مواتير bts و bjx تتسقط فى أى ابيزا من الجيل التالت ؟!

**Patrickologyy** · 25-07-2013 04:59 AM

هو موتور ال 1600 سى سى 4 سلندر 16 صمام اللى الكود بتاعه BTS و موتور ال 1800 سى سى 4 سلندر 20 صمام تربو اللى الكود بتاعه BJX ممكن يتسقطوا بسهوله فى أى عربيه ابيزا من 2002 ل 2009 .. ولا بيبقى موال صعب ؟!
و لو حد يعرف تكلفه كل موتور منهم تبقى فى حدود كام يبقى زى الفل (y)
و هل لو دورت هلاقيهم أصلاً ولا مش بينزلوا عند بتوع الاستيراد ؟!
و معلش أخر سؤال .. الموتورين دول بيحتاجوا بنزين 95 ولا 92 ؟!
شكراً :)

**Karim Ibiza** · 25-07-2013 11:40 AM

المواتير دى كلها نازلة standard للجيل الثالث من 2003 - 2009 وبالتالى هتتسقط عادى بدون اى تعديلات فى قواعد, فيما عدا انك ممكن تحتاج تغير العدادات لو لقيت ان فيه فرق بين عدادات الموتوراللى هتجيبه وعدادات موتورك

لكن اهم حاجة انك تجيب الحاجة كاملة عشان تكون متوافقة مع بعضها
يعنى مثلا: تجيب موتور بالفتيس بالضفيرة بالكونترول (دى الاساسيات)
بعد كده تشوف اذا فيه اختلاف بين باقى الحاجات زى مثلا طقم التبريد والعفشة والشكمان والعدادات وطرمبة البنزين

بالنسبة للأسعار:
انا كان قدامى فى اسكندرية الموتور الـ20VT بـ 9000 جنيه موتور بفتيسه بالضفيرة والكونترول عند واحد ميكانيكى
والموتور ده بالذات او اى موتور فوق الـ1600 هتلاقيه اليومين دول فى الرخيص وارخص من كده كمان عشان موضوع الدعم بتاع البنزين مبقاش فيه حد بيشترى المواتير دى
طبعا معروف اى تربو لازم 95 عشان تاخد كفائته وعمر الموتور ميقصرش
ده غير ان الموتور ده من غير التربو بيعمل 130 لتر فى الصفيحة عشان 20 صباب, فما بالك بقى لو تربو!!!

أنا شايف ان انسب موتور من الناحية العملية فى كل حاجة هو الـ BTS
موتور عفى على عربية خفيفة وجوه الدعم و 1600 و 16 صباب وهتلاقيه فى حدود الـ 6000 جنيه

الموتورين موجودين عادى عند بتوع الاستيراد

طبعا المواتير دى الاحسن ليها انها تشتغل 95 لكن الـ 92 شغال مفيش مشاكل لكن اداء اقل

انا كان معايا الـ1400 الـ AEX بتاع الـMK2 نسبة انضغاط 10.5:1 زى الـBTS وكنت شغال 92 عادى ونص الابيزا اللى فى مصر مسقطين الموتور ده وشغالين 92 و90 كمان

لكن لو انت راجل بتاع جرى أكيد هتحس بالفرق