اقتباس المشاركة الأصلية كتبت بواسطة gmikhael مشاهدة المشاركة
انا مرتاح للشارك من ناحية الكفائه ولكن خايف منها في اعادة البيع تتعبني لاني مش بشوفها في المعارض كتيير زيرو بالمقارنه بالسيراتو حوالي 15 عربيه في المعرض و برده هي من جوه فقيره شويه الفئه الثانيه منها بالمقارنه بالسيراتو الجديده رهيبه من جوه و تابلوه جلد و فرش ابواو شياكه و عدادات وهم بس برده خايف من عفشتها من حيث الكفائه عندي واحد صاحبي معاه كيا بيكانتو 2010 جابت مقصات و بارات و مساعدين عند 80000 كم عقدني منها مع العلم اني معايا اسبيرانزا 516 و هي كويسه
بص يا باشا انت اللي تقدر تحدد احنياجاتك... الناس هنا عارفين اني متحيز للشارك جدا جدا... بس ده سببه ان اهم حاجة عندي ثبااااات العربية وانا مسافر من طنطا للبحر الاحمر كل شهر زائد ثباتها وانا على طريق استغفر الله العظيم اسمه طريق مرسى علم.... ومن هنا قررت اجيب الشارك بدون ادنى تردد وما اهتميتش خاااالص بكلام الناس لاني عارف ان 90% منهم على الاقل بيفتوا... والدليل ان العربية اصلا انتشارها ضعيف... فازاي بقى كمية الناس اللي بتقول فيها البدع دي؟؟؟؟

انا امتلك العربية دي وبأكدلك انها لا تقل عن الالماني في الثبات والمتانة... جرب تسوقها على 200 مثلا وشوف انت ازاي ممكن تبقى سايب الدركسيون ومش خايف... لا تعويم بقى ولا مراجيح مولد النبي اللي هتشوفها بأي كوري بعد ال140 مثلا... لو رفعت العربية دي وبصيت على عفشتها وحجم مقصاتها ومتانة الشاسيه بتاعها هتعرف اما اقصد ايه.... والاه العظيم انا لسة ماشي بيها النهاردة 215 على طريق القطامية ولا الهوا... ولا الهوا...

بس اوعى تجيب الفاضية منها.... ضروووري الهايلاين... صدقني مش هيبقى ناقصك حاجة مع الهايلاين... الفاضية منها خنيقة شوية ومفيهاش حتى وسائل امان.... فخليك في الهايلاين وسيبك من سعر اعادة البيع والكلام ده لانك هتسوق العربية 5000 كيلو في الشهر يعني عايز حاجة متينة وحمالة اسية...

وعلى فكرة... اوعى حد يقولك ان البومة حلوة والشارك احسن شوية لان ده غلط... والله العظيم الفرق رهييييب في كل حاجة... فاذا كانت البومة الناس بتقول انها بتاعت شغل وبهدلة فتخيل الشارك بقى....

انما برضه للامانة... لو مش ناوي تجري بالعربية على سرعات عالية ومحتاج حاجة بقى تكون بياعة وكدة... خلاص خش على السيراتو او الالنترا لان في رأيي ميفرقوش عن بعض غير في الشكل والاوبشنز... انما الاتنين نفس العفشة وكل حاجة لان اصلا كيا وهيونداي شركة واحدة...

بس حاجة اخيرة وانا عارف ان دي اذواق... انا اتفرجت على السيراتو هايلاين وقت ما كانت ب187000 ومعجبنيش خامات التابلوه وخامات العربية بشكل عام... اه هي (شكلها) حلو طبعا بس بتكلم عن جودة الخامات... بصراحة مش اللي يندفع فيها المبالغ الخزعبلية دي..

جرب الاربع عربيات وعلى حسب احتياجاتك اختار زي ما انا عملت... وربنا يوفق!!!