سلامات عليكم يا اسيادنا
بعد ما شاركتونى احمد و سوزى
و احمد و سوزى 2
جاى النهاردة اكملكم حكايتى مع سوزى الى مغلبانى دى .
طلع فى مشكلة فعلا فى الماستر العمومى للفرامل مما أدى إلى ان الفرامل قافشة فى الطمبورة فبالتالى العجل بيسخن جداً مما يؤدى إلى سخونة العربية بالتبعية و من قد علمنا هذا بعد ما قمنا بتغيير طقم كاوتش ماستر عجل امامى بكاوتش جديد سعر الكاوتشة 15 جنيه من عند الراجل الى مش فاكر اسمه الى فى ميدان ابن الحكم . تقريباً محمد منصور او محمد نور . هى حاجة اخرها اور . و ما زال الجنوط بردك بتسخن سخونية رهيبة من اصغر مشوار و بالتالى سخونة العربية
و من منطلق حرصى على السلامة العامة قررت اعدى على ميدو 2000 و اشوف سعر ماستر الفرامل العمومى . فلقيته ب 300 جنيه . استيراد
فقررت إنى اركن العربية و اشوفلها بيعة ^_^
.. ملحوظة :-
لما كنا بنرجح ان العربية عايزة طقم كاوتش ماستر اتصلت بهانى هاشم بتاع سوزوكى سنتر الى فى التوفيقية . قالى الطقم عجلتين ب 50 جنيه .
روحتله بعدها بيومين و قولتله عايز طقم كاوتش ماستر عجل امامى . اديته ال 50 جنيه . و ادانى كيس كدة فيه كام كاوتشة .
روحت فتحت الكيس لقيت كاوتش بايظ !
الكاوتش خامته زى الزفت و الفنيش بتاعه زفتين دة غير انه بايظ بمعنى الكلمة لأن فيه لسعات كدة من الاسطمبة و الاسطمبة شكلها كانت شغالة تحت بير السلم و مطلعة حاجة حرام يدفع فيها 5 قروش حتى - بفهم فى خامات الكاوتش بحكم شغل عيلتى -
الشئ الجميل التانى بقى ان الكيس دة فيه عجلة واحدة بس مش عجلتين زى ما الاستاذ قالى فى التليفون و كان المفروض انه يدينى !
طبعا روحت رجعتهوله و عرفته ان الشغل دة مضروب فقالى لو عايز الاصلى روح مودرن موتورز الى فى شارع المساحة .
طبعاً انا لا روحت ولا جيت انا روحت للميكانيكى وصفلى الراجل الى فى ميدان ابن الحكم دة و جبت من عنده كاوتشتين زى الفل للعجلتين الواحدة ب 15 جنيه .