لمبة البنزين نورت في الطبلوة

**M.Al-Hefnawy** · 11-07-2011 09:59 PM

النهارده لاقيت فجأة لمبة البنزين بتنور في الطبلوة من إنني لسه مفول العربية إمبارح والمؤشر نزل تحت للآخر وبعد شوية طفت اللمبة وبدأ المؤشر يعلى تاني ببطء شديد لغاية النص وركنتها في الجراج وكان قبل ما اروح مشواري فوق على الآخر وامسافة صغيرة تقريبا 20 كيلومتر اللي مشيتها.

العربية لانسر بومه 2009 وكيل وبحط بنزين 92 وماشية 34000 كيلومتر.

يا ريت حد يقولي أيه السبب في اللي حصل؟

**sayed911** · 11-07-2011 10:39 PM

جرب وحط بنزين لو لقيت فيها يبقى العوامة غالبا محتاجة يتبص عليها لو ملقتش فيها بنزين اكشف على التانك يا فندم ولكن ده بسرعة جدا وبدون تهاون من فضلك ..

**mr_vampire** · 12-07-2011 12:30 AM

العوامة بتركن بس. لو حضرتك بتمون والعربية دايرة تبقي طفيها لان ضخ مسدس البنزين سريع فممكن العوامة مابتلحقش تعلي معاه بسرعة بدليل انها بعد فترة بتطوف علي سطح البنزين بس ببطء.

حصل معايا مرتين وبقيت ابطل وانا بمون واتظبطت.

بس انا كنت سمعت انا في مشكلة في عوامة اللانسر هنا من الشباب فأتقل كدة نسمع برده رأي الشباب.

**Ralliart** · 12-07-2011 01:36 AM

احتمال العوامة تكون محتاجة تغيير هي ب450 جنيه في التوكيل

**prisoner** · 12-07-2011 09:22 AM

ده عيب شائع فى معظم البومة ليا واحد صاحبى بتحصل معاه دايما عربيته 2006 خليجى نفس الاعراض وبعد كده الامور بترجع تانى مش عارف هوة عيب فى العوامة والا ايه بس للعلم لو عيب فى العوامة وشربت بنزين يبقى مترجعش تقرا تانى تحياتى

**M.Al-Hefnawy** · 12-07-2011 12:23 PM

الحقيقة اول مرة يحصل معايا الموضوع ده وانا دايما بمون والعربية مطفية. بس دي عاوزة ميكانيكي ولا كهربائي؟

**mohammedabdallh** · 12-07-2011 01:21 PM

المشاركة الأصلية كتبت بواسطة egy77

الحقيقة اول مرة يحصل معايا الموضوع ده وانا دايما بمون والعربية مطفية. بس دي عاوزة ميكانيكي ولا كهربائي؟

كهربائى يا باشا
ومتخفشى عادى يعنى بتحصل كتير فى كل العربيات وترجع تشتغل تانى ((كبر دماغك )) اهم حاجه تيقى عارف مشاويرك بتاخد بنزين اد ايه وخلاص انا كان معايا عربيه قبل كدا العوامه بيظه
وكنت ماشى بيها عادى وكل اسبوع اروح افول وخلاص وزى ما تاخد تاخد

**M.Al-Hefnawy** · 12-07-2011 10:18 PM

متشكر جدا على الردود يا جماعة انا فعلا روحت للكهربائي وقالي خليها لغاية لما تجيب آخرها لأن النهارده لاقيتها مظبوطة وقالي أجيب واحدة استعمال بـ 150 جنيه.

**samyrizkb** · 13-07-2011 05:13 PM

انا معايا لانسر بومة 2004 و بحطلها بنزين 92 و بتعمل نفس الحركة احيانا تعمل و احيانا تنزل على الاخر ببطء و لمبة البنزين تنور و فاجاة يعلى المؤشر ببطء و رحت للكهربائى عندما كانت منورة فلمس الارضى بتاع العوامة لكن المؤشر لم يرتفع و اللمبة لم تطفىء و قالى ان ده مش عيب عوامة .. رجاء من خبراء اللانسر افيدونا ما العمل لانى مش عاوز اروح لحد يلعب فى العربية ولكم كل الشكر