الموضوع: عايز اعرف الاخطاء اللي بقع فيها

المشاركة الأصلية كتبت بواسطة yahiaashraf

أنا بسوق من و انا فى تانيه اعدادى و سوقت فى الاول مانوال طبعا
واخدت بالتدريج حاجه حاجه لغاية لما وصلت انى اطلع على طرق سريعه و طرق سفر و بعرف اسوق عادى جدا خالص


وغلط انى ابتدى اسوق اوتوماتيك
لان الامتحان هيكون على عربيه مانوال

تمام
لاني دخلت هنا حسيت اني في حاجات بعملها غلط مع اني بسوق كويس الحمدلله

وبالنسبة للاوتوماتيك
انا اصلا لما طلعت الرخصة مكنتش بعرف اسوق مانيوال اتعلمت قبليها بساعة ازاي اجيب اول واجيب مارشيدير وكانت العربية ماروتي فساعدتني

يا ريت حد يفيدنا

اولا : انا مش من الناس اللي عندها خبرة كبيرة في السواقة و الاجابات بتاعتي تحتمل الخطا و الصواب .. بس انا حرد علي الاسئلة من واقع خبرتي القليلة و المعلومات اللي انا استفدتها من الاعضاء هنا

المشاركة الأصلية كتبت بواسطة night-knight

السلام عليكم
وعليكم السلام
الاول بس انا عايز اقول اني بسوق فيرنا 13 مانيوال بقالي 3 اشهر تقريبا بس من غير ادخل مدرسة تعليم

خبرتي السابقة كانت اني سقت اوتوماتيك برة مصر (الكويت) ما سقتش غير شهر او اقل ومشاوير صغيرة جدا وكمان الشوارع واسعة وفاضية عن مصر

وجيت سقت في مصر بالتدريج اتعودت تقريبا على الوضع في مصر بس مكنش في حد جنبي ليه خبرة يعرفني لو بعمل حاجة غلطة انا ممكن افتكرها صح

الاول قبل ما اسأل احب اقول للناس المترددة : جمد قلبك وخلي عندك ثقة في نفسك وخلي بالك وانت هتسوق كويس ان شاء الله وطول ما انت حذر وفي نفس الوقت مش متردد زيادة عن اللزوم هتسوق ان شاء الله ومفيش مشاكل
وبالنسبة لتعلم المانيوال الموضوع سهل جدا سواقين الميكروباصات عندنا اطفال عندهم 13 و 14 سنة وبيسوقوا عادي جدا


عندي بقى اسألة:

1: اول حاجة بشكل عام ايه الاخطاء اللي ممكن اكون بعملها وانا مش عارف او لازم حد يكون جنبي عشان يلاحظها؟
مش عارف اصل الاخطاء بتختلف من شخص لشخص بس ده بعضها :
*عدم النظر في المرايات و خصوصا الجانبية
*عدم السير في خط مستقيم
*توسع الطريق للي علي يمينك بانك تدخل شمال من غير التاكد من خلو الحارة الشمال
*الالتزام "بقدر الامكان" بالحارة المرورية (لما تلاقيها يعني)
*الخروج المفاجئ من الشوارع الجانبية
*المشي بسرعة قليلة علي الحارة اليسري
*عدم استعمال الاشارات
2: المفروض الطبيعي بليل اكون مشغل النور الوسط اللي هو العادي ليه بقى بلاقي احيانا سواق تاكسي يقولي النور؟ طيب ما انا لو قللته هبقى مش منور قدامي اصلا؟
بعض العربيات النور العادي مش بيفرش كويس علي الارض او بيدايق اللي جاي قدامك ... خصوصا لو راجل عجوز .. من وجهة نظري قدامك 3 حلول
1-فيه ناس بتعتمد علي نور "فوج" عشان هو بيفرش علي الارض
2- انك تحاول تبعد عن الخط الفاصل بين الحارتين ..اقصد انك لو في الحارة اليمين خليك قدر المستطاع اقصي اليمين . (بس برضو ممكن يدايق ناس )
3- انك لما تلاقي حد "بيرعش" النور ابقي اطفي النور لحد ما هو يعدي و بعدين افتح النور تاني (بس اوعي ده يشغلك عن الطريق )

3: نصايح بخصوص السواقة بليل بشكل عام؟ لان الدائري بليل بيبقى صعب شوية
*مش لازم تمشي بسرعة عالية
*بلاش الحارة اليسار (طالما اتفقنا اننا مش حنمشي بسرعة عالية لحد مانتعود)
*بلاش غرز
*بلاش تفادي حد من علي اليمين لان انت مش حتبقي شايف فيه ايه في اليمين
*التاكد من سلامة جميع الانوار و الاشارات
*استخدام الاشارات مع كل مرة نغير الحارة المرورية
*ترك المسافة الامنة بينك و بين العربيات اللي قدامك
*لو الطريق اول مرة تمشي فيه شوف عربية ماشية بسرعة مناسبة و امشي وراها بشوية و تابع لما يهدي و ساعتها حتعرف لو فيه مطبات او حفر (فيه ناس ممكن تدايق او تخاف او تحس انك قاطرهن "خصوصا البنات " فلو حتعمل بالنصيحة ده تابع كذة عربية في الطريق ماتمسكش عربية واحدة )
*مش مستحب تمشي جنب التريلات
*الغرز مش مستحبة
4: في اليوتيرن الف على الواسع ولا على الضيق؟
ممكن الاراء تختلف ..بس من رايي لف علي الديق عشان لو علي الواسع حتلاقي نفسك بتكسر علي العربيات اللي بتلف معاك و كمان عايز تاخد بالك من اللي ماشيين في طريقهم

5: يحصل ايه لو غيرت غيار بدري او متأخر؟ يعني لو انا ماشي على التاني والعربية سرعتها 40 ولا 50 ده وحش عشان ال rpm بيعلى والموتور بيزعق.
طيب العكس بقى؟ لو انا سرعتي 20 بس على الغيار التالت؟ هل ده غلط على الموتور برضه؟
احسن حاجة انك تنقل علي اللفات المتوسطة للrpm طالما مش عايز تحرق .. لان اللفات العالية فيها حرق زيادة علي الزيت و النقل علي لفات قليلة تسبب كسر الشنابر .. بس برضو لازم الموتور يطلع شوية لrpm عالي عشان ماتلاقيهوش مخنوق ..بمعني ان كل حاجة لازم تكون بعقل
وراجع الموضوع ده :http://www.nilemotors.net/nile/329379-rpm.html

6: لو انا على الخامس بسرعة 80
وعايز افرمل ل 15 بفرمل لحد 15 بالغيار الخامس عادي وبعد كدة امور واجيب الاول؟ ولا امور الاول؟
المهم انك تعرف انك لو عايز الفرملة تكون بسرعة يبقي خليك معشق و انت بتفرمل لانك لو مورت العربية بتحسها زودت سرعتها نسبيا .
انا عن نفسي بفرمل و بعدين بنقل لو سرعة عالية و مش عارف انا حنزل لسرعة كام (معظم الوقت)
انما لو ماشي بسرعة و عارف اني نازل جامد زي المثال ده مثلا بامور ابلها بشوية و اسيب العربية ماشية بالقصور الذاتي و رجلي علي الفرامل عشان اظبط السرعة لحد ما توصل 15 و اجيب الثاني
اقصد من السؤال ده الفرامل بتفرمل العجل طيب ايه اللي بيفرمل المحرك او يهدي سرعة دورانه او ايه اللي بيفرمل التروس اوي بيهدي سرعة دورانها؟ وايه موضوع الغيار العكسي؟
بصراحة مش فاهم السؤال او مش عارف اجاوب عليه و لاكن لو بتسال علي "engine brake" راجع الموضوع ده
http://www.nilemotors.net/nile/209530-a.html
7:للأسف العربية حكت مني كذا مرة في المطبات وانا قلقان ليكون في حاجة حصلت من تحت قريت ان العربية مصفحة من تحت بس برضه قلقان
اظن طالما الحمد لله مفيش اصوات غريبة او "طقطقة" يبقي خلاص .. و ساعة ما حضرتك حتربط زوايا مثلا الراجل حياخد بالو لو فبه حاجة.
بس برضو فيه حاجتين عايز اقلهم
*لو فيه حمولة في العربية او هي منخفضة .. خد المطب بسرعة هادية و بميل "طبع علي حسب الطريق"
*لا قدر الله اتحكت او اتخبطتت في مطب (عشان بيبقو مطبات في حتت غريبة) ممكن برضو نظرة بالعين من تحت العربية و التاكد ان مفيش حاجة مش في مكانها او حاجة مكسورة .. و كمان متابعة صوت العادم
8: في حالة لقيت قدامي مطب فجأة ادوس فرامل على الاخر وافضل دايس على الفرامل وانا باخد المطب ولا افرمل قبليه بس حتى لو العربية ما وصلتش لسرعة بطيئة؟
فرمل لحد قبل المطب علي طول و بعدين سيب الفرملة ايا كانت السرعة .. تطير احسن ما تطلع علي المطب و تتهبد
كمان خد بالك ان في حالة ان الفرملة مستعملة المساعدين الاماية بيكون عليها حمل جامد فمش كويس انها كمان تتلقي صدمة المطب
9: معرفش كتير عن ميكانيكا السيارة وتغيير العجل وكدة ومعرفش لو لا قدر الله العربية عطلت مني هرفع اتعامل ولا لأ
تابع مواضيع المثبتة في المنتدي و اسال علي اللي حضرتك عاوزه .. الاعضاء هنا في غاية الاحترام و بيجاوبو علي كل الاستفسارات و بيحيوا الخير لبعض بجد

[sor2]http://gyazo.com/f832b1e442a81de3ffc875a3326ef6ba.png[/sor2]

تكملة اجابة الاسئلة اللي موجودين في اخر الموضوع (معلش زمانك زهقت مني)
1- الزوايا الميتة
*حاول تظبط المرايات الجانبية بحيث انها تظهر اخر حتة في السيارة و بقيتها تبين الشارع
*اوعي حتي لو بصيت في المرايا و لقيتها فاضية تنقل من اقصي اليمين لاقصي الشمال او العكس براحة وواحدة واحدة ممكن تظهر عربية او ممكن الراجل يحس ان حضرتك مش واخد بالك منه فيستعمل الكلاكس
*خلي ودنك مع الشارع فحتي لو فيه عربية و مش باينة حتحس بصوت جنبك
*لو الطريق سريع و عايز تلف بسرعة يبقس نظرة سريعة جدا من فوق كتفك لورا "بطرف العين" للتاكد من خلو الطريق
2-النور العالي في الطريق المقابل
برعشله نور و امري الي الله .. و ممكن كمان تهدي البنزين "شوية عشان اللي وراك " بحيث انك تزود المسافة بينك و بين اللي قدامك فيبقي فيه فرصة لتفادي اي مشكلة ممكن تحدث في الوقت اللي مش شايفين من النور اللي قدامنا
3-حفرة وانا علي 100
*علي حسب الطريق لو فاضي و اقدر افادي الحفرة "بس لف الدركسيون براحة عشان العربية ما تتقلبش لا قدر الله"
يبقي حفاديها
*لو مافيش حد ورايا و اقدر افرمل واسيب الفرملة قبل الحفرة يبقي ماشي
*لو حاخد الحفرة علي سرعتي و ماقدرش اهدي و لا افاديها يبقي بمسك الدركسيون كويس و بحاول قدر الامكان اخلي العجلة علي اطراف الحفرة مش لازم انزل في الحفرة يعني .. وربنا يستر طريقنا
4-الشبورة ام المطر اكثر خطرا
برضو اظن تختلف من شخص لشخص
بس من وجهة نظري الشبورة الجامدة اخطر .. الاثنين ليهم احتياطات يجب الالتزام بها . و لكن المطر علي الاقل انت شايف و لو ملتزم بالاحتياطات يبقي ان شاء الله مافيش مشاكل
انما الشبورة ولا انا شايف و لاغيري شايفني
و في كلتا الحالتين ستر ربنا هو الاهم .. و كلاهما خطر و تذكر ان اخطاء الاخرين تمس سلامتك برضو
5- كاوتش خلفي ضرب و انا علي 100كم/ساعة

8-كاوتش امامي ضرب و انا علي 100 كم/ساعة

الله اعلم ..اهم حاجة تاخد بالك من هدوء اعصابك و بلاش اي ردود فعل سريعة . و راجع الموضوع ده:
http://www.nilemotors.net/Nile/233269-a.html

6- الازاز ضرب و انا علي سرعة 100كم/ساعة
مش عارف سؤال صعب بصراحة .. بص لو مجرد سرطان و مجاش فوشي و انا لسا عايش .. يبقي حهدي و اركن في الحارة اليمين باسرع م يمكن
انما بقي لو جه في عيني (وقع عليا) يبقي لا اظن ان ممكن اعمل غير اني افتكر وضع الشارع لو فيه حد ورايا يبقي انتظار و اهدي لحد لما اقف .. ولو مافيش حد يبقي حفرمل و اقف باسرع م بمكن
*و في كلتا الحالتين لازم تمسك الدركسيون عشان العربية ما تحدفش .

7- الترتيب من الاقل خطورة للاعلي خطورة اثناء المرور بجانبها
اعذرني بس برضو سؤال يختلف بالنسبة للاراء و ده رايي
1-ملاكي
2-سيارة تقودها امراة ( مع ان ده عربية ملاكي .. و فيه سيدات بيسوقو حلو جدا "بس للامانة مش كتير يعني")
3-دبابة (مش عارف قصدك عربية Chevrolet ولا دبابة بجد . بس في كلتا الحالتين مكانها هنا طالما مش مسروقة )
4-ميكروبص
5-نقل ثقيل
9- لو واحد كسر عليا من غير قصد و انا كنت حادخل في السور
اولا : لازم ابقي عارف اني جنب السور و مهما حصل ملفش في اتجاه السور .. افرمل جامد و امسك جامد في الدركسيون
بس افتراضا اني لفيت و كنت حادخل في السور ححاول الم العربية او علي الاقل ححاول احقق اقل الخساير .. و بالنسبة للراجل في ناس تقولهم حاتصلحلي التلفيات .. و في ناس مش بتقبل العوض ( الكلام ده في حالة .. ان الراجل طلع محترم و اعتذر و اعترف انه غلطان .. لو طلع غير كدة يبقي يستاهل اللي يجرالو)

10 - الحاجات المهمة انها تكون في العربية
راجع الموضوع التالي
http://www.nilemotors.net/Nile/115130-a.html

وزيادة علي كدة .. حبل قطر - سلك بطارية - الاستبن - انا معايا مفكات و زرادية - حبل عادي - شريط لاصق او شكرتون
------------------------------------------------------------
احب بس افكرك ان الاجابات ده تحتمل الخطا او الصواب ولكن ده معلوماتي و رايي الشخصي عن الاسئلة اللي حضرتك سالتها و اتمنا اني اكون افدتك و كل سنة و انتم طيبين