الموضوع: تقرير كيا ريو 2013 سيدان بعد 8000 كيلو

السلام عليكم ورحمة الله وبركاته يا رجاله الريو

أنا عارف طبعاً إن أنا طنشت على التقرير أول ماجبت العربيه وطنشت برضو على 5000 كيلو , بس والله الواحد كان حاسس إنه محتاج يعرف العربيه كويس عشان الكلام يبقي على تجربه كويسه , المهم هنعوضها إن شاء الله.

أنا طبعاً عربيتي هاي لاين خليجي سيدان بس مش الاردني لان أعلي مواصفات فى مصر فى الريو موجوده فى الاردني.

العربيه مبدئياً شكلها حلو جداً وملفته للنظر جدا وبتاخد عين جداً برضو

أنا اخترت السيدان عشان الشنطه كبيره وأكبر بكتير من الهاتش باك , بس لو يهمك فتحه الشنطه فالهاتش باك تكسب , يعني لو محتاج تحط حاجه عريضه فى الشنطه الهاتش باك فتحة الشنطه أكبر من السيدان بس مساحتها أقل الا إذا طبقت الكراسي فالمساحه الكليه للهاتش باك اكبر.

العربيه بالنسبه للموتور أنا حقيقي حاسس إنها كان المفروض تبقي 1600 لان العربيه سحبها مش أوي والاستجابه بتاعتها مش تمام خالص ومع التكييف انسي يا عمر , هتنزل تزق .



أنا عارف ان فى ناس هتقولي السوفت وير , ف أنا هشوف الموضوع ده فى صيانه ال 10 الاف ان شاء الله بس على فكره الموضوع بيتحسن مع الوقت , الواضح كده ان انت لو معود العربيه على الجري هتبقي كويسه ولو مقضيها مشي براحه هتتخنق معاك لاني فى الاول كنت ماشي بحسس وبعدين دوست بعد 5000 فممكن ده يكون سبب.

طبعاً الموتور نااااااعم جدا وهادي وبجد من انعم المواتير الي شفتها وبتحس ان العربيه سلسه وناعمه وممتعه جداً فى سواقتها.

بالنسبه لاستهلاك البنزين فهو مش وحش وهو يشبه الدايو لانوس فى استهلاكها يعني لا موفره اوي ولا بتحرق اوي بس طبعاً التنك صغير ومؤشر البنزين كبير فبتحس ان البنزين بيتشفط بسرعه.

العفشه بتاعت العربيه انا شايف انها ممتازه مع ان في ناس بتقول انها ناشفه مش عارف ازاي مع اني جنط 17 أكيد في سنه نشوفيه فى المطبات بسبب الجنط بس مش حاسس ان العربيه ناشفه يعني , و اظن الناس الى جنوطها 15 مش بيعانوا من اي حاجه , المفروض يعني.

التابلوه بتاع العربيه فيه مشكله انه بيعمل اصوات علطول , ودي حاجه مضيقاني جداً , بيطقطق وبيعمل اصوات عجيبه مع اني كنت فاكر ان ده هيحصل بعد فتره , زي ما اي عربيه بتشخلل فى بلدنا من المطبات, بس للاسف حصل علطول , فدى حاجه مش ظريفه ولو كنت راكن فى الشمس والعربيه سخنه الصوت بيزيد عما لو كنت راكن فى الظل او بليل , الصوت بيبقي اقل بكتير, ف الواضح ان فيه مشكله فى خامات او تثبيت التابلوه.

في برضو مشكله الحراره عند الحته الى ورا الفتيس بحس بيها لو حاطط مفاتيح بلقيها مولعه, بس انا مش فارقه معايا اوي الحقيقه.

طبعاً بالنسبه للاختراع الهايل المسمي الباور الكهرباء , بجد حاجه جامده جداً ومفيد جداً فى تفادي اي حاجه وفى المناورات وفى الركنه وبيتقل على الطريق , بصراحه حاجه زي الفل.

فرامل العربيه فوق الممتازه وقويه جداً الحمد لله , مش عارف بقي بعد ما الواحد هيغير التيل هتفرق ولا هتفضل زي ماهيه.

ثبات العربيه انا شايفه كويس بالنسبه لوزنها.

عيب فى العربيه من وجه نظري ان العربيه مفهاش مؤشر حراره , لان الواحد بيحتاج يتابع اول بأول لو حصل حاجه لاقدر الله ويعرف برضو ان كانت العرببه سخنت ولا لأ, بس ربنا مايجيبش حاجه وحشه ان شاء الله. وطبعاً حبايبنا اللي معاهم الاردني أو الهاتش باك الخليجي عندهم مؤشر حراره وشاشه الكمبيوتر كبيره فى نص العداد , مش بحسدهم يعني ولا حاجه

تكييف العربيه ممتاز برضو , مش عارف عشان خليجي ولا ده الطبيعي بس التكييف كويس جداً الحمد لله.

العربيه فيها شويه حاجات كده ظريفه بس طبعاً مش موجوده فى كتالوج ولا اي حاجه واكتشفتها بالصدفه زي مثلاً :

لو عندك حساس نور فى العربيه وخليت الدراع بتاع النور على الاوتو وبليل طبعاً مش الصبح لو انت راكن العربيه وفتحتها بالريموت العربيه هتنور النور بتاع الفوانيس , حته كده زي العربيات البي ام والمرسيدس. بس للاسف الخبراء بتوع توكيل السبع لغولي الموضوع ده لما لعبوا فى كمبيوتر العربيه ,ولما اروح توكيل فى حد بيفهم هخليهم يرجعوه تاني لانه مفيد لو انت مش لاقي عربيك فى جراش بليل.

برضو موضوع الاشاره الاوتو ظريف جداً انك بمجرد لما تخبط دراع الاشاره يمين او شمال بتدي 3 اشارات وتسكت فجميل جداً فى التنقل بين الحارات بدل ما تشغل الاشاره وترجع تطفيها تاني.

حاجه تانيه ان العربيه لما بتدوس دوسه على زرار الفتح بتاع الابواب بتفتح باب السواق بس ولو دوسه كمان خلال 4 ثواني تفتح الابواب كلها, ممكن بقي تخلي العربيه تفتح كل الابواب بدوسه واحده على زرار الفتح والطريقه كالتالي:

هتدوس على زرار الفتح والقفل فى الريموت سوا شويه كده لحد ما العربيه هتديك كذا فلاش بالاشارات.

كده انت خليت الريموت يفتح الابواب كلها بدوسه واحده بدال دوستين, عايز ترجعها تاني , نفس الطريقه برضو.

انا شايف ان دوسه واحده تفتح باب السواق افضل لتوفير استخدام السنتر بتاع الابواب التانيه بدوع داعي لو انت معظم الوقت بتستخدم العربيه لوحدك كفايه اوي تفتح الباب بتاعك بس.

لو عايز بقي تتربس الدريكسيون , قبل ما تبطل العربيه لف الدريكسيون 180 درجه يعني خلي كلمة (كيا) مقلوبه وبعدين بطل وشيل المفتاح بسرعه وحركه كده يمين او شمال سنه هتلاقيه قفل معاك , والسبب فى انك تحركه وهيه دايره عشان بيتقل جداً لو مش دايره وبرضو لما تبطل وتشيل المفتاح بسرعه ,الباور ميكونش لحق يفصل فتقدر برضو تحركه بسهوله.

تقريباً دي كل ملاحظاتي على العربيه واتمني أكون أفدتكم. وربنا يبارك لكل واحد فيها لانها فعلاً عربيه شكلها مميز وجميل.

وفى المجمل العربيه ممتازه وكويسه جدا وعمليه وشكلها حلو بس كانت محتاجه موتور 1600 زي الاكسنت RB بس بالنسبه للاسعار الحاليه انا شايف انه كتير بصراحه.

حبيبي يا مهاب بيه , هنشوف ايه النظام فى التوكيل وربنا يسهل , وان شاء الله لما اصور العربيه هبقي احط الصور ان شاء الله.