الموضوع: عملت حادثة بسيطة.. الحمد لله.. وتوكيل زي الزفت وأسعار نار

السلام عليكم..

الحمد لله يوم الثلاثاء علت حادثة بسيطة ع الكورنيش (اسكندرية). وانا داخل علي سيدي جابر واحد معاه كورولا طالع من الدوران العكسي وشكله لمح بنزينة التعاون أو كان مزاجه يكسر الله أعلم..
المهم انه دخل يمين من غير ما يبص وانا للأسف جاي من ورا بسرعة حوالي 70 ومافيش غير حل من اتنين.. يا أخيش فيه يا آخد غرزة بسرعة وزي ما تيجي..
مع ان نفسي اني كنت أخيش فيه جدا عشان يدوق من اللي حادوقه بس ربنا ألهمني انها لو جت ف عجلة ولا أي حاجة أرحم ما تدخل ف الدواخل وممكن ريدياتير وموتور وخلافه.
للأسف الغرزة ماكنتش متاحة لأن فيه عربية علي يميني وباقي الرصيف (بتاع الدوران) علي شمالي فا ضربت فرامل علي ما الرصيف يخلص ومالحقتش أرفع رجلي من ع الفرامل وانا باخد الغرزة..
وكعادة كاوتش اللوجان والسانديرو النضيف جدا العربية زحفت مع الدوران ومش بترد (ماليش غير حارة واحدة قبل الجزيرة) بس لحقت ألم شوية (برضه الحق يقال جاب معايا حبة) قبل الجزيرة والضربة كانت علي سرعة حوالي 30 ل 35كم/س وجت في طرف الاكصدام (الاكصدام أثبت كقاءة انه امتص الصدمة وماتكسرش مافيش غير حتة من تحت اتكحت منها الدهان) بالاضافة للعجلة الأمامية شمال اللي اتبهدلت بصراحة..
ملحوظة: سائق الكورولا كمل ولا كأنه عمل مصيبة من شوية.. حسبي الله ونعم الوكيل
ملحوظة 2: لولا كنت حاطط حزام الأمان كان زماني لابس في الزجاج الأمامي لأن الصدمة رفعت العربية لفوق وهبدتها!
المهم انا نزلت أبص لقيت العجلة قالبة بزاوية 20 ل 25 درجة ورادة علي ورا.. والله وقتها قعدت ع الجزيرة وقلت الشاسيه اتلوح وربنا يعوض عليا في العربية والحمد لله اني طلعت سليم..
كلمت ونش جه رفع العربية وع التوكيل.. توكيل العامرية استقبلني بصراحة أوسخ استقبال (علي ما يبدو ان توكيل رينو كل فروعه كدة) طلع مهندس بص بقرف كدة
هو: تدفع 500 جنيه وتسيب العربية وحانعمل مقايسة ونبعتلك بكرة..
أنا: أنا مستعجل
هو: احنا داخلين علي استراحة وبعدها مش حانشتغل غير ساعتين..
أنا: ساعتين مش كفاية تكشفوا علي عجلة وعفشة؟ أمال بتطلعو تقرير كامل بعربية ف نص ساعة ازاي؟ هو: هي زحمة ومش حاينفع..
أنا: طب حاتبقي المقايسة حدودها كام؟
هو: ماعرفش!! بس لو ماوفقتش ع المقايسة تضيع ال500 جنيه..
طبعا كل شوية يسيبني ويمشي ولازم أدور عليه وحاجة آخر قرف!! قلت بلاها توكيل كدة كدة العفشة بتطلع م الضمان بدري!
مانزلتش حتي العربية من ع الونش ركبته وطلعت ع الشلالات رحت هناك علي البربري كذا واحد قالي عليه ماشاء الله وعنده تخلص كل حاجة مش حاتلف.. آخد بالضبط 3 دقائق وطلعلي تقرير كامل:
الحمد لله الدواخل سليمة (كنت حاسس بكدة لأن العربية ماطلعتش ع الرصيف نفسه خبطت وردت)
والخسائر كالتالي (حاحط جنبها الأسعار اللي جبتها بيها)
1- مقص أمامي شمال : 550 جنيه أصلي
2- مساعد أمامي شمال : 250 جنيه أصلي
3- شمعدان : 1100 جنيه أصلي
4- طبلية (أو قاعدة) عفشة أمامي : 1800 جنيه نوع كوري بس نضيف وسألت عليه كذا عفشجي والسمكري اللي بتعامل معاه.
5- عدد 2 مسمار ستابليزر (كانو اتنوا وأعتقد الاستابليزر كان أحد أسباب ان العربية لمت شوية قبل الخبطة) 110 جنيه
6- لمبة فوج شمال: 30 جنيه

طبعا جبت كله جديد وأصلي ماستعدلتش حاجة ولا رديت لا ع البارد ولا السخن..

المصنعيات بعد الفصال:
1- ميكانيكا وتركيبات 700 جنيه
2- شد الشاسيه وضبط زوايا وكهربا وحبة حاجات + ضبط اكصدام أمامي ولحام أماكن للكليبسات مكان اللي اتكسرت واعادة تركيب وكدة: 500
3- اصلاح جنط وترصيص : 50
4- قهوة 100

المجموع 5190 نقول 5200
الونش أخد 400 بالقهوة ذهاب للعامرية ورجوع تاني للأزاريطة طبعا استغلال للوقت ومنظر العربية بس الحمد لله.

استلمت العربية تاني يوم بعد الفطار علي طول الحمد لله ويمكن لأن الشغل كان بيخلص بسرعة اتأكدت ان العربية ماكنش فيها حاجة تقلق الواحد وجربتها يوم الخميس علي الدولي العربية ماشاء الله زي الأول.

المجموع كله 5600 جنيه..
طبعا العربية مش مؤمن عليها بس انا الي حد ما مش مؤمن بموضوع التأمين ودي أول حاجة تحصلي من فوق السنتين سواقة.. الحمد لله

المهم ان العربية مصاريفها حراقة جدا حاسس اني راكب اوكتافيا.. والأهم اني عرفت ناس نضيفة أتعامل معاهم ف الرينو لو التوكيل كان (كالعادة) بالطريقة الزبالة بتاعته..

بالمناسبة حد يعرف التوكيل كان حايطلب كام؟ ولو عاوز أبيع العربية في المستقبل ان شاء الله (لازم أرسي اللي حايشتري ع اللي حصل وعندي كتالوج كاتب فيه كل خربوشة ف العربية بتاريخها) حاتأثر جامد ف السعر؟

قدر الله و ما شاء فعل و ربنا يعوض علي حضرتك. بصراحه التوكيل محتاج يزود عدد الفروع او حتي يشتغل فترتين لان الدنيا بتبقي علي طول زحمه و مش ملاحقين حتي موضوع الحجز ده ملوش لزمه قوي فالموضوع في الاخر بيتوقف علي مهندس الاستقبال و هيستلم منك العربيه أمتي و كويس ان حضرتك جبت قطع غيار اصليه يعني ان شاء الله مش هيفرق عن التوكيل بل بالعكس ممكن يبقي احسن علي اساس ان الصنايعيه كويسين و ليس عليهم الضغط اللي علي بتوع التوكيل و اللي بيجيب لهم حاله التناحه ألمركزه دي اللي حضرتك شفتها