بسببكم ها احاول اشترى اوكتافيا بس الفرق ايه ؟

**jackoub** · 23-06-2013 02:41 PM

السلام عليكم ورحمة الله وبركاته
دا اول بوست ليا على المنتدى الرائع
وبصراحه انا متابعه من زمان لما فيه من مواضيع رائعة ومفيده
بس عاوز اسئل سؤال
ايه الفرق بين ال a4 & a5
من حيث السنوات وغيره
وكمان اكثر صفحات لقيت الاعضاء بتساعد بعضها فيه
صفحات الاوكتافيا

اجيب منين سيارة فى حدود ال 60000 يزيدوا حبه او يقلوا حبه
ودعواتكم

**Moratoz** · 23-06-2013 02:48 PM

اهلا بحضرتك في قسمنا العزيز ومنورنا
حضرتك بنتكلم في حدود 60000 جم يبقي بتكلم في a4 بغض النظر عن الفروقات بينها وبين a5 والمبلغ دا يجيب من موديل ١٩٩٨ الي ٢٠٠٠ بالعافيه اما الحاله فدا طبعا لازم تصبر شويه ومتزهقش من البحث عن الحاله الجيدة وربنا يوفقك ان شاء الله

**المنسي** · 23-06-2013 02:54 PM

المبلغ اللى مع حضرتك يجيب اوكتافيا a4 من موديل 98 وبالنسبة للفروقات هتلاقى عتاولة الاوكتافيا داخلين يقولو كل حاجة عن الفروقات مابينهم وبالتوفيق مقدما

**أحمد جودة** · 23-06-2013 04:01 PM

أهلا بيك فى قسم الاسكودا بيتك التاني

بالفعل 60 الف مبلغ معقول يجيب اوكتافيا من 98 وانتا طالع بس الاهم من الموديل تجيب حالة ممتازة

بمعني لو قدامك موديل 98 مثلا وموديل 2000
بس حالة ال98 افضل يبقي على البركة لان العبرة مش بالموديل بالعكس بالحالة

ومنتظرين أراء خبراء الاوكتافيا وأهلا بحضرتك مرة تانية فى قسم الاسكودا

**mo7a_mo7a** · 23-06-2013 09:34 PM

شكل العربية دي حتبقي اول بختك
وانت واضح انك مش وش بهدلة
نصيحة
لو المبلغ زاد شوية 15 - 20 الف ممكن تلاقي a5 كويسةويبقي افضل كتيييييير

تحياتي

**inspiron** · 24-06-2013 12:21 AM

نصيحة من أخ..خليك في الـ 60 ألف جنيه ودول يجيبوا أوكتافيا 99 زي الفل.وفيها ما تتمناه.أنا كان معايا واحدة 98 هاي لاين وكانت من أجمل العربيات اللي ركبتها في حياتي.وكمالياتها كالآتي بإختصار :-
- موتور 1600 سي سي 101 حصان

- 4 زجاج كهربة - مرايات كهربة قابلة للطي بسخانات - باور - سنتر مركزي - تكييف - فرامل ABS - عدد 2 إيرباج - مقابض الأبواب نيكل - مساحة زجاج خلفية - كمبيوتر رحلات يعرض إستهلاك البنزين وخلافه

لو لقيت حاجة في حدود الـ 60 ألف وتصرف عليها 5000 - 6000 وتركب عربية ملهاش حل. أحسن ما تزود المبلغ 20 أو 25 وتجيب A5 مكسحة.

بالنسبة للمميزات :-
- صاج متخلف عقلياً.
- عفشة مناسبة فعلاً لطرق مصر.
- تكييف جميل.
- عزل حلو.
- سحب حلو.
- قطع غيار متوفرة وسعرها معقول.
- إعتمادية عالية..وبمناسبة الإعتمادية خد الفيديو ده..

https://www.youtube.com/watch?v=xdzUy9Ed2LI

دي العربية اللي كانت معايا..وفي الفيديو ده كنت راجع من إسماعيلية والعربية جابت ديسك وإسطوانة في ربع المسافة.لاحظ الصوت اللي حصل في الغيار التاني.ومشيت بيها لحد القاهرة..والتسارع ده وهي جايبة ديسك وإسطوانة تخيل :)