كنت حجزت صيانة ال30000 كم يوم السبت في توكيل السبع بالمعادي وحجزت مع الصيانة جوان الزجاج الخلفي لان الجوان الموجود كان فك وحسيت ان الأفضل اني اغيره.
رحت التوكيل ومهندس الأستقبال قابلني بكل لطف وظرف وعرف المطلوب وقالي هنعمل الصيانة 30000 كم وبعدين نشوف موضوع الزجاج الخلفي ومهمة الجوان والزجاج الخلفي هيتولى مسئوليتها المهندس (...........) ومش هقول اسمه لغاية كل الزملاء في المنتدى يأكدوا هل فعلا المهندس ده كان بينصب علي ولا هو كلامه مظبوط.
اللي حصل رحت للمهندس (...........) وقولتله ان الجوان انا عاوزه يتغير قاللي التركيب ب 400 جنيه تقريبا وتمن الجوان 365 جنيه وده بدون الضريبة وبالضريبة كله هيعمل 842 جنيه ورغم المبالغة في السعر وافقت وهنا تأتي المفأجاة والمصيبة فوجئت بالمهندس(......) بيقوللي ان أثناء فك الجوان القديم ممكن الزجاج يتكسر قولتله وبعدين لو انكسر ايه اللي هيحصل قاللي سيادته ان ساعتها هنضطر نركب زجاج تاني ولمل سألته وتمن الزجاج التاني مين هيتحمله قاللي بكل ببساطة انت طبعا.
ورجعت وسألته تاني وايه اللي يخلي الزجاج يتكسر قاللي اصل احنا بنفك بمكنة لها سن معقوف والسن بيدخل ويطلع ويتحرك بطريقة ممكن تكسر الزجاج قولتله ماشي اتكل على الله ورحت عمل مكالمة تليفون لأخي وهو مهندس ميكانيكا سيارات وحكيتله القصة قاللي بالنص وقف الشغل المهندس ده بيعمل عليك شغل ومفيش حاجة كده ابدا.
رجعت للمهندس(....) طلبت منه وقف الشغل في موضوع الجوان سألني ليه قولتله حضرتك قولتلي الزجاج لو انكسر انا هشيل تمنه فبلاش احسن انا هاعمله في حتة تانية او توكيل تاني
وهنا كانت الصدمة التانية قاللي يأخي متقلقش وربنا هيسترها قولتله لا متشتغلش
قاللي طب انا بطمنك الزجاج مش هينكسر ومتشغلش بالك بالموضوع ده وفي اللحظة دي اتأكدت ان سيادته كان بيعمل شغل على قفايا وغير كل ده قاللي العربية هتبات ليلة عندي
المهم في اليوم الثاني رحت مكان تاني واصرت احضر التغيير بنفسي لاقيت الموضوع كله عبارة عن سلك دوبارة وشخص واحد هو اللي عمل الشغلانة بنفسه من اولها لأخرها وخدت العربية في نفس اليوم بس أخر النهار وبدون تكلفة عالية وأقل من السبع
أنا بحكي القصة مش عشان التشهير بالتوكيل على العكس التوكيل محترم جدا مهندسين الأستقبال اللي اتعاملت معهم زي المهندسة روىء والمهندسين مهند وأحمد وإسلام وغيرهم محترمين جدا
بس للأسف المهندس (.....) كذب على وحاول يخدعني ويظبطني ويعمل على شغل
أنا بحكي القصة دي عشان اعضاء المنتدى يأكدوا لي انا فعلا كنت هظبط ولا كلامه كان مظبوط خصوصا مكنة فك الزجاج ام سن مش عارف شكله ايه
أنا بحكي القصة عشان توكيل السبع يأخد موقف مع المهندس الذكي جدا ده وموقف حاسم لان النصب على العملاء نتيجته هتكون سيئة على المركز
انا عملت شكوى فعلا في المهندس ومنتظر نتيجتها فعلا وهتابعها بنفسي ومش هأرضى بشيء غير معاقبة هذا المهندس أشد العقاب