طلب ضرورى مشكلة فى الطبلوة

**m.elsherif** · 20-07-2013 12:56 AM

خلصنا التراويح يا ابو صلاح

**salah_86** · 20-07-2013 01:56 AM

معلش ياباشا اتاخرت عليك
بص باشا هتسمى بالله وتنزل الدركسيون لتحت وبعدين تجيب مفك صليبة متوسط بس تلف ايدة بفوطة ناعمة علشان ميحكش فى فبرة الدركسيون هتلاقى فوق العدادات مسمارين فى الفبرة السودة اللى راكبة فوق العدادات واحد يمين والتانى شمال هتفكهم وتمد ايدك تخلع الفبرة دى بس بحذر علشان متتكسرش هتلاقى العدادات قدامك مربوطين ب 3 مسامير اتنين فوق واحد يمين والتانى شمال والتالت هتلاقية تحت فى النص هتفكهم وقبل ما تشد لو حة العدادتت مد ايدك على الشمال بحذر واخلع الفبرة اللى فيها زرار تحكم مرايات الجانبية علشان يسهلك خلع لوحة العدادات خد بالك هتلاقى فيشتين ورا لوحة العدادات اخلعهم براحة وطبعا انت عاوز تفكهم علشان تنضفهم
هتفك الباغة بمنتهى الحذر لانها بكليبسات وتنضف وتركب تانى وبالهنا والشفى

**m.elsherif** · 20-07-2013 09:06 AM

شكرا يا ابو صلاح

**ehabahmedie** · 20-07-2013 11:38 AM

الله ينور عليكم جميعا، وربنا يتقبل الصيام والقيام

**mahmoud85** · 22-07-2013 12:51 AM

طب ماحدش يعرف ازاي اصلح بكره التكييف بتاعه السخن والبارد ... لانها مش بترضا تلف علي الساخن واقفه عالبارد فقط
وانا عاوز اصلحها عشان انضف دوره التبريد كلها علي بعضها

**mr_vampire** · 22-07-2013 01:13 AM

المشاركة الأصلية كتبت بواسطة mahmoud85

طب ماحدش يعرف ازاي اصلح بكره التكييف بتاعه السخن والبارد ... لانها مش بترضا تلف علي الساخن واقفه عالبارد فقط
وانا عاوز اصلحها عشان انضف دوره التبريد كلها علي بعضها

يااما السلك اللي بيشد البوابة مقطوع. او لو بتلف وترجع تاني يبقي البوابة بتاع البارد والساخن عايزة تتنضف عشان تفتح وتقفل بسهولة.

واعتقد الليلة ده محتاجة بتاع تكييف افضل .

**ehabahmedie** · 22-07-2013 10:03 AM

السلام عليكم

مشكلة بكرة التكييف أظن انها مشكلة شائعة في البومة - أنا شخصيا عدت عليا 4 بومة غير بتاعتي فيعا نفس المشكلة
وكنت محتاج اعملها عشان اغير مياه الرادياتير بنفسي

واللي شفتها عندي ان بداية الكابل اللي بينقل الحركة من البكرة للبوابة تحت الدريكسيون بتكون متنية

انا حليت الموضوع عندي بإني فكيت الكابل من عند البوابة، وأنا قاعد على الكرسي ببقى عارف مكان البوابة في وبقدر أغيرها بإيدي للساخن والبارد، بصراحة قلت الواحد هيعمل الموضوع ده مرتين ولا 3 في السنة فمرضتش افكر في حل

وكنت قريت على المنتدى قبل كده ان حد راح لبتاع تكييف وغيرله الكابل بالكامل، بس حسيت ان الموضوع مش مستاهل

الصورة دي فيها شكل الحلقة اللي بتوصل الكابل للبوابة والمكان اللي راكبه فيها بعد مافكيتهم

الموضوع محتاج انك تدخل تحت الدريكسيون وببنسة شعر أو مفك رفيع تفك سنة من اللي قافلة على الحلقة وتشد الجنب ده لبرة ثم التانية وهتلاقي الحلقة كلها طلعت
بعد كده تبقى تشد أو تدفع الذراع اللي كان راكب فيها الكابل عشان تحول من الساخن للبارد

وبالمرة هات اسبراي تنظيف (اللي بدون زيت) من عند محلات الاليكترونيات وامسح بيه التروس (لو عليها تراب كتير) وحط شحم جديد

**mahmoud85** · 22-07-2013 12:24 PM

معلش لو ممكن ترقم عالصوره ايه اللي بيتفك وايه اللي بيتشد ؟ والدراع اللي بيحول لسخن وبارد

**ehabahmedie** · 22-07-2013 03:31 PM

السلام عليكم

يافندم انت تؤمر

أولا: انا خليت الصورة بالإتجاه الصحيح زي ماهي موجودة في العربية، وكل الشغل ده يبقى تحت الدريكسيون وفوق دواسة البنزين ، يعني في الجزء الأوسط من العربية اللي في الولاعة والفتيس بس من فوق رجلك اليمين

ثانيا: الصباع البلاستيك اللي تحت الحلقة فيه سنتين بلاستيك عاملين زي السوستة (فكرتها زي الصورة دي مع اختلاف الشكل)

طيب انت لو عايز تخلع الحلقة الرصاصي اللي موصلة بآخر الكابل محتاج تضغط على السنتين اللي في الجنبين مع بعض أو كل واحدة لوحدها، ودي محتاجة شوية مسايسة وخيال: يعني لو عندك أي حاجة تضغط السنتين وتقدر -في نفس الوقت- انك تسحب الحلقة الرصاصي يبقى تمام، لو هتعمل كل واحدة لوحدها يبقى ممكن ببنسة شعر أو مفك رفيع تضغط سنة كليبس وانت ضاغط تحاول تشد الحلقة لبره شوية عشان تبقى فوق السنة دي وانت شادد تضغط بعدها السنة التانية -يبقى انت كده عملت بمبدأ فرق تسد-

خلاص انت كده فصلت المفتاح اللي في التابلوة عن بوابة التحويل بين الساخن والبارد، والمطلوب انت تعمل التحويل ده بإيدك، طييييييب يبقى هتضغط الذراع اللي في الصورة بصباعك (هتلاقيه جامد شوية، وأوعى تتعور) أظن للبارد ولو سحبته عليك هيبقى التدفئة

الصورة هتوضح أكتر ولو في أي استفسار تاني أنا في الخدمة