اشتريت e250 2013 وتقرير حصري وتقرير عن الـ a200 حصري لنايل موتورز

بسم الله الرحمن الرحيم

السلام عليكم ورحمة الله وبركاته


دي اول مشاركة ليا بشكل رسمي هنا في قسم مرسيدس وان شاء الله مش ها تكون الأخيرة :)

الحقيقة الموضوع كان سريع ولكن مرسيدس معتقدش بتحتاج دراسة او غيرها

الموضوع كله انه والدي نازل يستقر في مصر في الفترة اللي جية وكان موكل عمي يدورله على عربية يعني لحياته هنا في مصر
فلقيت عمي بيقولي انه لقا عربية كويسة وخلص فيها كمان وجي بيها يسلمهالي
فأنا والدي كان قايله معاك ميزانية لحد 300 الف اقصى حاجة
فلقيت عمي جي وجايب E250 انا قولت الحج ها يولع فيا انا وعمي في نفس واحد :D :D

استلمت منه العربية فسألته على السعر الحقيقة السعر كان حلو مقارنة بالعربية

العربية كانت stock موديل 2011 اشتريناها من 10 ايام بخصم 60 الف جنيه عن سعرها الأصلي وده رقم كبير جدا من وجهة نظري فالعربية سعرها واقف علينا 520 الف جنيه كاش
العربية اعلى فئة ( افنجارد ) بس الحقيقة انا مكونتش قرأت اي كلمة عن العربية قبل كده فمسكت الكتالوجات بقى وقعدت ذاكرتها عشان افهمها كويس
العربية اعلى فئة بفتحة سقف والفوجات الجديدة
المحرك 1800 سيسي وهوة نفس محرك الـ E200 بس الفرق في القدرة الحصانية
الكتالوجات الحقيقة جية في علبة شيك وده لفت انتباهي
http://i94.photobucket.com/albums/l1...psaf1b9962.jpg
http://i94.photobucket.com/albums/l1...ps2c24409f.jpg
http://i94.photobucket.com/albums/l1...ps677f27fe.jpg
الشنطة الجلد عجبتني فكرتها الحقيقة :)

قعدت طلعت ورقة وقلم وقعدت 5 ساعات بسلي صيامي في الكتالوجات وعرفت ازاي الأوامر الأساسية على الأقل اعملها في العربية وطلعتهم في ورقة بيضا واستعنت بالله ونزلت ركبت العربية وقولت اقعد اجرب لسة دي اول دخلة ليا فيها طبعا

فتحت العربية وبركب طبعا ريحة الجلد حلوة حقيقي حطيت المفتاح في الكونتاكت ودي اول حاجة لفتت انتباهي انهم لغوا فكرة انه المفتاح يلف لوحده بقيت فيه تكتين والتالتة العربية بتكملها لوحدها ودي اول حاجة ملفتة

العربية دارت كل الشاشات اشتغلت والأجهزة بدأت عايز مثلا اشغل الإضاءة والفوجات وهنا كانت الصدمة العربية حاجة والكتالوجات حاجة مختلفة تماما !! العربية بتقول حاجة والكتالوج بيقول حاجة مختلفة زراير مش موجودة وزراير موجودة في العربية مش موجودة في الكتالوج حاجة مستفزة جدا لغايت ما لقيت مفاتيح الإضارة بتاعت العربية في الجنب الشمال من الدركسيون
http://i94.photobucket.com/albums/l1...psd51b4fc6.jpg
واستنتجت فكرة اني احطها على الـ Auto والعربية بتعيش مع نفسها


طبعا الكتالوج بيقول انه العربية فيها 3 Zone للتكيف مفيش الكلام ده الكتالوج بيقول انه العربية فيها كاميرا night vision عشان لو سايق مفيش الكلام ده برضوا الكتالوج بيقول الدركسيون فيه تكييف برضوا مفيش الكلام ده وكاتب انه فيها اوبشن تعلية وتوطية العربية مع اني متاكد انه الأوبشن ده مش موجود غير في فئة الـ S بس اصلا اوبشن الـ keyless entry اني مش محتاج اطلع المفتاح من جيبي وادور العربية من زرار الـ Start engine مفيش الكلام ده برضوا عشان مفيش زرار اصلا ! مكتوب انه فيه اوبشن starts stop economy اني لما اقف في اشارة واشيل رجلي من على الفرامل العربية تبطل لوحدها ولما ادوس تاني تدور مفيش برضوا فحاجة سخيفة جدا اني اشتري عربية بكتالوج بيوصف عربية تانية اصلا ! دي حاجة محتاجة تعليقات كتير يعني
الحقيقة عمي قالي الـ E300 مرمية في معرض التوكيل محدش راضي يعبرها طبعا فيها اوشنز اعلى كمان من الـ E250 وموتور اقوى بكتير بس ضريبة سنوية 15 الف جنيه وسعرها 800 الف جنيه غير طبعا الـ Resell value بتنزل للنص تقريبا ومبتمسكش سعر فعشان كده وقع الإختيار على الـ E250

العربية مسجلة انها محتاجة تعمل صيانة فقولت العربية بقالها سنتين مركونة يعني احجز نشوف الصيانة وفي نفس الوقت اقعد مع حد من المهندسين يفهمني العربية دي شوية
فإتصلت بالتوكيل تاني يوم وحجزت ميعاد للصيانة في توكيل جسر السويس فعشان اوضح لحضراتكم مرسيدس ليها 3 موزعين رسميين في مصر ( موزع عن القاهرة - موزع عن الجيزة - موزع عن الإسكندرية ) العربية بتتمتع بالضمان لدى التلاتة والأسعار بتبقى فرق ثابتة الفرق بس في الهدايا مش اكتر
حجزت ميعاد الساعة 9 الصبح يوم السبت وصحيت من 8 ونزلت دورت العربية واخدت اخويا معايا واتحركنا !
ملاحظات على العربية
السينسور بتاع الراكب لازم يكون لابس الحزام ومينفعش يتطفي
السينسورز الأمامية في السيارة مزعجة جدا جدا جدا جدا جدا جدا وبتشتت التركيز لأقصى درجة الحقيقة يعني مش طبيعي اني واقف في اشارة وواحد عدى على رجليه من قدام العربية العربية بتفضل تزمر ولا طبيعي اني داخل في شارع ضيق بفضل سامع الصوت من اول الشارع لحد اخره بتنبهني ! مع العلم انه ممكن اطفاء الأوبشن فحسيت انه مشتت اكتر ما هوة مفيد للسواق الا لو بتركن في مكان ضيق جدا وبتناور يعني
وصلت التوكيل الساعة 9 بالضبط فرع القطامية فداخل موظف الخدمة بيقولي تحت امرك قولتله صيانة الألف وقالي حضرتك مرسيدس ملهاش صيانة الف :) احنا هنا 10 الف دايركت من الزيرو :) قولتله العربية مسجلة انها عايزة صيانة قالي اه يبقى فات عليها سنة :) فإتفقنا على انه ها يعمل صيانة 1000 يعني يغير زيت وفلتر زيت والمهندس اصر على تغيير زيت الفرامل عشان العربية بقالها اكتر من سنة والزيت اكيد رطب فوافقت على مضض يعني لأني مش شايف له داعي
فالموضوع كالآتي انه ها يعمل الآتي
1- فلتر زيت
2- 6 لتر زيت موتور
3- زيت فرامل
4- تشيك على العربية وكل حاجة
من المساوئ اللي شوفتها في التوكيل اني مش مسموحلي اشوف العربية زي اي توكيل تاني العربية بتبقى معزولة تماما عن العميل
الصيانة بطيئة الى اقصى درجة يعني العربية داخلة الساعة 9 خارجة الساعة 1 والمهندس مصر انه هنا في مرسيدس الدقة هي اساس العمل والدقة تتطلب العمل بتأني ولو انا مستعجل في عربية ممكن اخدها اعمل مشواري لحد ما عربيتي تخلص فدي نقطة محتاج اسجلها ليهم
كل عربية ليها مهندس خاص بيها بيتابعها من اول ما تدخل لحد ما تخرج في التوكيلات التانية بيكون مهندس واحد بيستلم وبيبعت للورشة هنا كل عربية ليها مهندس معاها
مكان الإنتظار حضراتكم ها تشوفوه في الصور التالية
في شوية اكسسوارات معروضة للملاك كتي شيرت او ساعة او زراير قميص او ماديلية او مج للنيسكافيه كلها منتجات مرسيدس وشايفها مش وحشة بس بصراحة مدققتش عليها وانا قاعد مستني الصيانة اخدت جولة على العربيات المعروضة وعرفت الآتي انه الـ E نازل منها اخر السنادي الـ Face left وانه الـ E200 الجديدة بقت بـ 508 الف جنيه يعني انا جبت عربية اعلى بفرق 15 الف جنيه تقريبا مع العلم انه الـ E200 الجديدة مفيش فيها فتحة سقف والكراسي مانيوال مش كهرباء ومفيش فيها ميموري وطبعا فرق الجنط والزينون كل ده انا اخدته بـ 15 الف جنيه وضحيت بفكرة اني راكب موديل السنة طبعا من الحاجات اللي لفتت انتباهي انه الموديل الجديد بقى بينزل بفتيس 7 نقلات مع العلم اني انا 5 نقلات انا عندي الفتيس مكانه الطبيعي بين الراكب والسائق في الجديدة نازلة زي العربيات الأمريكي كلها ورا الدركسيون وده شئ محبتهوش الحقيقة يعني وحسيته مزعج يعني الى حد ما
دي شوية صور للموضوع

http://i94.photobucket.com/albums/l1...psb591c03f.jpg
http://i94.photobucket.com/albums/l1...ps19b1902d.jpg
http://i94.photobucket.com/albums/l1...ps91c3702d.jpg
http://i94.photobucket.com/albums/l1...ps8052a5ba.jpg
http://i94.photobucket.com/albums/l1...ps204c1f36.jpg
في الصورة اللي جية حضراتكم ممكن تلاحظوا مكان الفتيس الجديد بقى على اليمين ورا الطارة

http://i94.photobucket.com/albums/l1...psc2550e9d.jpg
http://i94.photobucket.com/albums/l1...ps350e08e2.jpg
http://i94.photobucket.com/albums/l1...pscd36cbf9.jpg
http://i94.photobucket.com/albums/l1...ps2c848135.jpg
http://i94.photobucket.com/albums/l1...ps302be55f.jpg
http://i94.photobucket.com/albums/l1...ps3b8ec9da.jpg
http://i94.photobucket.com/albums/l1...ps9a5d24f9.jpg


ملحوظات بقى

العربية كتسارع بالنسبالي مرضي جدا جدا جدا حتى وهيا ع وضع

بسم الله ماشاء الله ربنا يديك خيرها ويكفيك شرها

العربية كتسارع بالنسبالي مرضي جدا جدا جدا حتى وهيا على وضع الـ Economic
العزل جيد مش ممتاز ومازلت مصر عند رأيي انه كان ممكن يبقى افضل !

فيه اوبشن غبي غبي غبي غبي غبي غبي غبي غبي الى اقصى درجة الحقيقة في العربية
وده انا اشتكيت منه في التوكيل وحوالي 3-4 عملاء تانيين ايدوني ومفيش حل ليه عند التوكيل في مصر

التكييف لو ركبت العربية وشغلت الدورة الداخلية بحيث انه التكييف مياخدش هواء من برة ويفضل بياخد من جوة بس العربية كل 45 دقيقة ها تطفي الزرار وتبدء تجيب هواء من برة وحجة التوكيل انه الشركة المصنعة مقتنعة انه العربية لازم تاخد fresh air كل 45 دقيقة من برة طيب يا جماعة مينفعش بعد ما ياخد يرجع يقلب تاني داخلي قالك لا ! طيب ينفع اطفي الأوبشن ده قالك لا فالعملاء مخنوقين جدا من التكييف بسبب الموضوع ده انه مش منطقي العربية كل 45 دقيقة تبدأ تجيبلي هواء من برة وحضراتكم عارفين الجو برة عامل ازاي

العفشة دي بصراحة اسجل اعجابي بيها جدا رائعة رائعة بكل ما تحمل الكلمة من معنى مريحة جدا !

مضايق من موضوع الكتالوجات ده وسجلت شكوى في التوكيل الحقيقة

عاجبني انه العربية بقت تنزل بدريكسيون الـ S برضوا

تكلفة الصيانة الإجمالية قولت اخليها للأخر عشان ارفع ضغطكم معايا العربية اتكلفت 1800 جنيه عشان ما تم ذكره فوق

مع العلم انه فيه 50 جنيه عشان العربية بتتحط على Scanner دي اجباري كل مرة ادفعها ولا نقاش فيها ومرفوض طبعا اجيب زيت من برة والتوكيل بيستعمل زيت شل لكل العربيات وممنوع منعا باتا

التوكيل الخدمة فيه ممتازة والإهتمام بالعميل ممتاز الحقيقة

العربية 69 لتر يعني حوالي 70 لتر

فيه غسيل مجاني للعربية كل مرة بعد كل صيانة

الصيانة في مرسيدس بتمشي اما ( مرة في السنة او كل 10 الف كيلو ) ايهما اقرب اعتقد زي توكيلات تانية كتير يعني
طبعا ليهم خدمة طوارئ زي البافارية مع اني لم اتعامل مع البافارية مطلقا الحقيقة

التقرير ده من كتابتي الشخصية بالكامل وهوة اهداء لنايل موتورز واي استفسار في العربية انا تحت امر حضراتكم وها اعمل موضوع بأوبشنز العربية وتجهيزاتها طبعا في القريب العاجل ...

ما شاء الله ربنا يباركلك فيها

ما شاء الله ,, ربنا يباركلكم فيها و يحفظهالكم من كل سوء

بسم الله ما شاء الله
ربنا يبارك لكم فيها يابو السيد :) و يحفظهالكم من شر العين

بالنسبة للكتالوج انا لاحظت الموضوع دة في عربيات تانية لا اذكرها حاليا
و العنوان انت كاتب فيه a200

الف مبروك وربنا يكفيك شرها ويديك خيرها

في اثناء الصيانة الطويلة المملة لعربيتي نزلت ساحة العرض واتفرجت على العربيات المعروضة الحقيقة من اول ما نزلت الساحة لفت انتباهي عربيتين الـ Glk ودي تقريبا الناس عارفاها كتير ولكن اللي لفت انتباهي اكتر هو الـ A200 وحبيت اوريها لحضراتكم طبعا
http://i94.photobucket.com/albums/l1...ps3f97a6f9.jpg
http://i94.photobucket.com/albums/l1...psc52d3674.jpg
http://i94.photobucket.com/albums/l1...ps7da0e166.jpg
http://i94.photobucket.com/albums/l1...ps79ee9413.jpg
http://i94.photobucket.com/albums/l1...ps324c2337.jpg
http://i94.photobucket.com/albums/l1...psd1822517.jpg
http://i94.photobucket.com/albums/l1...pscb77cc97.jpg
http://i94.photobucket.com/albums/l1...ps3289de02.jpg
http://i94.photobucket.com/albums/l1...ps37d3e3c4.jpg
http://i94.photobucket.com/albums/l1...ps2102eb68.jpg
http://i94.photobucket.com/albums/l1...psc5dbb706.jpg
http://i94.photobucket.com/albums/l1...psa77abadc.jpg
http://i94.photobucket.com/albums/l1...psf1295b2d.jpg
http://i94.photobucket.com/albums/l1...ps7a1358cc.jpg
http://i94.photobucket.com/albums/l1...ps3540e45e.jpg
http://i94.photobucket.com/albums/l1...psdb3caaf2.jpg
http://i94.photobucket.com/albums/l1...psb78f2433.jpg
http://i94.photobucket.com/albums/l1...ps6ff4af2d.jpg

العربية جميلة ولكن محسيتش اني ممكن ادفع 408 الف جنيه في عربية الى حد ما عايز اقول عليها كلمة عادية ! فيه فئة تانية كانت اقل بحوالي 100 الف جنيه ومكانش فيها اي حاجة برضوا الحقيقة فوانيس عادية جنط عادي مفيش جلد ولا شيفترز ولا الهوا ! وبرضوا حسيتها Over priced بشدة يعني ! فحسيت الـ A كفئة مش متوقعلها نجاح اصلا وحسيتها فئة ها تفشل فشل كبير طبعا الصالة كان فيها S - C - GLK - B برضوا بس دول اعتقد يعني الناس عارفاهم فمحبيتش اتفرج عليهم ولكن انا قضيت وقت طويل جدا في الـ A وفي النهاية خرجت بنتيجة غير مرضية عنها برضوا !!

بسم الله ما شاء الله .الله اكبر عليها ربنا يحفظهالك من العين و يديك خيرها ويكفيك شرها
نصيحة من اخ بمناسبة الشهر الكريم لو فى مقدرة انك تدبح حاجة للعربية ما تتاخرش :)

انا اختصرت الموضوع كتير ومحبتش اتكلم عن انظمة الفرامل والأمان والإيرباجز في الـ e عشان مطولش على حضراتكم + اكيد حضراتكم عارفينها مسبقا ولكن ها اعمل مشاركة هنا داخل الموضوع بالأوبشنز اللي العربية بتنزل بيها ودي لما ادرسها مع الوقت اكثر يعني :)
حبيت بس انوه اني لما اتعملت مع الـ System في الفئة الـ الخامسة اللي هيا المجابه للـ E حسيت انه الـ interface بتاع البي ام اسهل بكتير وممتع اكتر من بتاع مرسيدس ولكن الماوس بتاع المرسيدس اشيك واحلى واسهل بصراحة

الف مبروك على العربيه

وربنا يديك خيرها ويبعد عنك شرها ويبعد عنك وعنها العين

طبعاٌ بحييك على تقييمك الموضوعى

بس انا عايز اسجل ملحوظه

اتصدمت ان حتى المرسيدس فيها عيوب خنيقه ودايقتك

يعنى حتى المرسيدس فيها عيوب

سبحان الله

كنت متخيل ان الكورى والصينى وبعض اليابانى هما اللى بيبقى فيهم عيوب رخمه وغبيه

انما طلع ان المرسيدس كمان فيها عيوب

اكيد طبعاٌ عيوب عن عيوب تفرق

بس فى النهايه سبحان من له الكمال وحده

بسم الله مشاء الله ربنا يباركلك فيها ومكنتش متخيل ان حتى المرسيدس بتخنق الى بيجبها بس فعلا الكمال لله واحده
وفعلا حاول تطلع حاجه او تدبح وربنا يكفيك شرها

بسم الله ماشاء الله ولاحول ولاقوة الا بالله
ربنا يبركلكم فيها
الالمانى المانى
أهم حاجه تدبحلها حاجه فى الشهر المفترج ده
بالتوفيق

اولا ربنا يباركلك فى العربية و يكفيك شرها ثانيا انا ليا شوية تعليقات على الموضوع :
1-حضرتك قلت انك عملت اتصلت بتوكيل جسر السويس و بعدين الصور اللى مرفوعة من توكيل القطامية فعايز اعرف حضرتك عملت الصيانة فين بالظبط.

2-مرسيدس ليها 5 فروع مش 3 (القاهرة الوطنية(الدقى)رئيسى-الجيزة الوطنية(فم الخليج)رئيسى-الهرم الهندسية(ابو رواش)معتمد-الاسكندرية الوطنية رئيسى-الالمانية(جسر السوييس)معتمد) كلهم فيهم صيانة و بيع و قطع غيار

3-مرسيدس يعنى قمة الامان و الرفاهية و فيه اساسيات فى المرسيدس ما فيش تنازل عنها فحساس حزام الامان لازم يفضل شغال و ما يتفصلش عشان يفكر حضرتك باهمية تركيبك لحزام الامان حفاظا على حياتك و ممكن تتحايل عليه و تحط له فى التوكة بتاعت الحزام قفل بيتجاب من اى محل اكسسوار.

4-سينسور البارك من اسمه معروف انه عشان تستخدمه و حضرتك بتركن و عندك زرار فالعربية بيفصله يعنى ممكن فى الاشارات و الزحام تفصله فمرسيدس ما قصرتش معاك فى النقطة ديه برده ادتك الخيارين.

5-الصيانة فى مرسيدس متظبطة كل 10000 او سنة و فيه عداد صيانة فى العربية بيكتي لحضرتك نوع الصيانة المطلوبة طبعا انت مش هاتعرف مطلوب ايه الا لما تروح التوكيل و المهندس هناك يعمل مراجعة عن طريق برنامج للمرسيدس عنده بيعرفه الصيانة المطلوبة ديه عايزه ايه بالظبط و فى حالتك احتاجت زيت فرامل انت مش شايف له داعى لكن العربية مركونة و صلاحيته و كفائته ممكن تتاثر فبردك مرسيدس بتحافظ عليك و على عربيتك بنظام الصيانة الذكى ده و اساس بتغير زيت وفلتر زيت فى كل صيانة.

6-معظم التوكيلات دلوقتى ان ما كانش كلها ما ينفعش تشوف عربيتك فيها لان حضرتك من المفترض مستامن الناس ديه على عربيتك و كمان مش من المفروض انك تقف و تتابعها بنفسك امال التوكيل معمول ليه و لو سابوهها مفتوحة الكل يتفرج على عربيته يبقا ما حدش هايشتغل لان اكيد العميل هايتدخل فى شغلهم سواء بعلم او عدم علم فمنعا للمشاكل ديه كلها ما ينفعش تشوف العربية و فى الاخر انت بتستلم عربيتك من مكان محترم و ثقة و كفاية ان كل عربية ليها مهندس معاها فيه اكتر من كده دلع.

7-مرسيدس عملت الفتيس فى الدركسيون عشان كذا سبب و ده اوبشن جامد جدا تعرفه لما تركب عربية مجهزة بيه من ضمن الاسباب و ابسطها انها تفضى مساحة فى الكونسول اللى فى النصف بتبقا انت محتاجها كمستخدم و تبقا عصاية الفتيس فى متناول ايدك و حاجات تانية.

8-الاوبشن بقا بتاع التكييف الغبى جدا ده للاسف فى الحقيقة هوا ذكى جداااااااااااااااااااااا و بردك تانى مرسيدس عملاه مخصوص عشان راحة حضرتك لوز التكييف هايفضل شغال فى مقصورة القيادة و بيجيبلك هوا من جوا ان شاء الله مع مشوار طويل و دانك هاتكتم و هاتتعب و هاتتضايق جدا فمرسيدس عشان عنوان للراحة و الرفاهية و الامان عملت الاوبشن ده عشان تعادل الضغط بين الهواء الخارجى و الداخلى و كانك راكب فى مقصورة طيارة يعنى قمة الدلع و الرفاهية.

9-موضوع الكتالوج ده طبيعى جدا فى اى شركة سيارات هيا بتنزلك كتالوج شامل كل حاجة فى العربية مش معنى بقا ان عربيتك مش مجهزة بالاوبشن ده ان الكتالوج غلط و مكتوبلك الكلام ده فى اول الكتالوج و اى كتالوج فى الدنيا كده بيكتبلك حاجتين ان ممكن تكون بعض المواصفات فى الكتالوج مش موجودة فى عربيتك و ممكن تحصل تغييرات كمان فى الكتالوج بدون اشعارك فى طبعات تانية منه يعنى الموضوع ده عادى جدا و ما فيهوش اى غلط.

10-موضوع بقا 1800 جنيه ده برده بقا عادى فى اى صيانة بتعملها حاليا خصوصا انك المرة ديه مش مغير يت و فلتر بس مغير كمان زيت فرامل و لازم العربية تتحط على الجهاز كل مرة عشان يراجعوا على كل الانظمة اللى فيها ده لمصلحتك و بعدين 1800 جنيه فى السنة كويس يعنى انت راكب مرسيدس و بتدفع لها صيانة شهرية حوالى 150 جنيه شهرى يا بلاش و لا ال 128 فى عزها.

تحية ليك على مجهودك و تحية للمرسيدس النجمة المتألقة دائما فى عالم السيارت

ازاي 10000 او كل سنه O.o هي مش السنه المتوسط بيبقي من 20000 الف ل 30000

بسم الله ما شاء الله عربية تحفة ربنا يحفظهالك

مبروك على العربية و ربنا يسلم طريقك بها و يحفظك إن شاء الله.

ما شاء الله روعه فعلا

عندي في ال 316 كل مرة اطفي العربية وافتحها تكون مظبوطة اتوماتيك على الهواء من برة ولازم اقفل عشان بتجيب روايح زفت من برة ومالهاش حل برة بس فعلا ودني بتتعب ولازم بعد شوية افتح الشباك او اجيب هوا من برة

أيوا كدة :)
أنا مستني تقريرك عن ال A
كنت حاطط عينيعليها و متوقع انها تنل في نفس رينج ال f20 بس للأسف طلعت أغلى :(

تحت امر حضراتكم كل التعليقات ها ارد عليها بعد الفطار على طول :)

الف مبروك على العربية .... بي انا حاسس ان بى ام هتتفوق فى الفترة اللى جاية على النجمة ... وخصوصا بالفرق السعر وكمان الاشكال والموديلات الجديدة ..

الله ينور تقرير أكثر من رائع و صور أروع

تسلم ايديك و جزاك الله كل خير على هذا المجهود

بسم الله ما شاء الله

بسم الله ما شاء الله

بسم الله ما شاء الله
و الف مبروك يا سيد بيه
ربنا يبارك لكم فيها

اما بالنسبه لوالدك فقوله يعقل و ميرجعش
هو مش متابع و لا ايه
و ال e تبقي هديه تخرجك هههههه

لو احتاجت اي حاجه قولي
و لو عايز تنقابل و افهمك اللي انت عايزه

و بالنسبه لموضوع الهواء الخارجي
جرب كده تقفله بس و العربية مش دايره
يعني خلي فيها باور و اقفل دايره الهواء قبل ما تدور
و قولي ايه النتيجه

و سؤال بقي
هل لسه عندهم ستوكات 2011 و لا بخ كده

اقتباس:

---

بسم الله ماشاء الله ربنا يديك خيرها ويكفيك شرها

---

ربنا يخليك يا فندم وعقبالك ان شاء الله :)

اقتباس:

---

ما شاء الله ربنا يباركلك فيها

---

الله يحفظك يا فندم :)

اقتباس:

---

ما شاء الله ,, ربنا يباركلكم فيها و يحفظهالكم من كل سوء

---

الله يبارك في حضرتك

اقتباس:

---

بسم الله ما شاء الله
ربنا يبارك لكم فيها يابو السيد :) و يحفظهالكم من شر العين

بالنسبة للكتالوج انا لاحظت الموضوع دة في عربيات تانية لا اذكرها حاليا
و العنوان انت كاتب فيه a200

---

محمد بيه :) انا اكتشفت انه موضوع الكتالوج ده جلوبال اصلا وناس كتير بتشتكي منه لأنه بينزل استاندرد لكل الفئات حتى لدول مبيتنزلش فيها فئات كتير زي مصر مثلا والـ a200 نزلت يا كبير :))

اقتباس:

---

الف مبروك وربنا يكفيك شرها ويديك خيرها

---

الله يبارك في حضرتك

اقتباس:

---

بسم الله ما شاء الله .الله اكبر عليها ربنا يحفظهالك من العين و يديك خيرها ويكفيك شرها
نصيحة من اخ بمناسبة الشهر الكريم لو فى مقدرة انك تدبح حاجة للعربية ما تتاخرش :)

---

الله يبارك في حضرتك يا فندم ومتشكر جدا جدا وصدقني دي اول حاجة فكرت فيها طبعا لأنه رزق جديد وربنا يبارك فيه طبعا :)

اقتباس:

---

الف مبروك على العربيه

وربنا يديك خيرها ويبعد عنك شرها ويبعد عنك وعنها العين

طبعاٌ بحييك على تقييمك الموضوعى

بس انا عايز اسجل ملحوظه

اتصدمت ان حتى المرسيدس فيها عيوب خنيقه ودايقتك

يعنى حتى المرسيدس فيها عيوب

سبحان الله

كنت متخيل ان الكورى والصينى وبعض اليابانى هما اللى بيبقى فيهم عيوب رخمه وغبيه

انما طلع ان المرسيدس كمان فيها عيوب

اكيد طبعاٌ عيوب عن عيوب تفرق

بس فى النهايه سبحان من له الكمال وحده __________________

---

الله يبارك في حضرتك يا رب وعقبالك يا فندم ان شاء الله :)
هيا صدقني مش عيوب بالنسبالي ولكن على قد ما هي حاجات يعني ملفتة يعني فعلا الكمال لله وحده العربية مستحيل تلاقي عربية ترضي كل تطلعاتك ولكن فيه عربية بتبقى راضي عنها بس كان نفسك الحاجات دي تكمل فيها يعني :) والحقيقة حاولت على قد ما اقدر ما ابينش انبهاري بالعربية وتقييمي يكون موضوعي الى اقصى درجة يعني :)

اقتباس:

---

بسم الله ماشاء الله ولاحول ولاقوة الا بالله
ربنا يبركلكم فيها
الالمانى المانى
أهم حاجه تدبحلها حاجه فى الشهر المفترج ده
بالتوفيق

---

الله يبارك في حضرتك يا فندم :)
وان شاء الله قريب جدا ها اعمل يا فندم حاجة كده :) الألماني الماني برضوا دي حقيقة :)

اقتباس:

---

المشاركة الأصلية كتبت بواسطة sayed911

محمد بيه :) انا اكتشفت انه موضوع الكتالوج ده جلوبال اصلا وناس كتير بتشتكي منه لأنه بينزل استاندرد لكل الفئات حتى لدول مبيتنزلش فيها فئات كتير زي مصر مثلا والـ a200 نزلت يا كبير :))

---

بقولك يا سيد
انت بصيت على ال a هل اول فئة فيها انت شايف ان هي متستاهلش سعرها فعلا :(

بصراحه ال a كده مبالغ في سعرها جدا جدا
اللي سيد بيه صورها دي الي بال amg kit و عشان كده عامله 408 الف
بس مبالغ في سعرها برضه
العاديه سعرها معقول لو اقل ب 100 الف فعلا بس برضه حسب الاوبشنز اللي فيها
و لو فاكر صح ال 200 دي هي اللي متورها 1.6 تيربو
اومال ال 250 اللي بالمتور ال 1800 تيربو زي اللي في ال e هتبقي بكام
ثم هي اصلا مستورده و لا بتتجمع هنا ؟

و لو كده ال c الجديده سعرها هيبقي معدي جاااامد

اقتباس:

---

1-حضرتك قلت انك عملت اتصلت بتوكيل جسر السويس و بعدين الصور اللى مرفوعة من توكيل القطامية فعايز اعرف حضرتك عملت الصيانة فين بالظبط.

---

الحقيقة فرع جسر السويس ده قدام توكيل عربيتي التانية ولكن المنطقة هناك سيئة ومحبيتهاش وبصراحة انا عارف التوكيل هناك ولكن انا ساكن قريب من توكيل القطامية فحجزت في توكيل القطامية وصالة العرض دي في القطامية يا فندم :)

اقتباس:

---

2-مرسيدس ليها 5 فروع مش 3 (القاهرة الوطنية(الدقى)رئيسى-الجيزة الوطنية(فم الخليج)رئيسى-الهرم الهندسية(ابو رواش)معتمد-الاسكندرية الوطنية رئيسى-الالمانية(جسر السوييس)معتمد) كلهم فيهم صيانة و بيع و قطع غيار

---

والله يا فندم انا معرفش لأن انا مكونتش عايش هنا :) فلما بقولها كمعلومة بقولها على عهدة الراوي لأني لما استلمت العربية انا كان عندي دواسة تقريبا ANA وهمة لما سلموني دواسة مكتوب عليها CNA فبقوله ايه ده قالي مهو احنا تلاتة
1- ANA
2- CNA
3- GNA
بس اكيد حضرتك ادرى مني يعني لا جدا بس انا لما سمعت منه بتاع السيلز بالنص هوة قال القاهرة الةطنية والجيزة الوطنية والإسكندرية مجابليش فيهم سيرة لا كلمة الألمانية ولا الهرم دي كمان تماما هوة قالي انا فاكر كلمة وطنية دي كويس

اقتباس:

---

3-مرسيدس يعنى قمة الامان و الرفاهية و فيه اساسيات فى المرسيدس ما فيش تنازل عنها فحساس حزام الامان لازم يفضل شغال و ما يتفصلش عشان يفكر حضرتك باهمية تركيبك لحزام الامان حفاظا على حياتك و ممكن تتحايل عليه و تحط له فى التوكة بتاعت الحزام قفل بيتجاب من اى محل اكسسوار.

---

مهو حضرتك عارف انا ببص مثلا لحاجات جانبية يعني مثلا في عربيتي التانية لما مبعديش سرعة الـ 20 مثلا بيفضل صوت الحزام ساكت شوية اول ما اعدي يقعد يزن لحد ما البسه ده المنطقي معنديش مانع انما من التحرك يعني حضرتك ممكن تكون مثلا بتدور ورايح تجيب حاجة من السوبر ماركت في اخر الشارع في اي حال من الأحوال مش ها تزيد سرعتك عن 20 كلم / س يبقى معتقدش ليه اهمية كبيرة فاهم وجهة نظري والحقيقي مهندس التوكيل قالي على خدعة التوكة دي مكانتش في بالي تماما بصراحة :)

اقتباس:

---

4-سينسور البارك من اسمه معروف انه عشان تستخدمه و حضرتك بتركن و عندك زرار فالعربية بيفصله يعنى ممكن فى الاشارات و الزحام تفصله فمرسيدس ما قصرتش معاك فى النقطة ديه برده ادتك الخيارين.

---

انا اللي مضايقني يا فندم انه واصل السينسور الأمامي والخلفي بزرار واحد شئ منطقي انه الخلفي يشتغل مع الـ R لوحده والأمامي يكون هوة اللي بزرار فاهم وجهة نظري
انا مشكلتي انه كان المفروض يتعزل ده لوحده وده لوحده يعني :) هوة ده قصدي بس

اقتباس:

---

5-الصيانة فى مرسيدس متظبطة كل 10000 او سنة و فيه عداد صيانة فى العربية بيكتي لحضرتك نوع الصيانة المطلوبة طبعا انت مش هاتعرف مطلوب ايه الا لما تروح التوكيل و المهندس هناك يعمل مراجعة عن طريق برنامج للمرسيدس عنده بيعرفه الصيانة المطلوبة ديه عايزه ايه بالظبط و فى حالتك احتاجت زيت فرامل انت مش شايف له داعى لكن العربية مركونة و صلاحيته و كفائته ممكن تتاثر فبردك مرسيدس بتحافظ عليك و على عربيتك بنظام الصيانة الذكى ده و اساس بتغير زيت وفلتر زيت فى كل صيانة.

---

اه انا فاهم حضرتك بس مهندس التوكيل اصل على فكرة الـ 10 دول جدا جدا بقى مع اني مقتنع انه رقم قليل نسبيا او عادي يعني ولا حتى 5 انما ايه الحكمة من 10 دي :) والحقيقة كان لافت انتباهي في الـ Idrive فكرة انه معدلات الإستهلاك للتيل الخ الخ الخ والزيوت انما هنا ملقتهاش او بصراحة عشان اكون صريح مدعبستش تماما :)

اقتباس:

---

6-معظم التوكيلات دلوقتى ان ما كانش كلها ما ينفعش تشوف عربيتك فيها لان حضرتك من المفترض مستامن الناس ديه على عربيتك و كمان مش من المفروض انك تقف و تتابعها بنفسك امال التوكيل معمول ليه و لو سابوهها مفتوحة الكل يتفرج على عربيته يبقا ما حدش هايشتغل لان اكيد العميل هايتدخل فى شغلهم سواء بعلم او عدم علم فمنعا للمشاكل ديه كلها ما ينفعش تشوف العربية و فى الاخر انت بتستلم عربيتك من مكان محترم و ثقة و كفاية ان كل عربية ليها مهندس معاها فيه اكتر من كده دلع.

---

مش فكرة مستأمنهم :) انا بس كنت بحب فكرة اني قاعد وشايف الشغل في عربيتي وساعات في توكيلي التاني ممكن الصنايعي يسيب العربية ويقعد يشرب كباية شاي او يرغي مع زميله واضطر انزل انبه المهندس اني مستعجل او حتى لو بيعملوا حاجة ابقى شايف هيا بصراحة مش نقطة ذات اهمية بس كنت حاببها تكون موجودة مش اكتر يعني :) بس صدقني مش بيدخل يتفرج كله بيتفرج من ورا الزجاج وهوة قاعد في التكييف وبيتابع الورشة من بعيد يعني :) وبصراحة انا معاك في حتة الدلع دي :) كل عربية ليها مهندسها :) :)

اقتباس:

---

7-مرسيدس عملت الفتيس فى الدركسيون عشان كذا سبب و ده اوبشن جامد جدا تعرفه لما تركب عربية مجهزة بيه من ضمن الاسباب و ابسطها انها تفضى مساحة فى الكونسول اللى فى النصف بتبقا انت محتاجها كمستخدم و تبقا عصاية الفتيس فى متناول ايدك و حاجات تانية.

---

اصل انا شوفت العربية اللي اترفع فتيسها فوق دي محستش بتغير جذري ولا رهيب في الكنسول قدم الـCup holder لقدام شوية وكان الله بالسر عليما :) يعني الموضوع مكانش مستدعي التغيير :) او يمكن الفتيس الجديد هوة اللي مسدعي فالله واعلم بصراحة + العربيات ذات الطابع الرياضي يعني الفتيس بيكون ارضي حتى الأمريكان نفسهم بقوا بيتجهوا للفتيس الأرضي في عربيات American muscle كتير يعني فالقيادة الرياضية تكون ارضي انما شيفتر في E كلاس حركة ملهاش وقار يعني خصوصا انها عربية مش للجري يعني :) هيا اراء يعني :) منكرش انه الفتيس الجديد مش رخم قوي ولكن يمكن عشان الواحد عينه متعودة على وجود دراع في الكونسول في النص :) وان شاء الله ربنا يدينا العمر ونروح سوا نتفرج على الكونصول واوري حضرتك انهم معملوش التغيير الجذري الرهيب فيه يعني :)

اقتباس:

---

8-الاوبشن بقا بتاع التكييف الغبى جدا ده للاسف فى الحقيقة هوا ذكى جداااااااااااااااااااااا و بردك تانى مرسيدس عملاه مخصوص عشان راحة حضرتك لوز التكييف هايفضل شغال فى مقصورة القيادة و بيجيبلك هوا من جوا ان شاء الله مع مشوار طويل و دانك هاتكتم و هاتتعب و هاتتضايق جدا فمرسيدس عشان عنوان للراحة و الرفاهية و الامان عملت الاوبشن ده عشان تعادل الضغط بين الهواء الخارجى و الداخلى و كانك راكب فى مقصورة طيارة يعنى قمة الدلع و الرفاهية.

---

مهي الفكرة اني مش لوحدي اللي مش عاجبني الأوبشن ده لا فيه ناس كتير مش عاجبهم خصوصا انه الضغط الداخلي في العربية مهما زاد ممكن يتعادل يعني وكان قصدي لما همة شايفين انه لازم يجيب Fresh air يبقى ممكن يخليه يرجع يقلب تاني مثلا بعد 15 دقيقة خارجي يعمل 45 دقيقة داخلي فاهمني :) حتى بيساعد على الحفاظ على تبريد المقصورة اسرع او حتى كان يعمل انه اقل حاجة في الساعة يكون فيها 15 دقيقة خارجي لتكييف ضغط المقصورة انما مش يعمله اجباري و 45 دقيقة فشئ مستفز جدا الحقيقة

اقتباس:

---

9-موضوع الكتالوج ده طبيعى جدا فى اى شركة سيارات هيا بتنزلك كتالوج شامل كل حاجة فى العربية مش معنى بقا ان عربيتك مش مجهزة بالاوبشن ده ان الكتالوج غلط و مكتوبلك الكلام ده فى اول الكتالوج و اى كتالوج فى الدنيا كده بيكتبلك حاجتين ان ممكن تكون بعض المواصفات فى الكتالوج مش موجودة فى عربيتك و ممكن تحصل تغييرات كمان فى الكتالوج بدون اشعارك فى طبعات تانية منه يعنى الموضوع ده عادى جدا و ما فيهوش اى غلط.

---

دي حقيقة فعلا :) اكتشفتها لأنه عربيتي التانية كان الكتالوج بيشرح كل مسمار فيها بالملم وبالنص ومكونتش بلاقي اختلاف يمكن عشان انا جايب الـ Highline خليجي فعشان كده نازلة بمعظم المواصفات الأجنبية فعشان كده محستش بفرق جبار يعني انما ناس كتير اكدتلي اللي حضرتك بتقول عليه انه اختلاف الطبيعة المصرية بتجبر على انه وسائل كتير تتخفض في العربية عندنا :)

اقتباس:

---

10-موضوع بقا 1800 جنيه ده برده بقا عادى فى اى صيانة بتعملها حاليا خصوصا انك المرة ديه مش مغير يت و فلتر بس مغير كمان زيت فرامل و لازم العربية تتحط على الجهاز كل مرة عشان يراجعوا على كل الانظمة اللى فيها ده لمصلحتك و بعدين 1800 جنيه فى السنة كويس يعنى انت راكب مرسيدس و بتدفع لها صيانة شهرية حوالى 150 جنيه شهرى يا بلاش و لا ال 128 فى عزها.

---

انا مش مستكتر الـ 1800 جنيه :) انا بس مستغرب انه المبلغ مقابل ايه هوة ده فكرتي بس :) فقصدي انه مثلا لو بيغير حاجة كبيرة في العربية سير مثلا ولا حاجة اروح عامل حسابي في 7 الاف جنيه مثلا :) انا دافع في صيانتي اللي فاتت 2600 جنيه وعادي جدا بس مقابلها اخدت حاجات كتير اتغيرت انما كنت مستغرب وقولت يمكن عشان بتاخد كمية زيت كتيرة وفي نفس الوقت فلتر زيت غالي الى حد ما :) هوة حاسب زيت الفرامل بسعر عادي الحقيقة مش غالي ولا مأفورين فيه :)

اقتباس:

---

تحية ليك على مجهودك و تحية للمرسيدس النجمة المتألقة دائما فى عالم السيارت

---

تحياتي انا اللي الى حضرتك على المشاركة معايا ومناقشتي اللي استمتعت جدا جدا جدا بيها ومنتظر من حضرتك تعليقات كمان عشان نتعلم ونفيد بعض كلنا :) وكل سنة وحضرتك بألف صحة وسلامة يا رب :)

اقتباس:

---

ازاي 10000 او كل سنه O.o هي مش السنه المتوسط بيبقي من 20000 الف ل 30000

---

همة فرض اجبار بقى :) حتى مع اني قولتله متوسطنا في العيلة حوالي 15-20 الف في السنة اصر انه كل 10 تيجي تعمل صيانة فمش مشكلة كبيرة يعني :)

اقتباس:

---

بسم الله ما شاء الله عربية تحفة ربنا يحفظهالك

---

ربنا يحفظك يا فندم ويخليك :)

اقتباس:

---

مبروك على العربية و ربنا يسلم طريقك بها و يحفظك إن شاء الله.

---

متشكر جدا لحضرتك والله يبارك فيك يا رب

اقتباس:

---

ما شاء الله روعه فعلا

عندي في ال 316 كل مرة اطفي العربية وافتحها تكون مظبوطة اتوماتيك على الهواء من برة ولازم اقفل عشان بتجيب روايح زفت من برة ومالهاش حل برة بس فعلا ودني بتتعب ولازم بعد شوية افتح الشباك او اجيب هوا من برة

---

طيب ده انتا رحمة شوية قول كل مشوار ماشي مقبولة :D انما انا كل 45 دقيقة لحد ما بقت ايدي مبرمحة :D :D كل نص ساعة اروح ادوس عليه اطفيه واعيد تشغليه تاني :D منتا عارف يا استاذ كريم المخ المصري مبيغلبش :) المشكلة اني متفق معاك جدا وكل العملاء معايا في التوكيل قالولي انه التكييف لو فاهم انه بيجيب Fresh air هوة في الحقيقة بيجيب شوية زبالة علينا جوة يعني ايه المنطقي اني ابقى واقف عالدائري وشبكة عربيتي لاحمة في شكمان عربية نقل ويجي طالع ينفخني وراه بشوية جاز محروق يدخلوا على التكييف يحرقوا صدري :) المانيا محتاجة تعيد النظر في عربياتنا فعلا وانا متأكد انه عندك في البافارية لو اتكلمت ها تلاقي ناس مسجلة شكاوي كمان زيي

اقتباس:

---

أيوا كدة :)
أنا مستني تقريرك عن ال A
كنت حاطط عينيعليها و متوقع انها تنل في نفس رينج ال f20 بس للأسف طلعت أغلى :(

---

عيب عليك يا كبير انا تحت امرك :) انا بالنسبالي كده الـ F20 تكسب وجدا كمان لأنه اكيد الـ هاي لاين فيها ها تكون بسعر اقل من دي اللي اعتقدها مبالغ فيها وبزيادة كمان بس خد بالك اني قولت انه فيه فئة تانية ملحقتش اتفرج عليها كتير واخدتها خطف يعني كانت بأقل من دي بحوالي 100 الف جنيه كاملة يعني كانت رينج 320 مثلا بس طبعا تجهيزات في الجلاش وعادية جدا من جوة والفرش ضهره قماش كمان :)

اقتباس:

---

الف مبروك على العربية .... بي انا حاسس ان بى ام هتتفوق فى الفترة اللى جاية على النجمة ... وخصوصا بالفرق السعر وكمان الاشكال والموديلات الجديدة ..

---

بص اعتقد انه التفوق مش ها يكون كشركة كاملة ولكن ها يكون كفئات يعني لحد النهاردة معتقد انه الفئة السابعة تتفوق عالـ S حتى جريمي كلاركسون كان موافقني في الرأي :) فئة الـ E والخامسة اعتقد اني مش ها اعرف احكم الا لما اركب الخامسة واسوقها عشان احس وان كان تقييمي رايح للـ E عشان الوقار اكتر فيها ولكن مش ها احسمه الا لما اركب الخامسة
بالنسبة للـ C و الثالثة فأعتقد دي مجال تاني خالص مقدرش احكم فيه لأني مركبتش غير الـ C والثالثة اللي ركبتها كانت 316 والـ C كانت 300 فالمقارنة مش في صالح المروحة خالص :) عشان اعرف اقييم الحقيقة :)

اقتباس:

---

الله ينور تقرير أكثر من رائع و صور أروع

تسلم ايديك و جزاك الله كل خير على هذا المجهود

---

تسلم يا رب دايما :)

اقتباس:

---

بسم الله ما شاء الله
و الف مبروك يا سيد بيه
ربنا يبارك لكم فيها

اما بالنسبه لوالدك فقوله يعقل و ميرجعش
هو مش متابع و لا ايه
و ال e تبقي هديه تخرجك هههههه

لو احتاجت اي حاجه قولي
و لو عايز تنقابل و افهمك اللي انت عايزه

و بالنسبه لموضوع الهواء الخارجي
جرب كده تقفله بس و العربية مش دايره
يعني خلي فيها باور و اقفل دايره الهواء قبل ما تدور
و قولي ايه النتيجه

و سؤال بقي
هل لسه عندهم ستوكات 2011 و لا بخ كده

---

الله يبارك فيك يا استاذ شريف :) والله يبارك في عمرك يا رب دايما :) هوة مصر انه البلد محتاجاه :) فأنا متراهن مع اخويا على انه شهرين بالضبط وها يقول حقي برقبتي ويرجع تاني هوة متراهن على انه ها يصمد شوية وها يقعد لحد الشتا :D وفي كلا الحالتين محدش فينا متوقع بالمرة انه يكمل :)

طبعا لو احتجت حاجة حضرتك موجود اخويا طبعا ها اسألك يعني :) وان شاء الله نتقابل على خير ان شاء الله يعني :)

بالنسبة لموضوع الهواء الخارجي المهندس قالي انسا لو عملتلها سانتا كلوز هيا مصممة على اللي في دماغها وكل العملاء قالولي حاولنا فيه بكل الأشكال انسى ها تتعب اعصابك عالفاضي وفي الأخر ها تتأقلم :) وانا اصريت اني اسجل شكوى تتبعت لألمانيا ولكن كل الناس قالولي سبق وبعتوا والرد بيجي بيكون انه نحاول نتأقلم وانه ده من اجل صحة الركاب يعني يعني :)
بس ها اجرب برضوا حاضر

بالنسبة للإستوكات فأه كان عندهم بس عمي كان واخد دي من فرع اسكندرية وقالي فرع المقطم غالبا فيه :) واكدلي كمان فيه الـ E250 بكذى لون لأنه كان معروض الإسود والأبيض ولون كمان مش فاكره الحقيقة وكان فيه الـ E300 دي بقى كتير الحقيقة

اقتباس:

---

المشاركة الأصلية كتبت بواسطة mzeid

بقولك يا سيد
انت بصيت على ال a هل اول فئة فيها انت شايف ان هي متستاهلش سعرها فعلا :(

---

اه بصيت عليها والله يا محمد بيه متستاهلش اي حاجة كراسي قماش الضهر والمقعد الوسطي الفوانيس عادية لا لينس ولا زينون طبعا وسخيفة جدا من جوة ومفيش التابلوه مش جلد وفعلا فعلا فعلا حاجة متستاهل 300 الف جنيه فيها حتى :)

اقتباس:

---

المشاركة الأصلية كتبت بواسطة horas3000

بصراحه ال a كده مبالغ في سعرها جدا جدا
اللي سيد بيه صورها دي الي بال amg kit و عشان كده عامله 408 الف
بس مبالغ في سعرها برضه
العاديه سعرها معقول لو اقل ب 100 الف فعلا بس برضه حسب الاوبشنز اللي فيها
و لو فاكر صح ال 200 دي هي اللي متورها 1.6 تيربو
اومال ال 250 اللي بالمتور ال 1800 تيربو زي اللي في ال e هتبقي بكام
ثم هي اصلا مستورده و لا بتتجمع هنا ؟

و لو كده ال c الجديده سعرها هيبقي معدي جاااامد

---

هوة انا مش عايز اصدم حضرتك بس انا لفيت ورا وتأكدت تماما انها مش AMG :) نهائيا بقى فكنت ها الطم على السعر ده الحقيقة يعني
وانا معايا نسخة من البروشور بس كسلت بصراحا اسكانها واحطها هنا فها اقولك الفئة اللي بي 408 الف دي تشمل ايه بس مكتوب في الورقة انها AMG Exclusive408,000
عشان كان فيه منها AMG sport كانت بـ 342 وبرضوا حاسسها مبالغ فيها جدا مكانتش داخليا مرضية لي بالمرة يعني والفئة اللي بقولك عليها تقريبا اللي هيا بـ 298 او 300 مش متأكد بالضبط تقريبا 4 كواتشات و 4 جنوط وكرسيين مفيش فيها حاجة تشدك تدفع فيها 300 الف جنيه


1-فتيس 7 نقلات DCT
2- موتور 1595 سي سي :) ومش مكتوب انها متربنة كمان :) مكتوب انها 156 حصان عند 5300 لفة فمش عارف بصراحة
3-التسارع 8.3 ثانية
طبعا الفرش الجلد المطعم بالخياطة الحمرا
طبعا باكدج الـ AMG exclusive
dashboard كلها جلد طبعا
fully electronic front seats W.memory
طبعا بانوراما
ومرايات كهرباء
واضاءة داخلية ذكية
وزجاج فاميه
harman kardon sound system
زينون طبعا
و parktronic
collision prevention assist
attention assist
وجنط 18
وبرضوا بكل الحاجات دي على رأيك امال لو نازلة بموتور الـ E ها تكسر الـ 600 الف جنيه على كده ! انا حاطط امل على اني الاقي مكنة جبارة مقابل 408 الف لكن بعد سؤال قومت قريت البروشور يبقى العربية دي اخرها 350 الف وتبقى غالية كمان عشان كلمة AMG عليها بس :) ومع اني متأكد انها مكانتش مكتوبة عليها والله :)

فيه بس حاجة اضافية نسيت اقولها في تقريري الحقيقة وده للأمانة

اني في التوكيل بتاعي سواء ميتسوبيشي او عز العرب بتوع العربيتين التانيين بيكون الحساب في النهاية
صيانة الـ 10000 الف مخصص ليها ساعات مصنعية X وسعر الساعة بـ 150 جنيه
فصيانة الـ 20 مثلا 3 ساعات
صيانة الـ 30 ساعتين
يعني ثابتين عدد الساعات والتغيير بيكون في اسعار قطع الغيار نفسها

في مرسيدس المهندس لفت انتباهي انه السعر بيكون للجوب الواحدة
يعني مصنعية تغيير الزيت بياخد 50 جنيه
مصنعية تغيير الفلتر 30 جنيه
مصنعية ..... الخ الخ الخ يعني مبيمشوش بنظام الساعات اللي اعتقد اللعب فيه كبير قوي وان كنت انا مستظرف نظام كل Job لوحدها بسعر على اساس تفصيلة السعر تبقى مريحة للعميل بشكل اكبر يعني

حاجة كمان في منطقة الـ حجز وكده

انا رحت توكيل كيا وميتسوبيشي ورينو ووووو
اللي ها اقوله ده ملقتهوش الا في التوكيلات دول ( توكيل البافارية ( ميني كوبر كمان وان كان مندمج ) - توكيل رينج روفر - جاجوار - فولفو مش متأكد بصراحة ومش حابب افتي بس تقريبا كان اه )

انك كإنسان بتحجز عربية فيه منها الوان عندهم ما لا يقل عن 15 - 20 قطعة صاج بألوان عربيتك المختلفة عشان تشوف اللون عالطبيعة عامل ازاي عشان لو طالب لون مش موجود يبقى من حقك تشوف اللون عالطبيعة شكله عامل ازاي ودي حسيتها حركة حلوة ومشوفتهشا في مصر وكنت بشوفها برة بس لما كنت مسافر

ثاني حاجة محطوط حوالي 50 - 60 خامة جلد طبيعي وكل خامة ليها الوانها المختلفة طبعا وكل خامة فيه بخياطة سميكة وبخياطة عادية على اساس انك وانتا بتحجز عربية تبقى شايف ملمس الجلد اللي ها يركب عندك ايه ولونه الطبيعي ايه بدال ما تبقى الفرجة في كتالوجات يعني تبقى من حقك تشوف خامة الجلد عالطبيعة عاملة ازاي ودي استظرفتها برضوا الحقيقة يعني :)


شئ اخير نسيت برضوا فئة الـ E الـ كوبيه محتاجة يتعملها منتدى لوحدها من كتر ما هيا تحفة من جوة وان كنت معرفتش ادخلها عشان كانت ملك لحد وبيتعملها صيانة فذوقيا اتكسفت اروح اسأله ولكن ما شاء الله ربنا يباركله فيها فعلا فعلا تحفة عالحقيقة جدا والسقف وهوة بيتفتح شكر الخامة وفخامتها جدا تحفة الحقيقة شكل الأبانوس مع الإستيل اللي في التابلوه وحوالين المخادع وان كنت مش حاببها تبقى مرفعة جدا من ورا زي الـ E العادية كنت حاببها تكون واطية عن كده كتير الشنطة بس اكيد يعني ده نتاج دراسات رهيبة بس فعلا شكلها تحفة واتمنى حد يعمل عنها تقرير بالصور لشكلها بس :)

اقتباس:

---

المشاركة الأصلية كتبت بواسطة sayed911

هوة انا مش عايز اصدم حضرتك بس انا لفيت ورا وتأكدت تماما انها مش AMG :) نهائيا بقى فكنت ها الطم على السعر ده الحقيقة يعني
وانا معايا نسخة من البروشور بس كسلت بصراحا اسكانها واحطها هنا فها اقولك الفئة اللي بي 408 الف دي تشمل ايه بس مكتوب في الورقة انها AMG Exclusive408,000
عشان كان فيه منها AMG sport كانت بـ 342 وبرضوا حاسسها مبالغ فيها جدا مكانتش داخليا مرضية لي بالمرة يعني والفئة اللي بقولك عليها تقريبا اللي هيا بـ 298 او 300 مش متأكد بالضبط تقريبا 4 كواتشات و 4 جنوط وكرسيين مفيش فيها حاجة تشدك تدفع فيها 300 الف جنيه


1-فتيس 7 نقلات DCT
2- موتور 1595 سي سي :) ومش مكتوب انها متربنة كمان :) مكتوب انها 156 حصان عند 5300 لفة فمش عارف بصراحة
3-التسارع 8.3 ثانية
طبعا الفرش الجلد المطعم بالخياطة الحمرا
طبعا باكدج الـ AMG exclusive
dashboard كلها جلد طبعا
fully electronic front seats W.memory
طبعا بانوراما
ومرايات كهرباء
واضاءة داخلية ذكية
وزجاج فاميه
harman kardon sound system
زينون طبعا
و parktronic
collision prevention assist
attention assist
وجنط 18
وبرضوا بكل الحاجات دي على رأيك امال لو نازلة بموتور الـ E ها تكسر الـ 600 الف جنيه على كده ! انا حاطط امل على اني الاقي مكنة جبارة مقابل 408 الف لكن بعد سؤال قومت قريت البروشور يبقى العربية دي اخرها 350 الف وتبقى غالية كمان عشان كلمة AMG عليها بس :) ومع اني متأكد انها مكانتش مكتوبة عليها والله :)

---

لا مش قصدي انها amg
و مش هيبقي مكتوب عليها amg من ورا فعلا
بس دي kit او package زي ما هما قايلين
الاكصدامات و الجنوط شبه اللي بتنزل علي ال amg اللي بجد و فارقه عن العاديه طبعا
و شويه مواصفات زياده
بس الجنط هيبقي مكتوب عليه amg علي فكره

انا والدي كان معاه ال s و بال amg kit فعارف الحوار ده

اقتباس:

---

المشاركة الأصلية كتبت بواسطة Karim_Monir

ما شاء الله روعه فعلا

عندي في ال 316 كل مرة اطفي العربية وافتحها تكون مظبوطة اتوماتيك على الهواء من برة ولازم اقفل عشان بتجيب روايح زفت من برة ومالهاش حل برة بس فعلا ودني بتتعب ولازم بعد شوية افتح الشباك او اجيب هوا من برة

---

الموضوع ده فى كل الالمانى واعتقد الاوروبى عكس عربيات تانية زى اللانسر مثلا طالما انت قافل البوابة هتفضل مقفولة لحد لما تفتحها , عندى فى الفكترا والفوكاس نفس الكلام

الفكره هنا انك لما تقفل العربية البوابة بتفتح اوتوماتيك علشان يبقى عامل ventilation للكابينة وخصوصا لو واقف فى شمس والعربية مقفولة , البلاستيك والجلد اللى مصنع منه الصالون مع الحرارة وعدم التهوية بينتج عنه غازات سامة , فا ده الهدف من الحركة دى .. الناس دى مبتهزرش
بعد كده لما تدور عايز تقفلها اقفل مش عايز خلاص


بالنسبة للمرسيدس بقى , هو مبرمج البوابة تفتح كل 45 دقيقة علشان يحافظ على نسبة ال fresh air وبالتالى الاكسجين داخل الكابينة
لو العربية مقفولة طبيعى ان بيحصل استهلاك للاكسجين نتيجة التنفس وبالذات لو اكتر من شخص ومع طول فترة القيادة ... فا هو بيعتبر ان 45 دقيقة وقت كافى انه يدخلك هوا فريش
وعلى فكرة هتلاقى كل كتالوجات العربيات مكتوب ان لو رحلات طويلة يفضل انك تفتح البوابة علشان تجيب هوا فريش بس هنا بيعملهالك اوتو

الحركة الرخمة اللى عاملها واللى اعتقد انه مضايق ملاك العربية انه كان ممكن يعملك indication سواء على الشاشة او صوت بحيث ينبهك ان البوابة على وضع مختلف عن اللى انت طالبه وبالتالى لو انا فى مكان ميسمحش الجو الخارجى انى اجيب هوا فريش فا اول لما يظهر التنبية هقفل البوابة تانى

مشاء الله ........................... ربنا يباركلك فيها .

ربنا يملاهالك بركة ويديك خيرها ويكفيك شرها

بسم الله ما شاء الله ربنا يباركلك فيها..بالنسبة لموضوع التكييف..هو أولاً مش في كل الألماني ولا حاجة..هو محصور في بي إم ومرسيدس فقط..في بي إم لا يقبل التعديل.ملحوظة ( البي إم e39 & e46 مفيهومش المشكلة دي ).أما في مرسيدس كانت عندي نفس المشكلة في الـ s وكنت متجنن من الموضوع ده..ووديتها عند م/ وائل عمارة في جسر السويس ووصلها بالكمبيوتر وقفل الأوبشن ده وبقيت عادية دلوقتي.والموضوع اتكلف 60 جنيه

اقتباس:

---

المشاركة الأصلية كتبت بواسطة inspiron

بسم الله ما شاء الله ربنا يباركلك فيها..بالنسبة لموضوع التكييف..هو أولاً مش في كل الألماني ولا حاجة..هو محصور في بي إم ومرسيدس فقط..في بي إم لا يقبل التعديل.ملحوظة ( البي إم e39 & e46 مفيهومش المشكلة دي ).أما في مرسيدس كانت عندي نفس المشكلة في الـ s وكنت متجنن من الموضوع ده..ووديتها عند م/ وائل عمارة في جسر السويس ووصلها بالكمبيوتر وقفل الأوبشن ده وبقيت عادية دلوقتي.والموضوع اتكلف 60 جنيه

---

كريم منير كان بيتكلم على عربيته مع كل دوارة لازم يقفل البوابة لأن كل ماتطفى العربية بتفتح اوتوماتيك لو قافلها وده اللى كنت اقصده انه تقريبا فى كل الالمانى كده (طبعا لو البوابة مش واير)

اقتباس:

---

المشاركة الأصلية كتبت بواسطة ahmed galal

اولا ربنا يباركلك فى العربية و يكفيك شرها ثانيا انا ليا شوية تعليقات على الموضوع :
6-معظم التوكيلات دلوقتى ان ما كانش كلها ما ينفعش تشوف عربيتك فيها لان حضرتك من المفترض مستامن الناس ديه على عربيتك و كمان مش من المفروض انك تقف و تتابعها بنفسك امال التوكيل معمول ليه و لو سابوهها مفتوحة الكل يتفرج على عربيته يبقا ما حدش هايشتغل لان اكيد العميل هايتدخل فى شغلهم سواء بعلم او عدم علم فمنعا للمشاكل ديه كلها ما ينفعش تشوف العربية و فى الاخر انت بتستلم عربيتك من مكان محترم و ثقة و كفاية ان كل عربية ليها مهندس معاها فيه اكتر من كده دلع.

---

اخى العزيز السلام عليكم ورحمه الله
انا اسف جدا فالكلام الغير مضبوط الذى انت كاتبه ينطبق فى بلد اخر محترم غير مصر
فانا اتعاملت مع توكيل نيسان مودرن موتورز وتوكيل تيوتا وشفت المصايب فى الاثنين.
واخو زوجتى اتعامل مع توكيل كيا ونفس الموضوع.
لابد ان تكون عينك ومفتحه للعمل فى سيارتك فى التوكيل لان العامل المصرى لا اثق به حتى لو كان ايه لانه لايوجد قانون قوى يحاسب المخطى.

انت بتتكلم على سياره لكن الاهمال وعدم الاهتمام موجود فى كل شى - حتى المستشفيات - نفس الموضوع اتعمل مع ابنى بعد الولاده فى الحضانه وكان سوف يموت ودخلت الحضانه واخذته منها
وعمى جاله جلطه نقلناه الى مستشفى النزهه وابتدوا يعطوه دواء خطا ولكن اتصلنا بالدكتور المتابع لعمى الذى حضر واوقف هذا الدواء وتشاجر معهم

بسم الله ما شاء الله

ربنا يباركلكوا فيها ويكفيك شر العين ياسيد باشا :)