الموضوع: النقيضين (الشاهين و الإسبيرانزا)

المنتدي قتل بحثا و مشوره بخصوص فئتين
فئه الشاهين\لادا\128 و انا بتكلم هنا عن الزيرو و اللي بيفكر يشتري زيرو من الموديلات دي
و الفئه التانيه اللي بتتميز فيها بأوبشنز اكتر و نعومه و راحه و نفس السعر تقريبا و هي الاسبيرانزا 516 و ال a113

بالنسبه للفئه الاولي و ده طبعا رأيي الشخصي و ممكن ميعجبش ناس تانيه بس الاختلاف في الرأي و المناقشه حاجه جميله موجوده بينا في المنتدي
انا شايف ان العربيات دي عفي عليها الزمن من نواحي عده زي عوامل الامان و حمايه كابينه الركاب من الصدمات الاماميه و الجانبيه و عوامل الرفاهيه من تكييف و باور و زجاج كهربائي و سلاسه القياده و حتي دول ان وجدو في الفئه دي بتلاقيهم علي حساب السعر, و دي نقطه جدليه كبيره ازاي عربيات من التمانينات تباع بالاسعار اللي بنشوفها دي, اسعار تقترب من منافسين جدد ده غير طبعا المستعمل الكوري و الياباني اللي من غير جدل عقيم برقبه اي عربيه من الفئه دي
و كمان نقطه اضافيه, كل عربيه من الفئه دي ليها عيوب مشهوره و لسه بيتم انتاجها بنفس التصميم و ادي بعضها من خلال متابعه اقسامهم في المنتدي:
الشاهين:
1- عربيه ناشفه و خشنه القياده
2- صوت موتور جبار!!
3- صالون غير مريح في قعدته ده غير تصميمه القديم البشع
ال 128:
1-المشكله الازليه بتاعت الحوض
2-كثره الاعطال الممله و احتياج مستمر لاصلاحات لا تنتهي
3- نفس النقد للتابلوه
اللادا:
1-دريكسيون عجيب
2-تقل العربيه علي حساب استهلاك البنزين
و طبعا النقد ده موجه اساسا للعربيات الزيرو من الفئه دي, لكن المستعمل بتاعهم شايل ناس كتير و بيقضي الغرض و مش قدرتنا الماليه متساويه, لكن انا شايف ان اللي بيفكر يشتري العربيات دي زيرو حاسبها علي اساس خاطئ الا و هو ان العربيات دي بقالها ردح من الزمن في الشوارع و انها المناسبه لشوارعنا العزيزه لكن لو الناس حسبتها صح و فكرت الفلوس اللي هتتدفع دي مقابل ايه بالظبت؟ هتلاقي النتيجه انك دافع مبلغ محترم في عربيات لا تتناسب مع اسعارها, و ده اللي مخلي الزيرو منها حتي يومنا هذا بيتباع

الفئه التانيه و هي الاسبيرانزا 516 و a113 و دي عربيات بتتباع في نفس الفئه السعريه لكن الخوف من المجهول و سياسه القطيع المسيطره علي الناس مأثره علي قرار الشراء, لكن بالعقل لو بصينا هنلاقي مبيعات كتيره ليهم و العربيات دي بتديك معادله كويسه و معقوله ما بين سعر مناسب و رفاهيه و نعومه في القياده
لكن انا بعنب علي الناس اللي بتفكر ان العربيه ميراث للاحفاد و مش عامله حساب لراحتهم و امانهم في مقابل ان شكل الصاج الخارجي للعربيه هيفضل زي ماهو علي مدار سنين طويله مع انهم لو بصو في الشوارع هيلاقو عربيات الفئه الاولي من اكثر العربيات اعطالا علي الطريق و ده موقف سخيف لو انت سايق و رايح مشوار ليك لكن سخافه الموقف ده لا تقارن لو مراتك او اختك او والدتك هما اللي سايقين العربيه و عطلت بيهم و هما لوحدهم
و في الاخر كل واحد بيحسبها بدماغه و تفكيره و كل واحد حر