الموضوع: شاى الأبنودى

من كتابات عبد الرحمن الأبنودى
قصيده تنقل لمحه من سـتينات المجتمع المصرى من القرن الماضى
قرأتها و أحببت أن أنقلها لكم
----------------------------
كباية شاى

على كرسى ف قهوة ف شارع شبرا
قعدت
وجاب لى كباية الشاى الجرسون .
- كباية شاى القهوة غير كباية شاى البيت خالص .

بصيت له كتير
مش عارف ليه
من مده طويله ماشـفـتـش حى .

كان الشارع نابض فيه الدم المطفى وحى .
مر عليا الراجل لاصلع خالص .
و البنت اللى ف إيدها طبق الفول الناقص خالص .
و الست اللابسه التوب اللسود خالص .

مرت عربية جديدة وفيها ناس وشها ساكت خالص
وولد بيكلم بـنـت ع التلتوار
بالحس الواطى
وخايف خالص .

وعلى التلتوار التانى كان دكان فكهانى منظم خالص ...
و نيونُه مشعلل أنوار خالص خالص

وقعت سـنجة تروماى ( خمسة ...)
طلع الولد - المتشعبط - ركبها
وركب من باب التروماى قدام الكومسارى
شافه ما كلمهوش خالص .

عدى الراجل اللى مانزلشى من ع العجلة بقى لُه ست سنين...
كان تعبان جداً
وموطى
ومش بيبدل خالص .

اخد الجرسون قرشين بقـشيش
بص لى جداً .. جداً
واستغرب خالص خالص خالص ..!!

(1967)
_________________

مع أجمل تمنياتى ...

المشاركة الأصلية كتبت بواسطة MaZaGAngeE

الكلام ده - مع انه جميل و معبر - هل يستحق 500 الف جنيه شهريا ؟ اظن ان السبب الوحيد ان الابنودي شيوعي وده اللي خلاه شاعر مهم جدا مع وجود شعراء كتير احسن منه لكن عشان اسلاميين او مش شيوعيين تم دفنهم احياء ..

مزاجانجى بك

الموضوع عن قصيده شعر أعجبتنى و أحببتُ ان اشاركها معكم

و حضرتك تتكلم عن 500 الف شهرياً !!! بتوع ايه ؟؟
و الشيوعيه
و شعراء اسلاميين
و ناس دفنوا احياء !!!
بالأضافه لشعور قوى بالأضطهاد

هل ترى ان هذا الموضوع يناسبه هذا الرد ؟؟

و للا الصيام عامل عمايله معاك ؟؟

كل رمضان و كلنا أقرب لله

و لبعضنا البعض ...