الموضوع: جوان وش سلندر الالتو

مش هتقرفك يا باشا الا لو كنت مش مهتم بيها و بتهملها يعني مبتعملش الصيانات في مواعيدها مبتجيبش قطع غيار كويسة و هكذا العربية مش زيت و بنزين و خلاص و الدليل ان حضرتك اول واحد يشتكي هنا من العربية

موضوع جوان السلندر بيبوظ ان العربية سخنت جامد منك فضرب ده الفبريكة اما الباقي ممكن برده ان العربية بتسخن او النوعية سيئة او عيب الميكانيكي اللي بتتعامل معاه
بالاضافة ايه الاعراض اللي واجهتها في العربية اللي تدل ع ان الجوان ضرب ؟؟

و اخيرا العربية كنت جايبها زيرو و لا مستعمل و عاملة كام الف ؟ و ايه الصيانات اللي عملتها ؟؟
و ايه المشاكل اللي بتواجها بشكل عام في العربية

المشاركة الأصلية كتبت بواسطة letux

العربية عاملة 72 الف كيلو .

الصيانة الى بعلملها هو انى اغير زيت و اغير مياة و اغسل الريداتيور و اغير فلاتر الزين و بالبنزين و الهواء .
سير الكتينة و البلية و سير الدينامو .

ايه تانى ممكن اعمله ؟

انا لسة راجع من عند ميكانيكى فنان . تحت كوبرى العزيز بالله اسمه اسطة رمضان . فك الوش و قالى عايز يتقشط و فيه كام لحمة كدة اتلحموا فى الوش كانوا متاكلين
و قالى اجيبله جوانين وش سلندر و سير كاتينة و بلية و امبوبة سيليكون عضم من ام 30 جنيه ^_^
نزلت سوق التوفيقية لقيته ضلمة و كله قافل بسبب الاحداث . و بغبائى مسئلتش ابويا قبل ما اروح مع انه شغال فى سوق التوفيقية اصلا xD

المهم بقى ان بكرة الصبح باذن الله هنزل عند هانى هاشم فى سوق التوفيقية اشترى جوانين وش سلندر و سير و بلية كاتينة
و اجيب سيليكون العضم
و بالمرة اجيب فلتر بنزين اغيره
و اجيب جركن زيت و فلتر زيت
و اجيب جركن ماية خضرا سعودى
و تيل فرامل بالمرة xD

على الله يطلعلى حاجة تانى بقى :/

فى حاجة تانية اخلى الميكانيكى يبص عليها ؟؟

مع احترامي يا باشا لكلامك بس الميكانيكي ده كفتجي عارف يعني ايه جوانين ؟؟؟ يعني حجم غرفة الاحتراق هيتغير و المقاسات القياسية هتختلف و بالتالي سحب العربية هيقل معاك

ممكن تقولي اسباب تغيير الجوان لأول مرة ايه الاعراض اللي وجهتك ؟؟؟؟

وش السلندر لو سليم و هتغير جوان هتقشط و تنعمه تساويه عند خراط مش يخرطه و يخلي الخراط ياكله بلاش حد يعملك كده بدل ما تدبس في 500-800 ج تمن وش سلندر جديد لأن لانه لو اتاكل خلاص انساه
و بعد ما يقشط الوش و جسم الموتور من بقايا الجوان القديم يركب الجوان الجديد و يربط بطريقة و بترتيب معين المسامير لاحكام الربط طبعا مع السيليكون

بالنسبة الصيانات سير الكاتينة و بلية الكاتينة كبييرك 70 الف بالنسبة للسير الفبريكة اما السيور و البلي النوعيات التانية اللي هتشتريه متزدش عن 30 الف ك احتياطي عشان لو اتقطع هتزعل زعلة جامدة اوي و نصيحة متجيبش اي نوعيات او تسترخص بالذات في سير الكاتينة ده روح الموتور جيب سير و بلية كاتينة سوزوكي الاصلي لو ملقتش البلية جيب السير سوزوكي و البلية فليكن ليتل
و تاخد بالك ان تاريخ انتاج السير ميعديش عليه اكتر من سنة لأن بيكون صالح للتركيب خلال 3 سنين من تاريخ الانتاج

سير الدينامو كل 40 الف بالتقريب بس ع حسب الحالة يعني ممكن يعيش معاك اكتر ع حسب و خاصة لو الفبريكة و لو جبت جيب ياباني ملقتش خليك في الكوري مع ان عمره اقل من الياباني بس ده امره بسيط كله بـ20 ج و لو لا قدر الله اتقطع الشحن بتاع البطارية بيفضي و العربية بتقف مفيش قلق جامد يعني و برده تاريخ الصلاحية اهم حاجة بيبقي مكتوب عليه برده و للعلم الدينامو عشان يفك بيتفك من مسمارين تحت مع مسمار المجري فوق عشان فيه ميكانيكية اغبية بيفك فوق بس اللي في المجري و يحاول يزقه و في الاخر بيخربه خلي بالك

تيل الفرامل الفبريكة ممكن يعيش معاك لحد 40 و 50 الف كمان بس ع حسب الاستخدام بص عليه لقيته لسه كمل بيخلص جيب الماليزي اللي نوعه fbk لأنه حنين ع الطنابيير و بيحافظ عليها بس عيبه بينزل بودرة سودا و سعره في حدود 60 - 70 ج ع حسب المكان او الهندي ليتل بس اغلي شوية او سوزوكي و الاخر هو اغلاهم

فلتر الهوا يتغير كل 20 الف زي الفل اعراض تلفه هتلاقي ريش اتعوجت او وبر من مكان دخول الهوا او الاتنين مع بعض و عشان تاخد اداء كويس يفضل ميعديش معاك 20 الف عشان تفضل واخد اداء و احتراق متوازن داخل غرفة الاحتراق

فلتر البنزين المفروض كل 30-40 الف بس يفضل عشان البنزين عندنا ما شاء الله كفاية عليه 20 الف

فلتر التكييف كل 30 - 40 الف ك

البوجيهات كل 20 الف اللي لاحظته ان الافضل للعربية ان جي كي و دينسو شغال برده بس لقيت اداء العربية مع ان جي كي افضل و الرقم بتاعنا في ان جي كي DCPR7E لو لقيت 8 او 6 بدل 7 شغال برده ملقتش يبقي دينسو مش فاكر الكود لكن الرقم 22 او 24 شغالين برده بالمناسبة البوجيهات عندنا مقاس 16 سن 14 خلي بالك من النقطة ديه عند الشرا

باقي طقم الكهربا و لا تيجي ناحيته و لا تلمسه حتي احنا الكتروني

نيجي للسوائل بقي

زيت الموتور انا معرفش انت بتستخدم تخليقي و لا معدني و لا ايه يا ريت تقولي اللي بستخدمه و ماشي عليه عشان اقولك المناسب

فلتر الزيت طبعا مع كل تغييرة و خليك في الياباني سيبك من الكوري و المصري ابو 10 و 15 ج
عشان هتسمع فتي ان ده فلتر 5000 و فلتر 10000 ده غلط الفلتر الي بيقولوا عليه 5000 ده فلتر خاماته رديئة شوية عشان كده المفروض ميكملش 5000 و انت و نصيبك اما اللي بيقولوا عليه 10000 و غالبا هتلاقيه ياباني ده خامات افضل و توصل بيه 10000 مرتاح و سعره بيكون 20-25 ج
و بالمناسبة العربية بتاخد لترين و نص من غير فلتر و 3 الا ربع بالفلتر اللي يقولك 3 لتر ارزعه ع قفاه و قوله انا عارف عربيتي

زيت الفتيس بيتغير اول مرة ع 15 الف ك عشان يعتبر زي ما تقول زيت التليين و بعد كده كل متوسط 30 الف ك بشرط تستخدم زيت لزوجة 75w90 اما لو استخدمت لزوجة 80w90 ممكن ميكملش معاك الفترة دي و اياك ثم اياك حد يقولك استخدم زيت 140 لأنه تقيل و هيخرب الفتيس مع الوقت و هيكون محجر الفتيس في الشتا او في الصيف في بداية التشغيل
و طبعا اوعي حد يقولك زيت الفبريكة مبيتغيرش اللي يقولك كده السعه ع قفاه و سيبه و امشي
انت بتغير الزيت ده نظرا للرايش اللي بينزل و مع الوقت بيفقد لزوجته
كذلك اوعي حد يعبيلك من الطرمبة البرتقالي ساعات مبيحطوش حاجة اساسا ده غير اني شوفتهم بيرموا فيه اي زيت ع شوية شحم و عيش اللي يعبيلك يعبي من جيركن زيت متبرشم قدامك
و الزيوت الكويسة شل ....l و العربية بتاخد 2 لتر و ربع بالظبط لا تزيد و لا تقل
و مفيش حاجة اسمها تزويد فتيس معني انه ينفص معناه ان عندك تسريب

طبعا مية الريداتير كل سنتين او 40 الف ك خليك في الانواع المعروفة و ابعد عن الانواع المجهولة و سبب التغييير الشوائب و احتمال تكون صدأ لو سيبتها اكتر من كده مما قد يؤدي لخرم الريداتير مع الوقت او انسداد دورة التبريد
و اوعي حد يقولك اغسلها بمية نار و الكلام الفاشل ده و اوعي تزود مية حنفية بعد كده زود مية مقطرة فقط و في القربة بس لحد علامة الـfull

زيت الفرامل بيتغير كل سنتين او 40 الف ك برده و اللي يقولك زيت الفبركية مبيتغيرش تاني ساعتها حطه تحت العربية و امشي بيها
الزيت بيتغير لأنه بيفقد خواصه و بياخد رطوبة ده غير الشوائب و بالتالي مفيش اداء جيد للفرامل
و مفيش تزويد للفرامل و الا معناه عندك تسريب سواء ماستر فرعي او الماستر العمومي ضرب الا في حالة ان تيل الفرامل بيخلص فممكن تلاقي نقص خفيف و ساعتها لازم من نوعية الزيت تزود لأن كذا نوع ممكن يضرب الماستر
و لما يجي الباشا يغير الزيت تخليه ينزل كل الزيت القديم و ينضف القربة و يحط الجديد و ينزل من كل فردة ع حدة لحد ما يلاقي الزيت الجديد نازل قدامه و نضيف و بعدها يعبي من الزيت الجديد و يسحب هوا متقبلش ان يتعمل اقل من كده عشان الدورة تبقي نضيفة و الاداء يبقي كويس
و الانواع النضيفة بيندكس و لوكهيد و اس ال
و تجيب علبتين علبة 400 ملم و ربع لتر عشان الدورة و تنضيف الدورة اللي هيتعمل من كل عجلة برده تبص ع تاريخ الانتاج لأن صلاحيته بتكون في حدود 3 سنين

و متنساش تبص ع الكاوتش و حالته و تربط العفشة و ترشها شحم أبيض هيعمل معاك احلي واجب

فيه حاجة مهمة بقي لو نسيتها هتقرفك الرشاشات لازم تنضفها كل 20-30 الف باستخدام الترا سونك و ده غالي حبتين في حدود 200 ج او منظف انجيكشن زي stp بتحطه ع تفويلة تانك و تاخد العربية مشوار طويل و تمشي تحرق ع الغيارات شوية هتحس بفرق شاسع في استهلاك البنزين و سحب العربية و بعد ما التانك يقرب يخلص تفول تاني و عيش
و يفضل قبلها تنضف البوابة باستخدام منظف بوابة للانجيكشن in-take cleaner for injection


و اي استفسار اتفضل

المشاركة الأصلية كتبت بواسطة letux

ايه كل الكلام دة يا عم الحج دانا طلعت بطيخ خالص :/

بص يا سيدى . اولا بالنسبة لموضوع الجوانين .
فمن تقريبا كدة سنة و نص الجوان اتاكل بسبب ان البوجيهات اتحرقت و كنت ماشى على بوجيه واحد بس و انا معرفش و طبعا كنت بقرص .
فالعربية بقت تدخن دخان ابيض جامد اوى و تحرق زيت فغيرنا طقم شنابر و ركبنا جوان . بس وقتها بقى مركبناش جوان . احنا ركبنا جوانين على بعض و وقتها قالى عشان العربية متسخنش منك و كدة .
.. بعدها بفترة العربية وقفت منى فروحت كشفت عليها لقيت الجوان ملسوع فغيرناه بردك و برده حطينا 2 على بعض
.. و كمان مرة .
.. و اخيراً روحت النهاردة للميكانيكى الى تحت كوبرى العزيز بالله دة . و فتح . و قالى الوش عايز يتقشط و فيه كام لحام عمله فى الوش لان فى حتت كانت متاكلة .
بس بما انى كنت مركب جوانين و جايله و العربية كان راكب فيها جوانين . قالى هات جوانين .

مش عارف اقولك ايه بس اللي اقدر اقوله ان شكل الاولاني اشتغلك جامد و اللي انت رايح له حافظ مش فاهم كعادة اغلب الميكانيكية



بالنسبة لزيت الموتور ف انا معرفش ايه تخليقى و ايه معدنى دة xd
انا بدخل بنزينة موبيل و بقوله عايز اغير زيت بيقولى عايز ايه بقوله 3000 . .. الى هو الجركن ابو 130 جنيه دة ^_^

المعدني ده مستخلص من المواد البترولية و التخليقي مصنع بالكامل و قصتهم كبييرة بصراحة مش قادر حاليا اشرحلك قصة الزيوت
بس المعدني اللي هتلاقي الرخيص زي ابو 130 ج اللي بيقولوا عليه زيت 3000 و 5000 و ده تقيل ع موتورك و كمان موبيل يعني العربية بتقولك ارحمني
استخدم زيت شل hx5 المشهور بشل الاصفر و ده لزوجته 15w50 و تغيره ع 4000-5000 او hx7 المشهور شل الازرق و ده لزوجته 10w40 و ده تغيره ع 7000-8000 و ممكن يوصل معاك لـ9000 بس مش دايما اهم حاجة تابع حالته لزوجته و ريحته
طبعا مفيش حاجة اسمها زيت 3000 و 5000 و 10000 ديه كلها فتي صنايعية هنا فيه معدني و نصف تخليقي و تخليقي المعدني دايما هتلاقي لزوجته 20w50 و ده عمره قصير سواء عدد كيلومترات او الوقت فمبيعديش 5000 ك او 4 شهور في الموتور
النصف تخليقي ده دايما لزوجته 10w40
اما التخليقي و ده أفضلهم ع الاطلاق دايما هتلاقيه لزوجة 5w30 او 5w40
و لازم تتابع حالة الزيت متعتمدش ع الارقام ديه لأن طريقة سواقتك و الجو و الموتور بتحدد الزيت يقعد اد ايه يعني لو اوحد مقضيها حرق و غرز و فاكر نفسه في نيد فور سبيد زيت زي المعدني ده ممكن ميكملش معاه 2000 حتي لكن لو واحد ماشي هادي و ناقص يطلع فوق الرصيف يمشي عليه ممكن يوصل معاه 5000
و لما تجرب شل هتشوف الفرق هتحس انك كنت بتستخدم زيت تموين و ممكن تجرب وولف كمان ده زيت اوروبي جديد و الناس بتشكر فيه



..

بالنسبة بقى لزيت الفتيس انا من ساعة ما جبت العربية مغيرتهوش .
مرة روحت البنزينة و انا بغير زيت الموتور قولتله بصلى على زيت الفتيس . قالى شغال .
.. النهاردة قولت للواد الى شغال مع الميكانيكى اننا نغير زيت الفتيس بالمرة . قالى مبيتغيرش دة بيتزود بس .

زي مقولتلك ارزعه ع قفاه ده حمار و لو قدامي هقوله انت حمار و مبتفهمش و ربنا يستر كده ع فتيسك روح غير فورا و زي ما شرحتلك قصته فوق


..

يعنى ايه مياة مقطرة ؟ اجيبها منين ؟

ديه مية مغلية و مترشحة و قصتها طويلة بس الملخص ان مفيهاش املاح و لا شوائب زي مية الحنفية و بالتالي لا تعمل صدأ و متتبخرش زي العادية

..

الشحم الابيض دة احطه عند عفشجى ولا فى بنزينة ولا فين ^_^

ممكن يكون عند العفشجي و ممكن تشتريه العلبة كلها بـ25 ج تقريبا في سمايل في اي بنزينة وطنية و تخليه يرش و يربط و تاخد العلبة تاني و تعيد القصة بعد 6 شهور او سنة

..

منظف الانجكشن الى بيتحط ع البنزين بيغنى عن الترا سونيك الى ب 200 جنيه دة !! و بكام و الاقيه فين ؟
.. منظف البوابة الانجكشن دة الى هو الاسبراى الى بيتنضف بيه الماسورة الى واصلة بكلبة فلتر الهوا ولا حاجة تانبة ؟ xd

هو تقدر تقول يعتبر وقاية اكتر من تنضيف لو الرشاشات اتبهدلت فكان المفروض بتعملها كل 20-30 الف بس اعملها دلوقتي و سعرها في حدود 30 ج و استخدمها زي مقولت اي حاجة غلط ممكن تزعل برده يعني بلاش اهمال في الاستخدام زي الناس اللي تتروح تقولك و افول ليه اخلي نص التانك و احط عليه العبوة مع العلم ان العبوة المفروض لـ70 لتر و احنا اساسا 35 لتر

منظف البوابة الانجيشكن ده اللي بتنضف بيه البوابة للي بتفتح و تقف اللي بتسحب الهوا ملناش علاقة بالماسورة و عمة فلتر الهوا العمة و الخرطوم بيتشال و يتنضف و تجيب اللي قولتلك عليه لأنه اخف ع الاجزاء اما منظف الكربراتير حامي ممكن يطيرلك حساس الشكمان و ديه فيها 400-500 ج لوحدها

..
..

بالنسبة بقى لقطع الغيار زى السيور و الفلاتر فـ انا بجيبها من عند هانى هاشم الى فى سوق التوفيقية . الراجل دة حاجته اصلى ولا ايه ؟

متعاملتش معاه في قطع غيار غير هي مرة جبت من عنده بوجيهات و جيت بعدها بساله ع قطع غيار تانية ضربولي اسعار عالية اوي فمشيت
بس يفضل السيور تجيبها من منفذ بيع قطع غيار مودرن موتورز في الدقي ش المساحة قدام سوبر ماركت السعودي و اي قطع شديدة من عندهم
اما باقي القطع سواء من عند سوزوكي سنتر او ليدرز في الدقي 43 ش ايران فشغال و يعتبروا واحد و ممكن تشوف ليدرز و تقولهم انك تبعنا و المسئول هنا أ \ محمد رفعت قوله انك من طرفي و ان شاء الله يظبطك و اعتقد ليدرز عندهم سير سوزوكي الاصلي برده و هو سير هتلاقيه في كيس متبرشم و عليه تيكت سوزوكي و العلامة المائية و تاريخ التعبئة و السيريال نمبر و كل حاجة
و ابعد عن محلات شبرا و احمد حلمي عشان شوفت قطعهم و منهم واحد مشهور جدااا و طلعت قطعه اي كلام

و اخيرا حاول متغسلش الموتور كتييير او تغسله باستخدام الفووم بس و بحذر بدل ما حد يطيرلك حاجة في العربية

اهم حاجة بقي متنسناش بتقرير و لو مصور يبقي زي الفل في موضوع منفصل في القسم عن اللي اتعمل في العربية و القطع و الاسعار و هكذا مش هوصيك بقي :)