الموضوع: تكييفات بتكنولوجيا انفيرتر

سامسونج برضه تكييفاتها بنظام الانفرتر على ما أتذكر - دي كانت اول مرة اساسا اسمع عن حد مستخدم التكنولوجيا دي في مصر

وأعتقد lg هاتبقى نفس النظام - بس مش متأكد

المشاركة الأصلية كتبت بواسطة lonedoctor

معلش اخى الكريم ممكن تستوثق من المعلومة لان شركة دايو افلست عام 2002 وضحكوا علينا بموديلات اخرها 2007 فى مصر

يا فندم حوار شركة دايو ملوش علاقه بالتكنولوجيا بتاعة الكومبريسور لان دة موجود فى كل اللانوس و النوبيرا من عام 1998 و بعدين هو تم بيع دايو لجنرال موتورز و الموديلات من بعد 2002 موجود عليها علامة دايو لانها كلها تجميع مصرى.
فكرة استخدام جنرال موتورز لعلامة دايو بيعتمد على البلد اللى بيبعو فيها عربياتهم . يعنى على سبيل المثال شيفروليه كروز بتنزل بعلامة دايو لحد دلوقتى فى بلاد معينه.

المشاركة الأصلية كتبت بواسطة hazemhany

بص يا باشا فكرة الأنفرتر زي ما حضرتك تفضلت وشرحت بالظبط وهي انه بدل مبيشتغل اون و اوف بس ..لأ هوا شغال علطول بس بسرعات مختلفة تعتمد ع الحمل الحراري الواقع ع جهاز التكييف واللي بيتم تحديده بناءا ع حساسات موجودة ف الوحدة الداخلية والخارجية ..وطبعا انه يشتغل ع سرعات مختلفة ده بيوفر جامد جدا في استهلاك الكهربا..

طريقة عمله بقي ان الجهاز ده بيقوم بتحويل التيار المتردد اللي جايله ac الي تيار مستمر dc وده بيديله القدرة انه يغير من تردده وبالتالي تتغير فولتيته ع حسب الحمل الحراري وبناءا عليه تتغير سرعة دوران ال rotor بتاع الكباس.. طبعا السيستم ده معقد جدا ومختلف تماما عن كنترول الأجهزة التقليدية وده طبعا مسمع في سعر الجهاز اللي بتلاقيه اغلي بكتير من نظيره التقليدي بس في المقابل انت بتوفر في استهلاك الكهربا بشكل كبير مش اي كلام يعني ..يكفي اني اقولك انك لو بنتكلم عن جهاز 1.5 حصان عادي هتلاقيه متوسط استهلاكه حوالي 230 كيلو وات ساعة شهريا ع متوسط تشغيل 6 ساعات يوميا بينما ع جهاز 1.5 انفرتر هتلاقيه بيستهلك 180 كيلو وات ساعة شهريا بس يعني انت بتتكلم ع توفير حوالي 25% من فاتورتك الشهرية ...لما حسبوا ال payback period بتاعت الجهاز ده لقوها سنتين بس يعني حضرتك هتسترد قيمة جهازك بالكامل بعد سنتين فقط من ناتج توفيرك في فاتورة الكهربا ..فالفكرة انت بتدفع كتير دلوقتي بس هتوفر كتير اوي في المستقبل.

الجهاز موجود في السوق المصري من كاريير باسم xpower وواحد تاني ميديا مش فاكر اسم موديله والأتنين بضمان ميراكو ...

الله ينور عليك انت كده وضحت كل اللى كنت بحاول اقوله.
على العموم انا كلمت كاريير اسأل على السعر لقيته فى موديل واحد من ميديا و اخرة 2.25 حصان و تمنه 7300 بجد بيستهبلوا.
و كمان كلمت باناسونيك و سألتهم لقيته بـ 6600 و طبعا اكيد باناسونيك افضل بكتير و فرق تمنه كدة عن الشارب اعلى موديل 1000 جنيه اللى يعتبر من وجهة نظرى فرق مقبول مقابل تكنولوجيا افضل و توفير كهرباء.

طيب ماهو سامسونج اسم بيجمع بين الميزتين - متواجد بقاله فترة في مصر - كوري - ومازال بيزرع اسمه ومركنش زي كاريير

المشاركة الأصلية كتبت بواسطة hazemhany

يا استاذي الفاضل مهو ال 700 جنيه الفرق ما بين باناسونيك وكاريير ده نظير انت واخد براند موجودة في السوق المصري من سنين وليهم مراكز خدمة وقطع غيار متوفرة انما تقدر تقولي في كام جهاز تكييف باناسونيك في مصر ؟! وكام جهاز انفرتر ؟! ..هو ده المعيار بالنسبة لك ..ده رأي بصراحة

يا فندم هو اصلا مش كاريير دة ميراكو ميديا و ميراكو اصلا واخدة اكتر من توكيل منهم كاريير و ميديا و توشيبا و ميديا كنوع ولا ليه اى اسم و كمان خدمتهم بقت سيئه جدا و الخامات مش قد كدةو كمان متجمع فى مصر.
الباناسونيك بقى دة مستورد بالكامل و كمان اسم عالمى ممتاز و الجهاز عليه ضمان 5 سنين ضمان شامل.

المشاركة الأصلية كتبت بواسطة sh_sunsea

طيب ماهو سامسونج اسم بيجمع بين الميزتين - متواجد بقاله فترة في مصر - كوري - ومازال بيزرع اسمه ومركنش زي كاريير

طب هو حد يقدر يأكد حوار ان سامسونج انفرتر ولا عادى يعنى لو حد عندة التكييف و كمان لو حد يعرف تمنهز