مساعدة في أوبل كورسا 94

**engahmed214** · 28-08-2008 03:26 PM

السلام عليكم/

يا جماعة أرجو المساعدة قدامي عربية أوبل كورسا 94 1200سي سي, علس 33000, كاملة مانيوال, هي عاملة 120 الف كم, هي فابريقة دواخل و رشة بره

أنا عايز أعرف ايه رأيكم في السعر ؟؟؟
وهل الموديل ده كويس و الموتور بتاعه في مشاكل ؟؟ لأن في ناس خوفتني من أوبل كورسا 1000 سي سي.

وايه أخبار قطع غيارها غالية ولا معقولة ؟؟؟

وتنصحوني بيها ولا أجيب حاجة أحدث لأن معروض عليا كيا برايد 99 ب 33000 برده بس عاملة 92 الف كم فقط.

و أنا محتار ؟؟؟؟؟؟؟؟؟؟؟؟؟؟؟؟؟؟؟؟؟؟

ياريت تردا عليا بسرعه

**Ahmad Allawy** · 29-08-2008 11:15 AM

السلام عليكم..
معلش انا متأخر شوية ف الرد..
شوف يا سيدي..
انت نوع سواقتك و احتياجك للعربية ايه..؟؟ و مزاجك ف العربية ايه..؟؟
الكورسا دي بقالها 14 سنة. ماشية فيهم 120 الف بس.. ده رقم معقول جدا..
لو مكانش العداد ملعوب فيه يعني او متغير..
ده مش تشكيك في ذمة اللي بيبيع.. لا سمح الله.. لكن ده اللي ممكن يحصل..
الفيصل ف الموضوع ده حالة الموتور.. مش عداد الكيلو متر..كفاءة كبس الموتور..
ودي حاجة سهل قوي انها تتقاس..المفروض انها لا تقل عن 80% لو العربية دي نضيفة..
و معاك لحد 75 % كمان. يبقي هو رجله كانت تقيلة شوية.. بس برضة شغال..
السعر بيتهيألي كويس.. بس انا مش متابع قوي بصراحة.. بس برضه حاسس انه بيقول ان العربية فيها شوية شغل..
الموديل ده موتوره كويس جدا.. اللي هو ال1200 زي الفل..
سهل الصيانة جدا.. قطع غياره متوفرة جدا و رخيصة الي حد كبير..
و مفيهوش مشاكل و قلق و خوف الناس من ال1000 سي سي.. متقلقش..
اما فيما يخص قطع الغيار ممكن سعاتك تبص بصة في اللينك دي..
http://www.nilemotors.net/Nile/showthread.php?t=6688
فيها اسعار قطع الغيار.. و اماكن وجود الحاجات الاصلية..
تعتبر رخبصة لكونها الماني.. و فرق السعر بينها و بين الكوري مش كبير يعني..
وفي منها تشكيلات.. يعني الالماني في و البرازيلي في.. و الكوري في.. و الصيني في..
كله موجود.. بس هاقولك الكلمة المشهورة قوي بتاعت احمد صديقنا هنا ف المنتدي (No Name)
الاوبل مش بتاعت استرخاص.. بمعني انك يفضل تجيب حاجتها الاصلية.. و متخليش حد مش بيفهم فيها يلعب فيها.. عشان متقرفكش و متعملش معاك مشاكل..
ده ما يخص الاوبل كورسا.
انا باقولك الكلام ده عشان انا معايا كورسا 97.. و الحمد لله ماشيه معايا زي الفل..
مغير فيها شوية حاجات.. بس حاجات رفايع مش بلاوي يعني.. و تمام..

نيجي بقي للكيا.. في المقابل قطع غيارها رخيصة جدا.. و متوفرة علي ما اعتقد جدا برضه..
و سعرها كده يعتبر غالي شوية عليها.. بس لو الحالة نضيفة قوي.. يبقي مش مشكلة.. لو انت عايزها.. عربية واسعه.. و خفيفة.. و محبوبة كده.. مريجة نفسيا يعني..
طبعا لا مجال للمقارنة بين العربيتين.. الاوبل تكسب في حاجات كتير الا من نقطتين بس..
ان الكيا قطع غيارها ارخص.. و اي حد ف الشارع ممكن يشتغل فيها.. سهلة قوي يعني..
الاوبل مش كده..
لكن ثبات.. نضافة تقفيل.. شكل.. عمر افتراضي.. كفاءة موتور..
كل ده بيصب في مصلحة اوبل طبعا..
يعني لو انت الاوبل ده نضيفة و موتورها مش متبهدل.. تقدر تمشي بيها 200 الف كم كمان من غير ما تفكر تعمل حاجة في الموتور.. عادي جدا.. (علي حسب طريقة سواقتك..)
لكن البرايد.. بيتهيألي ان ممكن جدا انك تحتاج تعمل فيها شغل قبل ما تقفل ال200 الف اصلا..
ف الموتور يعني.. تفتح بقي و شنبر و الكلام ده..

شوف سعاتك ايه اولوياتك..لو عايز تشتري دماغك.. و تخليك ف السهل.. و مش هتقعد بالعربية كتير و مش عايز تصرف عليها كتير.. و لو انت لسة جديد نسبيا ف السواقة و عالم العربيات عموما.. يبقي خليك ف البرايد..
لكن لو ليك ف الاوروبي.. و طعم العربيات الاوروبي.. و بتحب تهتم بالعربية و تظبطها.. و تحافظ عليها.. يبقي تخليك ف الاوبل..
حضرتك فكر كويس.. و اقرا و شوف اسعار قطع غيار الاوبل كويس.. و شوف اولوياتك.. و مادياتك.. و استخير و ربنا يوفقك ان شاء الله.. و احننا تحت امرك في اي معلومة و ربنا يوفقك ان شاء الله

**sniperfox** · 04-10-2008 11:09 PM

اهلا يا جماعه انا جديد فى السايت ده واحب ابعت سلامى لكل ال اوبلاويه فى مصر
فى البدايه ان بحب العربياة ال المانى وتوجت حبى ده بانى اشتريت من شهرين عربيه اوبل فيكترا ايه (الشكل القديم ) وهى حلتها نضيفه بس اعطلها تعبانى شويه او بمعنى اخر مفيش حد بره التوكيل بيعرف يظبط العربيه كلو بيجتهد
ولما قررت اروح التوكيل لايت ال اسعار خرافيه بالنسبه لقطع الغيار لان مش كل قطع غيار ال اوبل موجوده بره ياعنى البوجيهات ال جى ام بره ب 90 جنيه
وفلتر البنزين بره ب 70 جنيه
انا عربيتى 2000سس اوتمتك
وانا ماشى فى مره لاتها مبتنقلش ولمبت ال اسبورت دريف بتنور وبتطفى والموضوع ده مبيحصلش الا لم العربيه بتسخن بس ؟؟؟؟؟
فى ناس الولى ده حساس فتيس ,,,,, وناس الولى ده الفتيس طار ياعنى باظ وانى محتاج فتيس تانى ولم كلمت الوكيل الى ان الفتيس بتاع الموديل ده مش موجود عنده بس ممكن يجبهولى سبيشيل اوردر اى استيراد خاص من المنيا !!!!!
ولما سالتو الموضوع ده هيتكلف كام الى 53 الف جنيه
فى ناس الولى فى ناس بره بتجيبو اوبيكون موجود عندهم جديد ارخص من كدا
وناس الولى ريح دماغك واشتريلك واحد استيراد (مستعمل) من الحرفين ب 1500 جنيه وناس الولى ان فى ناس بتصلح الفتيس ال اوتمتك بس ان ملاتش حد فيهم لحد دلواتى :(
وكنت عاوز منكم خدمه ؟؟؟؟
الى يعرف حد بيصلح الفتيس ال اوتو او بيبيعه بسعر معقول يبعتلى
وكنت عاوز رايكم فى موضوع الفتيس المستعمل ده
واسف على ال اطاله وارجو المساعده