الموضوع: بسببكم ها احاول اشترى اوكتافيا بس الفرق ايه ؟

المشاركة الأصلية كتبت بواسطة inspiron

نصيحة من أخ..خليك في الـ 60 ألف جنيه ودول يجيبوا أوكتافيا 99 زي الفل.وفيها ما تتمناه.أنا كان معايا واحدة 98 هاي لاين وكانت من أجمل العربيات اللي ركبتها في حياتي.وكمالياتها كالآتي بإختصار :-
- موتور 1600 سي سي 101 حصان

- 4 زجاج كهربة - مرايات كهربة قابلة للطي بسخانات - باور - سنتر مركزي - تكييف - فرامل abs - عدد 2 إيرباج - مقابض الأبواب نيكل - مساحة زجاج خلفية - كمبيوتر رحلات يعرض إستهلاك البنزين وخلافه

لو لقيت حاجة في حدود الـ 60 ألف وتصرف عليها 5000 - 6000 وتركب عربية ملهاش حل. أحسن ما تزود المبلغ 20 أو 25 وتجيب a5 مكسحة.

بالنسبة للمميزات :-
- صاج متخلف عقلياً.
- عفشة مناسبة فعلاً لطرق مصر.
- تكييف جميل.
- عزل حلو.
- سحب حلو.
- قطع غيار متوفرة وسعرها معقول.
- إعتمادية عالية..وبمناسبة الإعتمادية خد الفيديو ده..

https://www.youtube.com/watch?v=xdzuy9ed2li

دي العربية اللي كانت معايا..وفي الفيديو ده كنت راجع من إسماعيلية والعربية جابت ديسك وإسطوانة في ربع المسافة.لاحظ الصوت اللي حصل في الغيار التاني.ومشيت بيها لحد القاهرة..والتسارع ده وهي جايبة ديسك وإسطوانة تخيل :)

اتفق تماما مع العضو انسبيرون ان خلليك في ال a4 لسبب مهم جدا هو انك طالع من لانسر وطبعا اللى بيسوق الياباني متعود على النعومة والجري ودا ينقلنا لنقطة ماحدش رد عليك فيها هي الفرق بين ال a4 و ال a5 وانا ممكن افيدك انا اصلا كان معايا a4 موديل قديم بس كان موتور 1800 بس كان اييييه فاااااجر جداااا وحمار شغل آخر حاجة والاهم انه كان شديد جدا عالعربية ف كانت سريعة جدا وسحبها جامد والتسارع من السكون التام سريييع بفظاعة لدرجة اني اول ما جبتها اتخضيت من رد فعل العربية لدوسة خفيفة على بدال البنزين ـ المهم بعد ما اتعودت عليها وحبيتها حب عنيف ابتدت تعمل مشاكل بس للامانة كانت حمالة اسية انا كنت باقرص عليها على الرغم من ان حصل مشكلة ف الفتيس بسبب التأخر في الصيانة ودي معلومة ماكنتش اعرفها وللاسف اكتشفتها متأخر . المهم حبيت اغيرها قلت اجيب موديل احدث كان قدامي عربية حمايا a5 مود 2008 ولما سقتها اجارك الله طبعا عشان متعود عالموتور ال 1800 لقيتها تقيلة جدا كوزن وسحب وجري على السرعات الاولى بتنتع معاك ولكنها طبعا عربية محترمة جدا جدا وكمالياتها اعلى من ال a4 ولكن بما انك متعود عالياباني ال a4 انسب لك لان ادائها رياضي اكتر في السحب والتسارع من السكون وطبعا انا بعد الاستخارة اشتريت a4 2008 بس 1600 طبعا تقيلة برضو مقارنة بال 1800 بس ف الجري امتع واحسن كتير من ال a5 انا بالنسبالى ماليش ف الكماليات غير الفتيس الاوتو والتكييف وعلى فكرة تكييف ال a4 اشد بمرااااحل من تكييف ال a5 وانا مجرب الاتنين ف كذا عربية واللى سمعته عن ال a5 موديلات 2005 و 2006 كانت فيها مشاكل ف كومبريسور التكييف يعني احسن a5 من أول 2007 مش حتقل عن 90 الف باسعار اليوم

الخلاصة دور على a4 من 97 (معاقين من بورسعيد تبدأ من 50 الف وشفت منها عربيات بحالة الزيرو ) وحنى 2002
وآسف على الاطالة بس حبيت اقول رأيي ان ال a4 احسن و أخف من ال a5 وتكييفها احسن بس لو بتدور على كماليات وهيبة وبرستيج ومالكش ف الجري وعاوز عربية تقيلة على الارض وثابتة خلليك ف ال a5 من اول 2007
وربنا يوفقك