الموضوع: افيدونى وهاخد كلامكم ثقه محتار بين استرا كوزمو زيرو ولا بى ام دبليو 320 موديل 2010

المشاركة الأصلية كتبت بواسطة ahmed travco

انا شفت الاسترا وجربتها واكتر حاجة عجبتني فيها شياكة التابلوه والاضاءات بتاعته... بس بصراحة اللي قفلني منها انها ضيقة جدا...

ورغم ذلك... لو الاتنين دول يبقى الاسترا بصراحة... زيرو... راحة بال... عربية محترمة وثباتها ممتاز وعزلها جيد جدا وتقفيلها كويس... انما لا احبذ اني اجيب مستعمل فئة عالية زي ال320 لان لو ظهر فيها حاجة بعدين لا قدر الله هتزعل جدا وهتدفع كتير...

زي ما بقولك... الاسترا ضيقة (من ورا ومن قدام)... لو مش فارقة معاك توكل على الله وهي عربية ممتازة زي ما قلت...

لو فارق معاك المساحة ممكن تبص على بدائل تانية زي الفوكس... الجيتا... الفلوانس... الخ الخ

معلش توضيح صغير بما انى مالك للاسترا السيدان كوزمو
انا طولى ١٨٠ سم وببقى قاعد بعيد جدا عن الدركسيون بدون تاثير على الراكب اللى ورايا
ربنا رازقنى ب٣ ابناء وواخدانا اخر حلاوه وكتير من الاوقات كمان بيكون معايا والدى ووالدتى وساعتها بس بحس انها يادوب علينا
بس من ورا تشيل تلات اشخاص متوسطى الحجم مستريح ومن قدام حزث ولا حرج براااااااح ونفس وسع الفوكس من ورا
اكبرهم فى الكنبه الخلفيه هى الفلوانس

المشاركة الأصلية كتبت بواسطة ahmed travco

اوكي ممكن تكون مريحاك وانت مش شايفها ضيقة... بس انا لما جربتها حسيتها ضيقة من قدام وضيقة (جدا) من ورا... حكمي ده انا بنيته على مقارنتها بالشارك اللي معايا... في فرق مش قليل في المساحة الداخلية صدقني...

طبعا انا مش بعيب في العربية لانها ممتازة ومش محتاجة كلام... كل واحد واحتياجاته... انا مثلا كنت عارف ان شنطة الشارك صغيرة قبل ما اشتريها بس لقيتها مناسبة لاحتياجاتي وهقدر اكيف ظروفي عليها والحمد لله مش مسببالي ازمة...

كلامك مضبوط طبعا انها احتياجات ومفيش عربيه كامله
وربنا يباركلك فى عربيتك ويكفيك شرها

المشاركة الأصلية كتبت بواسطة yasser_0339

اهلا بيك الاول ونورت قسم بي ام :


الرائ ده شوفته بالصدفة من زميل بيدخل علي الموقع واشتراه العربية وده رايه فيها .

ورائي الشخصي : طبعا بي ام - بدون تفكير - انت هيبقي اسمك راكب عربية ، ليها احترامها ورونقها

وجبروتها . ( ملحوظة : وبدون ما اقرا راي الزميل طبعا بي ام )




تقييم الزميل :

تقييم شخصى لكوزمو بعد ٣٠٠ كم ( التقيم من ١٠)

١-- السعر .......١٠/٦ وكذلك حال جميع اسعار السيارات فى مصر مع العلم انى مخفض فى سعرها ٢٥٠٠جنيه ولكن فى راى best value for money فى هذه الفءه
٢- التكيف......لم يتم تجربته ان شاء الله بعد ١٠٠٠ كيلو وربنا يستر لان عربيتى لونها اسود
٣- الشكل الخارجى....... ١٠/٩.٥ طبعا دى ازواق ولكنها افضل تصميم وشكل خارجى فى فءتها
٤- تحميل الصاج........١٠/٨.٥ ماعدا الاكصدامات بحكم المواصفات الاوروبيه
٥- جوده التقفيل.....١٠/٩ بس ليه ملحوظه وحيده هى ان معظم الاسترا الجديده اللى شوفتها لاحظت ان الاكصدام الامامى مفارق بسيط عن جسم العربيه وكان الكلبسات مش مريحه مكانها
٦- التابلوه والتصميم الداخلى ١٠/١٠ بدون مبالغه وخاصه انوار التابلوه الناريه وان كان كثره الزراير ممكن تكون مشكله لبعض الناس ولكنى متعود عليها بحكم ان كان معايا النسخه estate خارج مصر
٧- الوسع والرحابه الداخليه ١٠/٨ بحكم ان العربيه c segment فطبيعى انها تبقى مش كبيره ولا صغيره بالذات الكنبه الخلفيه
٨- العفشه ١٠/٨ واعتقد الاداء هيتحسن مع الوقت
٩- المحرك ١٠/٨ واعتقد الاداء هيتحسن بعد مايفتح ولكنه مرضى جدا بالنسبالى بحكم انى مش بتاع تسارع وصوته ممتاز
١٠- استهلاك البنزين ١٠/٧ اعتقد ان حكم بدرى شويه لان لسه العربيه بتلين وان شاء الله بعد فتره الاستهلاك بيقل وهى بتعمل متوسط ١٠ لتر/ ١٠٠ كم داخل المدينه
١١- الفتيس ١٠/٧.٥ عندى نفس الملاحظات اللى ذكرها الزملا فى موضوع الرعشه والاحساس بتسقيط النقله فى حاله فرمله عنيفه ولكن اعتقد انها طبيعيه وليست عيب ولكنه احساس غير مرضى فقط وان شاء الله بالتحديث تختفى
١٢- الفرامل ١٠/٨ بحكم انها لسه بتطبع ولكن استجابتها ممتازه الا ان الاحساس الزياده بتساقط النقلات يعطى احساس ان الفرامل بتمسك بقوه ثم اقل ثم اقوى واعتقد انه طبيعى
١٣- الشنطه ١٠/٩ وسع ممتاز وكافى بخلاف امكانيه طى المقاعد
١٤- الاضاءه ١٠/٩ تنوع لقوه واتجاه الاضاءه وكافى جدا بخلاف الشبوره
١٥- الدريكسيون ١٠/١٠ فعلا ماشاء الله بدون مبالغه
١٦- ارتفاع السياره ١٠/٨.٥ مناسب جدا واعتقد التصميم مساعد على ارتفاع السياره من الارض ومحكتش معايا وربنا يستر

السلبيات من وجهه نظرى

١- عدم وجود فتحات تكييف للكنبه الخلفيه
٢- الاستبن صغير ومش نفس مقاس الجنط السبور
٣- عدم امكانيه غلق المرايه عن طريق الريموت مع الازاز ( لو حد يعرف يقلى) وكمان جسم المرايه مش بيلم كله يعنى بحس ان لسه المرايه مقفلتش للاخر
٤- السياره مجهزه للبلوتوث ولكن غير موجود
٥- مع كل دواره بلاحظ ان الزرار الخاص بادخال الهوا من خارج السياره بيكون off معناه ان لازم مع كل فتحه كونتاكت اشغل الزرار عشان ميدخليش هوا من بره ( بردو لو حد يعرف ازاى اخليه على طول on يقلى)
٦- الفتيس بياخر هسه فى قراءه النقله يعنى مثلا من d ل r و العكس يعنى مش تنقل وتدوس اكسريتير لا لازم تصبر لما الفتيس يقرا الحركه ويحولها ودى بتاخد جزء من الثانيه وعلى فكره كانت معايا النسخه المانيوال بره مصر ومان لازم بردو اصبر على الفتيس جزء من الثانيه عشان ياخد النقله ولكن هو مش عيب هو تكنولوجيا مختلفه والله اعلم.
٧- صندوق التابلوه مفيهوش تلاجه
٨- الاريال تركيب قلووظ مش fixed يعنى لو ركبته مش هتلاقيه
٩- فرامل اليد ودى عن تجربه شخصيه وهو موضوع ممكن يبقى ايجابى عند بعض الزملا وهو ان فرامل اليد كهربا يعنى لو مشدوده والعربيه واقفه ودورت وزودت بنزين على nاو p عادى الفرمله تفك نفسها اوتوماتيك حتى لو طلعت بالعربيه وهى مشدوده هى بتفك نفسها اتوماتيك عادى ونصيحتى هنا لبعض الاخوه اللى ممكن يسيبوا اولادهم يقعدو يلعبو فى العربيه لبعض الوقت ان فى حاله الدوس على الاكسراتير والعربيه معشقه الفرامل هتقرا انك عايز تتحرك وهتفك نفسها اتوماتيك وممكن لاقدر الله تبقى العربيه فى منزل وتعمل مشكله.
١٠- قفل الباب مش بيقفل اتوماتيك بعد العربيه مابتتحرك ( لو حد يعرف يقلى) يعنى لازم ااقفل اللوك يدوى من الزرار

تعليق صغير لان التقييم ده انا عامله فى موضوع اسمه تقيم اوبل استرا كوزمو
ان بعض السلبيات اتعالجت وكانت اما بناء على فتره تجربه صغيره او عدم درايه بطريقه التشغيل والتعامل
واشكر الزميل اللى مصيتنى

بعد التحيه ...
بدون اى تردد او تفكيير كتير و حيره البى-ام ال 320 حتى لو مو 2007 ... لكن كما نصحوا الاعضاء ان تكون بحاله ممتازه و ده اهم حاجه ... انت كدا وصلت لمعادله best money value + متعه البى-ام التى لا تقارن بأى سياره اخرى ... يعنى للتوضيح المرسيدس ممتعه ايضا و لكن بطريقه اخرى ...
ايضا عند اعاده البيع فى اى وقت القيمه و الخساره لصالح بى-ام لانك بالفعل كاسر جزء كبير من سعرها لمل كانت زيرو عكس اى زيرو ب 175 الف كسرته ب 20/25 الف ...
كما ان موضوع مقارنه مستعمل بالجديد ده كله كلام غير عملى و لا واقعى !!! المهم ايه الجديد هو ؟؟ مقابل ايه المستعمل هو ؟؟ ... ما السوق ملىء ب s 350/550 , 740/750 موديلات 2013 كسر 10 الف كم !!! تفتكروا ان اصحابها اكتشفوا انها عربيات سيئه لانهم قرروا البيع ؟؟ طبعا لا .. لكن كل واحد و ظروفه .. عايز فلوس/مسافر/حيكبر/حيصغر/ ..... و هكذا ...
اسف على الاطاله ... تحياتى ...