ارجو المساعدة فى شراء 206

**odod** · 27-07-2013 01:43 PM

السلام عليكم يا رجالة المنتدى
لو سمحتولى كنت عايز مشورتكم فى شراء عربية 206 العربية دى انا مش لاقى ليها اى مواضيع خااااااالص هنا ........المهم
انا قدامى عربية 206 موديل 2001 فابريكة برة مفيهاش بوية خاااااااالص برة لونها فيرانى فاتح شوية العربية ماشية 91000 كيلو صالون العربية حالته تقريبا ممتازة الطارة بتاعتها بس اللى مقشرة من الشمس اتهيالى وكابوت العربية زيرووووووو واستبنها منزلش ,حالة العربية كلها تقريبا 95%
فكنت عايز اعرف تساوى كام ؟؟؟؟؟؟؟؟؟؟؟؟؟؟؟؟؟؟ظظ
مطلوب فيها 47 الف جنية
رجاء سرعة الافادة لان صاحبها مستنى منى تليفون النهاردة.................ز
واسف جدا طولت عليكم

**odod** · 27-07-2013 02:48 PM

صباح الفل يارجالة !!!!!!!!!!
هى كلها مشاهدات ولا ايه
مش معقولة مفيش حد قادر يتمن العربية دى

**sayco100** · 27-07-2013 02:51 PM

والله انا بحب العربية دى جدااا
بس معرفش عنها اى معلومات
ربنا يوفقك لما فيه الخير ان شاءالله

**odod** · 27-07-2013 03:12 PM

الف شكر يا باشا على اهتمامك وياريت فعلا حد يقدر يساعدنى

**Ahmed Amin** · 27-07-2013 04:33 PM

91 ألف كيلو يعتبر عداد كويس جداً علي عمرها,,
بس لازم تشوف أيه اللي هيا محتاجاه يتغير ويتكلف كام, وكان بيركب لها القطع الأصلية ولا لأ.
عشان البيجو لو الواحد أسترخص فيه هتقرفه, ولو عاملتها كويس وجبت القطع الأصلية هتعيش وهتخليك سايق باشا..

نصيحة مني تطلع بيها علي توكيل تكشف عليها وتعرف هيا لازمها أيه ممكن يتغير,
وهيتكلف كام.

عشان تشتري وأنت علي نور,
والسعر انا معنديش خلفية عن سوق ال 206 بكام دلوقتي, بس متهيألي إن السعر معقول بالنسبة لعربية هاتش باك أوروبي ومش معدية ال 100 ألف كيلو
وبعد الكشف عليها ممكن تسأل مهندس الصيانة محمد الشرقاوي في بيجو غمرة وتعرف منها يديها كام علي حالتها اللي هتشوفها بعد الكشف..

بالتوفيق في الأختيار, وأبقي عرفنا عملت أيه.

**Ahmed Amin** · 28-07-2013 10:00 AM

amgomaa طبعاً كلامك ممكن يكون منطقي, بس مش دايماً صح,,

القيمة السعرية لعربية في سنة 2000,, مينفعش تقارن بقيمتها السعرية أنهارده في السوق.
وصاحبها مش هيكسب فيها ولا مليم, لأن أحنا بنتكلم في عربية موديل 13 سنة لورا,,
و قيمة الفلوس قلت كتير من سنة 2000 دا غير أنو ممكن يكون مش مالكها ألأول وصرف عليها وقت أستخدامها يعني مش هتبقي صفقة ليه ولا يكسب فيها..

بمعني أخر لو هتحسبها بالفلوس ال 100 ألف جنية في سنة 2000 مش زي ال 100 ألف جنيه أنهارده,,
ال 100 ألف جنيه أنهارده مهماش مبلغ محترم, زي ما كانو سنة 2000 وميجيوبش عربية محترمة.

وعشان تحسبها من ناحية تانية عندك البولو اللي في نفس الموديل 2000 بتتكلم في أخر التلاتينات لو محتاجة مصاريف لأول الخمسينات لو نضيفة.!
يعني نفس الرينج بغض النظر عن السعر اللي كان صاحبها شاريها بيه بالنسبة للعربيتين,

وفي الحالات التانية,
عندك في عربية زي البيجو 505 أستيشن موديل 80 عاملة لحد أنهارده 70 ألف جنيه !!
في حين إن الصالون سعرها بيتراوح من أول التلاتينات لحد أو الخمسينات علي حسب الحالة.

مع العلم إن نفس ال 70 الف جنيه دول ممكن تشتري بيهم بيجو 505 أستيشن موديل 1980
ممكن تشتري بيهم برضه بيجو 307 SW موديل 2007 محتاجه شوية مصاريف, بس موديل 2007
أو بيجو 307 هاتش باك نضيفة جدا.

فا في الأول والأخر سعر العربية بيحددة السوق, العملية كلها عرض وطلب,

ممكن تبقي فيه عربيات زي الدايو لانوس صاحبها يشتريها زيرو ب 55 ألف وبعد خمس سنين شغل وفحت وردم يبيعها ب 52 ألف.!

وواحد تاني يشتري عربية رينو أو بيجو ب 170 ألف جنيه زيرو ويبيعها بعد 3 سنين ب 100 ألف جنيه.!

فالنصيحة للي هيشتري بعد ما يشوف حالة العربية أيه,
ينزل السوق يشوف رينج سعرها كام, والأفضل أنو يدخل علي كونتاكت كارز ويشوف الرينج اللي بتتباع فيه.

دا لنك لأسعار ال 206 من كونتاكت كارز, وأسعارها في نفس الرينج من أخر التلاتينات لأخر الأربعينات,
والأغلي طبعاً بيكون اللي مصروف عليها وصاحبها مش مهمل في صيانتها, ومن رأيي دي بتبقي صفقة أحسن من العربية الأرخص لأنها هتقرف اللي يشتريها في اللف علي تصليحها عن عربية معمول فيها كل الشغل اللي محتاجاه بدل ما تلف أنت وتصرفة عليها,

الموقع بيتشفر هنا ومش بيفتح مش عارف ليه, وكلمت كونتاكت بتتشال من جنب Cars في اللنك.
http://www........cars.com/usedcars_...tDirection=asc

أنا ضغطته في اللنك دا, بتفتحه وتعمل Skip Ad من فوق عال يمين بعد 5 ثواني,
http://adf.ly/Syfzb