الموضوع: محتاج نصائحكم لسة متعلم سواقة قريب !

السلام عليكم اولا :)
ثانيا .. انا متعلم سواقة تقدرو تقولو كدة مثلا بقالى 6 شهور تمام ؟؟ اوك تمام
نزلت اتعلمت فمدرسة قيادة من 4 شهور تقريبا حوالى 6 حصص وكنت فالحصة السادسة بسوق تمام جدا ومفيش اى مشكلة .. المشكلة انة خلانى اسوق (فى طرق سريعة يعنى مش فرعية ) وخلانى اخش على ميادين كتير وطبعا انتو عارفين زحمة الميادين والى جايلك يمين وشمال وكدة .. فكنت ببقي خايف جدا وانا داخل على الحاجات دى وببقي حاسس برهبة برضو لانى بسوق فطرق سريعة او بمعنى اصح (رئيسية) وانا لسة بتعلم فتانى حصة تقريبا ... قولت ماشي مش مشكلة ... جيت قولت لوالدى عاوز اطلع رخصة .. فنزل معايا حوالى 4 مرات وخلانى اسوق العربية (المانيوال) وهو قاعد جمبي بس المشكلة برضو اننا كنت بنسوق فطرق سريعة وجة فرابع مرة خلانى اسوق (عالمحور) انا طبعا ماكنتش عاوز اقولكم مدى القلق الى كان مسيطر عليا وانا طالع الكوبري ... المهم روحت طلعت الرخصة ومن بعدها ماسوقتش العربية خالص من 4 شهور الا مرة واحدة كنا رايحين هايبر وان وكان قاعد جمبي برضو وطبعا بيوترنى جدا وانا سايق ( خلى بالك العربيات * خلى بالك المطبات * خلى بالك من الخ الخ الخ الخ ) ... فانا دلوقت بقالى 4 شهور مبسوقش بس انا سواقتى مش وحشة يعنى نوعا ما كويسة بس ببقي مخنوق وفى حد معايا فالعربية بيوجهنى يعنى نفسي انزل بيها لوحدى وحاسس ان الخوف بتاعى دة هيروح بمجرد ما انزل بيها مرة او مرتين لوحدى عشان ببقي فدماغي حاجة مثلا وبابا فدماغة حاجة تانية فبيلغبطنى (بالبلدي) وممكن اغلط ... من كام يوم نزلنا نشتري عربية جديدة وطبعا روحنا بالعربية بتاعتنا (كيا موتورز الى بعد كارفور الصحراوى وانا من سكان 6 اكتوبر ) .. المهم واحنا راجعين كدة هيبقي معانا عربيتين فبابا اقترح انى اسوق المانيوال وهو يسوق الجديدة (بصراحة فرحت جدا بس كنت خايف شوية لان الصحراوى طريق سريع ومسوقتش علية قبل كدة ) بس والدتى موافقتش وقالتلة لا مايسوقش لوحدة عالطريق دة وبعد عناء انا ووالدى فاقناعها اضطرينا نجيب سواق للعربية الجديدة عشان نروح بيها البيت ... فانا مش عارف اعمل اية ! تفتكرو انزل اتعلم سواقة تانى ؟؟ ولا اعمل اية بجد مش عارف انا داخل ف 4 شهور مش بسوق ووالدى من النوع الحريص جدا على العربية فلما بقولة عاوز اخدها يقولى لسة شوية ومش عارف اية ... فانتو تنصحونى باية ؟؟ وتنصحونى باية فموضوع الرهبة دة ؟؟ ... وغير طبعا انى معرفش اعمل حاجة مع العربية لو حاجة فيها عطلت بالبلدي يعنى مخدتش غير حصة واحدة ميكانيكا ومفهمتهاش اوى .. فانزل اخد حصة ميكانيكا عن العربية ولا اية ؟؟ ... واسف انى طولت عليكم وشكرا :)

المشاركة الأصلية كتبت بواسطة sam4ever2010

سوق لوحدك وشغل اغانى وعلى الصوت وعيش حياتك بس متجريش بسرعة زيادة وسيبك من الغرز والكلام الفاضى ده عشان خطر واعمل كل اللى نفسك فيه بس كله الا ابوك هيقعد جنبك مش هتعرف تعمل اي حاجة ولو بطل العالم فى السواقة ابوك هيخليك تنسى البنزين فين والدبرياج فين ... انا بسوق بقالى سنين ... اول ما ابويا يركب جنبى بيحسسنى انى ومليش فى السواقة واى مطب يقولى حااااسب ولو عربية كسرت عليا يبقى انا اللى غلطان وحاجات كتييييييييييييير ما علينا ...
زى ماقولتلك سوق لوحدك وحس بمتعة السواقة ومش هتحسها فعلا غير بعربيتك اللى شاريها على حسابك من مالك الخاص مش بتاعت ابوك لانه هيخاف عالعربية اكتر ماهيخاف عليك
اسأل مجرب !!!

هههههههههههههه فعلا بيجيلى نفس احساسك دة وهو قاعد جمبي بحس انى فالطراوة خالص :d
انا بفكر اشيلى مبلغ على جمب واجبلى عربية 27 صغيرة ولا حاجة وبفكر فالموضوع دة كتير فعلا