الموضوع: انشاء مكتب استيراد

اول شئ هتشوف محاسب قانوني كويس يبدأ يعملك ورق الشركة وخليه يضيفلك كل ما يستطيع من انشطة تجارية على الورق عشان اما تحب تتوسع في المستقبل الدنيا تمشي وما يحصلش مشاكل في اضافة أي نشاط بعد كده

المفروض في شغل الإستيراد حاجة من إتنين يا إما بتكون عارف سوق معين وهتجيب حاجة السوق ده محتاجها وعليها طلب كبيير ويكون عندك علاقة كويسة بتاجر او اتنين في السوق ده بحيث يشيلولك المنتج ده وهما يسوقوه في السوق بمعرفتهم.. بتنزلهم البضاعة آجل على 3 شهور مثلا او حسب دورة رأس المال اللي انت محددها للمنتج ده

او الطريقة التانية انك جايب منتج جديد خالص محدش نزله قبل كده وعاوز تعمله سوق ولا اخفيك سرا ان الموضوع ده اصب بمراحل في التسويق لأنك هتبذل جهد مضاهف.. تسويق الأول وبعد كده مبيعات وده هياخد وقت وفلوس وجهد ولازم تبقى حاسب الموضوع صح قوي عشان ما تخسرش كتير في الأول.. التسويق بقى شغلانة مش سهلة ومش صعبة لكن يفضل تجيب ناس تشغلها في الحكاية دي يكونوا بيفهموا ومعاهم خبرة او شهادات في المجال ده
بعد ما تاخد فترة التسويق حقها خربدأ تنزل بنفسك او شريكك للتجار اللي سوقت عندهم منتجك وتبدأ مفاوضات الإقناع بالشراء ولازم في الأول تديله ميزة يحس انه عاوز المنتج ده عشانها مثلا سداد بالآجل على فترة كبيرة أو سعر مميز يطلعله منه بمكسب كبير أو هدايا مثلا على الطلبيات يعني مع كل 100 قطعة 10 قطع هدية او خصم كل ما حجم المشتروات يزيد إلخ إلخ

وتبتدي واحدة واحدة هتلاقي الدنيا بتمشي بطيئ في الأول لكن بعد ما يبقى في ثقة كتبادلة بينك وبين تجار السوق هتلاقي العجلة بدأت تدور اسرع وتبدأ تدوس بقى

نصيحة اوعي تبقى داخل أي سوق بنظرية اضرب واجري ودور على حاجة تانية.. الطريقة دي صحيح ممكن يكون مكسبها حلو لكن بعد فنرة من الزمن هتلاقيك معملتش أي سمعة ولا وضع في أي سوق ولما تخب ترجع تدخل سوق كنت عملت فيه ابحركة دي قبل كده التجار هيلبسوك جامد وهتخسر كتير

دي شوية كده من عصير خبرة 7 سنين ول' عندك اي استفسار انا تحت امرك يا جميل

المشاركة الأصلية كتبت بواسطة moody_687

الامر لله وحده ربنا يكرمك ياباشا
طيب دلوقتي انا عايز اعرف الموضوع ده هيتكلف كام من ناحية انشاء المكتب وازاى التسويق هيتم لو منتج جديد ايه هى انواع التسويق

بالنسبة لورق الشركة اعمل حسابك في 5 الآف ممكن يزيدوا او يقلوا عن كده وده حسب المحاسب القانوني اللي هتتعامل معاه

في مصاريف تأسيس للمكان نفسه دي تتكلف في حدود من 30 الف وانت طالع عشان لازم تجيب كمبيوتر محترم وفاكس محترم ومكاتب ولو هتجيب تكييفات. . إلخ

التسويق حسب المنتج اللي أنت جايبه أنت اللي تحدد هل أنت مستهدف المستهلك النهائي مباشرة وفي الحالة دي التسويق مختلف تماما عن لو مستهدف فئة تجار الجملة مثلا

عموما اظن في حالتك انت مستهدف تجار الجملة فببساطة ممكن تنزل بنفسك تتعرف على التجار وتقدملهم نفسك إنك فلان الفلاني صاحب مكتب كذا للاستيراد وتبدأ تعرض عليهم بضاعتك ولازم تكون مسعر الحاجة بتاعتك كويس عشان محدش ياكلك في الكلام ويقولك مثلا لا ما تستاهلش السعر ده او ده لسه واحد عارض عليا بسعر نص السعر بتاعك إلخ.. لازم تكون عامل استقراء كويس للسوق وعندك معلومات عن سعر الحاجة المنافسة للي اللي انت منزلها

طبعا بعد ما تتفقوا هتنزل البضاعة بالآجل على 3 شهور مثلا وده عشان تعرف تلم سيولتك تاني والافضل تكون عامل حسابك انك قبل ما تخلص دورة الفلوس الاولانية تكون مربط على شغل جديد بحيث تنزله قبل ما الفترة دي تخلص وهكذا

طبعا في تفاصيل كتير هتكتشفها بنفسك وأنت شغال وخبرات هتكتسبها من السوق وحاول تقرأ كتير عن موضوع التسويق او تاخد دورة في اي مركز تنمية بشرية

يارب اكون قدرت افيدك