بسم الله الرحمن الرحيم
مبدأيا انا مالك للنيو صنى سوبر صالون من تانى يوم نزلت فيه
انا فعلا عندى مأساه من السيارة و كمية عيوب التصنيع و اوتو ايجبت و عدم توافر قطع الغيار
القصة بدأت بعد اول 100كم و اصوات من كل حتة (فرامل و فبر مفكوك و عفشة)
فى صيانة ال1000كم تم تغيير 4 قطع فى الضمان و تربيط معظم فبر العربية لأنه طالع من المصنع مفكوك... قلت الحمد لله و ممكن تحصل
و لاحظت ان الطنابير متاكلة طبعا كدبت نفسى و عينيا و قولت دا اكيد كابوس و هاصحى الاقى كله تمام المهم طلع الموضوع حقيقة و كشفوعلى الطنابير و قالو فى حدود المسموح رغم انى شايفها بعينى و عامل 1000كم يعنى لسه مطبعتش اصلان المهم المهندس قالى ان مقلقش و عندهم اجهزة بيقيسو بيها و يتأكدو

ابتدى المسلسل تانى عند ال7000كم اصوات فرامل شنيعة مريعة مع البطىء و السرعة المهم اتصلت قالو تعالى صيانة 10000
رحت الصيانة قالولى محتاج تيل و طنابير و مش عندنا و صاجة تيل و مش عندنا تعالى لما ربنا يفرجها و نجيب
المهم اتصلت بالشكاوى و القصة و الرواية لحد ما جيه التيل و الطنابير بس كنت عملت حوالى 13000 و قالولى الصاجة مع صيانة ال15000 لو جت المهم فضلت اتصل اسال لحد ما جت و روحت عملت الصيانة و ياريتنى ما عملتها

استلمت السيارة و انا فرحان تانى يوم عينك ماتشو ف الا النور صوت رهيب لدرجة انك متعرفش تسوق من الصداع يعنى على سرعة 60 ممكن دماغك تنفجر من الصوت ومازال صوت الفرامل الخاص بالصاجة الى اتغيرت مستمر اتصلت بالتوكيل قالو اقرب معاد كمان 10 ايام و صبرت
رحت بعد ال10 ايام كشفو على العربية قالو البلى الخلفى مدمر و غير متوافر عندنا او بالمصنع و مش عارفين هايجى امتى
يا جدعان العربية مكنش فيها حاجة انتو بوظتوها يردو لا مالناش دعوة ده عيب فى العربية قالتاهم مكنش موجود قبل متستلموها بثانية بعدين دا بلى خلفى وانتو كنتو بتغيرو صاجة التيل الخلف يعنى مش محتاجة عبقرية ان انتو اللى بوظتوها قالى احنا هنعمل تحقيق داخلى و المقصر هيعاقب و ديه حاجة داخلية طاب انا ذنبى ايه ده اللى عندنا
طاب و عربيتى
اتصلت بالشكاوى و عملت شكوى هنرد بعد يومين و لا حد بيرد عملت 7 شكاوى و لا اى رد
اتصلت بنيسان مصر قالو موصلناش اى شكاوى و معندناش رد هنخلى اوتو ايجبت يكلموك كلمنى مسئول اوتو ايجبت قالى معندناش القطعة و المشكلة من نيسان مصر مش متوفر فيها قطع الغيار للسيارة قلتله انتو مشكلتى مش نيسان مصر لأن انتو اللى بوظتو العربية
دلوقتى العربية بقالها 7 شهور معاية كل شهر مصيبة قمة فى الردائة و عدم توافر لقطع الغيار و توكيل غاية فى السوء و هو المسئول عن خراب العربية
قلولى اعمل ايه مش عارف اسوق العربية وشاريها تقسيط مش هعرف ابيعها
كان معايا اوبل كورسا 2004 تقفيل مصرى قعدت اول 4 سنين بدون عيب واحد بعد كده السقف لونه اتغير من الشمس و كان بعد الضمان بسنتين
ازاى عربية فيها كمية عيوب التصنيع ديه و ازاى الرداءة ديه
و على فكرة صوت صاجة التيل الخلفى كمان اكتر من الأول و صوت الكاوتش رهيب و بيتهربو منه
كأنى راكب عربية بقالها 7سنين مش 7 شهور
اسف انى طولت عليكو بس انا اتخنقت من العربية و كان لازم افضفض