الموضوع: احكلنا عن مغامراتك في ظل أزمة البنزين ( موضوع فكاهي )

""خلصصص البنزين خلص هاهاهاهاها ، بيقولي خلصصصص هاهاها خلص ازاي ها خلص ليه ، لالالا اكيد مخلصش لالا اكيد لا ، ده احنا لسه علي الصبح ازاي خلص ، يعني اقف تاني في طابور في بنزينه و كده هاهاهاااا لالا اكيد لا ، بيقولك خلص ، الله يخربيتك يا مرسي ""



ده تعليق واحد كان واقف امامي في البنزينه انهرده الصبح بعد واقفه ساعتين بعد البنزين ما خلص و كان فضلنا ٣ عربيات و نوصل للتانك , اما انا فكنت متنح وانا في الطابور ، كان كل همي اني اوصل للتانك و احط بنزين علشان اخلص و ادخل الحمام اللي في البنزينه، اصلي كنت مزنوق اوي بعد الوقفه دي :(

في ازمة البنزين اللي حصلت من كام اسبوع حصلت حاجه طريفه جدا .., عديت علي بنزينه وطنيه وجدت طابور حوالي 15عربيات قولت مش مهم هقف بدل ما الازمه تزيد وتبقي 50 عربيه بعد كده .., المهم بضرب بعيني كده لقيت في طرمبه لوحدها كده وعليها عربيتين فقط بتمون, بس علشان تدخل عندهم لازم تدخل عكس من مخرج البنزينه لأن المدخل مقفول بالعربيات اللي داخله ., المهم هوب هوب روحت داخل وقفت امام الطرمبه وفي دقيقتين كنت ممون وماشي .. هههههههههههههههههه

انا قبل الازمة باربع ايام فولت .. ولما شميت ريحتها قولت التانك ناقص عشرة لتر الحق ازودهم قبل ما الازمة تتنيل تزيد .. المهم اني فضلت بتاع اربع خمس ايام مش عارفة اكمل التانك بتاعي لحد مابقاش في التانك الا العشرة لتر اللي كان نفسي فيهم .. وكل ما اشوف بنزينة الاقي الطابور عامل ستين سبعين عربية وقافلين الطرق الجانبية بالعرض .. استنيت لما الليل جة واخدت جوزي وطلعنا فولناها من وطنية الواحات اللي عند الفردوس على الساعة 1 بالليل تقريبا وقولنا ياقاتل يامقتول وطبعا كان الطريق ماسك من المتميز او من قبلها كمان في اتجاه طريق الفيوم لحد البنزينة .. بتاع تلاتة اربعة كيلو

قبلها عدينا على سوبر ماركت نجيب اي عشا ومية وبيبسي لان باينها حتبقى سهرة صباحي فالواحد يعمل احتياطه
طبعا كان البنزين خلص ماكانش فيه غير اتنين تلاتة لتر ومش معقول حفضل اسيب العربية دايرة او ابطل وادور لما الطابور يقل .. ففضلنا نزق العربية بتاع 20 مرة والناس تتريق عليا .. طب اسيب الغلبان دة يزق عربية تهمة يعني ما انزل اساعده احسن

فيييييييييييييييييييييييي يييييييييييييييييييين لحد مافولنا على الساعة 4 الفجر .. وكنت حاطة ايدي على قلبي احسن الاقي الطلمبة فضيت .. ماصدقتش نفسي لما فولت في تلات ساعات .. وغيري خرج يفول من اسبوع ومارجعش :d