور الاصلي بعد فحص المرور الجديد والاتنين على استماره واحده كانو بيمضو وبيختمو جنب اختام بعض. مش عارف ده العادي ولا كانت طالبه معاهم غلاسه معايا.

المهم ان لحد النهارده الملف مجاش أكتوبر مع اني ناقل من شهر 11 وباخد تصريح مره 3 شهور ومره 6 شهر. لما أشوف المره الجايه هلاقيه وصل ولا لاء...

**magyver** · 20-06-2013 06:20 PM

كلام الاساتذة صح
بس ضيف عليهم هاترفع بصمة من مروور النزهة وهتطابقها في السلام

**mahmoud85** · 20-06-2013 06:42 PM

انا لسه بنقل عربيتي من مرور العجمي لمرور الدقهليه
عملت العقد في الشهر العقاري
رحت للمرو اللي تبعه وطلبت نقل ملكيه وقولتلهم العربيه من مرور تاني اشتريت ورقه لمطابقه البصمه
دخلت عالمهندس علي طول رفعلي البصمه (رقم الموتور والشاسيه ) وكتب في ضهر الورقه طلب لمرور العجمي بالمطابقه
رحت العجمي المهندس هناك طابق البصمه من واقع الملف وعملت استعلام امني علي ضهر الورقه برضو وختمت كل ده بختم النسر
زياده بقا طلعت شهاده بيانات عشان الرخصه منتهيه ودفعت ضريبه سنه هناك
المرور بتاع العجمي كان اتحرق ايام الثوره وعشان اطلع المخالفات دايخ والسبب غباء موظفين
باختصار الاجراءات الصحيحه في الحاله دي اني اروح للعجمي (المرور الاصلي للساره ) اعمل استعلام عن الرقم القديم واجيب اصل الرقيم القديم من مكتب اللوحات ودي مهمه جدا لانها رجعتني مره تانيه من المنصوره للاسكندريه
وبعدين طلعت علي مرور ابيس ثم مرور المديريه القديمه ودول اللي مرور العجمي اتنقل مخالفاته عليهم

واحد زميلي خلص الحوار ده في ساعتين لان عربيته كانت تبع النزهه

اي ورقه تطلعها او تمضيها من هناك لازم تختمها ختم النسر سواء من مرورك او النزهه
شهاده المخالفات لازم تتختم بختم النسر برضو والا هترجع او تدفع

**NaderNabil** · 20-06-2013 06:48 PM

اعتقد ان موضوع الفحص في المرورين صح...

انا كنت بانقل ملكية من و إلى نفس المرور...فبالتالي مامشيتش في القصة دي

**assaf** · 20-06-2013 06:58 PM

بص في حركه انا عملتها وفرت انك تعمل تصريح مؤقت 3 شهور . اني سلمت النمر والرخصه و شهاده المخالفات للمرور الاصلي و خليت المرور الاصلي كتب لي في شهاده البيانات غير مطالب بشهاده المخالفات ولا اللوحات ولا الرخصه . الحركه دي قالي عليها ظابط المرور و كدا خدت الرخصه مباشره مش تصريح 3 شهور و مستنتش الملف

**ENG\AHMED** · 20-06-2013 07:09 PM

واضح كده ان كل مرور ماشى بمزاجة لأن الاجراءات مختلفة
لما كنت بنقل الملكية كل اللى جبتة من المرور القديم شهادة المخالفات لأن مدتها كانت انتهت وروحت على المرور بتاعى نقلت وفحصت واستلمت نمر وشكرا

فى التجديد كان وقت اضراب النيابة وكانت نيابة الدراسة بس اللى شغاله روحت علشان اجيب شهادة مخالفات من الدراسة قالى عايزين النمر القديمة "ملاكى جيزة" ....
ودى اجيبهالك منين؟؟؟ ..... من مرور الجيزة
طيب ادخل لوكيل النيابة يميبن شمال مفيش فايدة , ياعم هو انا شوفت ام النمر دى على العربية اصلا "العربية واخدها بحروف وارقام" مفيش فايدة بتتعامل مع عبده البيروقراطى
طيب اروح مرور العجوزة ودخلت للعقيد اللى ماسك الوحدة يقولى المرور اتحرق فى الثورة ومقدرش اعرف النمر القديمة والنيابة عندهم تعليمات ان مفيش نمر قديمة من مرور العجوزة واى مرور اتحرق
طيب ارجع للدراسة اتكلم مع وكيل النيابة يقولى لأ انا عايز ورقة رسمى منه تقول الكلام ده .... قبل ماشتم قلتله انا غلطان اللى جتلكم اصلا وعنها ماتجددت وسيبته ومشيت
ومشيت بها فترة طويلة منتهية بعد فترة السماح لحد لما رجعوا اشتغلوا تانى وروحت المرور بتاعى وطلعت الرخصة فى 20 دقيقة ومن غير نمر قديمة ولا الكلام الفاضى ده !!!!!

**ENG\AHMED** · 20-06-2013 07:20 PM

المشاركة الأصلية كتبت بواسطة eng\ahmed

واضح كده ان كل مرور ماشى بمزاجة لأن الاجراءات مختلفة
لما كنت بنقل الملكية كل اللى جبتة من المرور القديم شهادة المخالفات لأن مدتها كانت انتهت وروحت على المرور بتاعى نقلت وفحصت واستلمت نمر وشكرا

فى التجديد كان وقت اضراب النيابة وكانت نيابة الدراسة بس اللى شغاله روحت علشان اجيب شهادة مخالفات من الدراسة قالى عايزين النمر القديمة "ملاكى جيزة" ....
ودى اجيبهالك منين؟؟؟ ..... من مرور الجيزة
طيب ادخل لوكيل النيابة يميبن شمال مفيش فايدة , ياعم هو انا شوفت ام النمر دى على العربية اصلا "العربية واخدها بحروف وارقام" مفيش فايدة بتتعامل مع عبده البيروقراطى
طيب اروح مرور العجوزة ودخلت للعقيد اللى ماسك الوحدة يقولى المرور اتحرق فى الثورة ومقدرش اعرف النمر القديمة والنيابة عندهم تعليمات ان مفيش نمر قديمة من مرور العجوزة واى مرور اتحرق
طيب ارجع للدراسة اتكلم مع وكيل النيابة يقولى لأ انا عايز ورقة رسمى منه تقول الكلام ده .... قبل ماشتم قلتله انا غلطان اللى جتلكم اصلا وعنها ماتجددت وسيبته ومشيت
ومشيت بها فترة طويلة منتهية بعد فترة السماح لحد لما رجعوا اشتغلوا تانى وروحت المرور بتاعى وطلعت الرخصة فى 20 دقيقة ومن غير نمر قديمة ولا الكلام الفاضى ده !!!!!

بالمناسبة استلمت رخصة على طول مش تصريح

**a_arazik** · 21-06-2013 09:06 AM

بص يا باشا انا عملت الحوار بتاعك دة بالظبط عربيتي كنت شاريها بتوكيل وحبيت انقل الملكية واخلص اجرائتي اول حاجة هتطلع علي الشهر العقاري وتعمل عقد مسجل باسمك تاني حاجة هتجيب شهادة مخالفات للعربية من المرور التابع لية تالت حاجة هتطلع علي المرور اللي انتا تبعة وهتخش علي الفحص طبعا تفحص وتخلص كل حاجة معاهم من طفاية ومثلث واسعافات اولية وبعد كدة هتجيب دوسية وطوابع ورق تجديد طبعا لو مفيهاش وقت علي التجديد وتطلع علي الشباك وتسلم الورق وتستني حوالي نص ساعة وتستلم الرخصة بس طبعا هما من بعد الثورة مش بيسلمو رخصة علي طول بيسلمو (تصريح لمدة ثلاثة اشهر لحين ورود الملف من المرور التابع لية )
لو طبعا زي ما عملو معايا الملف مجاش بعدد ثلاثة اشهر هيدوك تصريح تاني لمد سنة بس طبعا لو عاوز تخلص ممكن تدي الموظف قرشين وقولة اعملي رخصة علي طول انا محبتش اعمل كدة وشكرااااااااااااااا ويارب اكون افدتك

الموضوع: سؤال بخصوص توكيل العربية ونقلها مرور اخر

LinkBack

أدوات الموضوع

عرض

سؤال بخصوص توكيل العربية ونقلها مرور اخر - انشر الموضوع فى :

-

-

-

-

المواضيع المتشابهه

سؤال بخصوص عمل توكيل من عقد مسجل...

سؤال هام وعاجل بخصوص توكيل السيارة

سؤال بخصوص مرور شبرا الخيمه ( قليوبيه )

استفسار رفيع بخصوص نقل العربية من مرور لمرور

سؤال بخصوص غبور و توكيل مازدا

الكلمات الدلالية لهذا الموضوع

المفضلات

المفضلات

ضوابط المشاركة