الموضوع: هى السيينا وحشة يا جماعة؟

الف شكر يا جماعة؟ طيب ايه رأيكم ازود شوية واجيب رينو سانديرو مستعمل؟ معلش استغللكم بقى

طب ماتجيب حاجة كل الناس بتشتغل فيها احسن عشان ماتتعبكش

والله يا بلدياتى كلامك مضبوط بس مش حابب ابقى زى كل الناس اللى هو نظام الكورى مفيش احسن منه مع ان فيه احسن من الكورى كثير وبسعر الكورى او اعلى حاجة بسيطة., احنا اللى عملنا قيمة للكورى :)

المشاركة الأصلية كتبت بواسطة akedwany

انا معايا السيينا 1400 عربية سواقتها متعة لان كل مشاويرى وسط البلد و الزحمة فسهل تتحرك بيها و تركن و و و و

بس ناوى اغيرها لسبببن 1- شكلها التصميمي الخارجى وحش
2- لما نحمل ناس كتير فى الكنبة الخلفية بتنزل و ده مش حلو على مطبات مصرنا الحبيبية اسف انا اقصد الجبال اللى على الطريق

بس عامة انا كذا مره اطير من على المطب و العربية محصلهاش حاجة ( طبعا بتخبط ) بس احتمال مستقبلا ياثر على الشكمان ( بقالها معايا 9شهور)

حاجة تانية لازم تعرف اسعار قطع الغيار عشان التوكيل مثلا المرايا الواحدة اعتقد 600 ج و طرمبه الباور ب1000ج بس فى صينى و برازيلى و تركى ومصرى عشان كلهم كانوا بيصنعوها بس خلى بالك فى تجار يجيبوا البرازيلى ويقولك 2500 طرمبة الباور

استهلاك البنزين فى السفر و لا حاجة ههههه عمى راح بيها من اسيوط لمطروح بالتنك 49 لتر و كان بيشغل التكييف على فترات لكن وسط البلد و الزحمة تاكل كتييير تقريبا من غير التكييف 14 لتر = 100 كيلو هو على ما عرفت من مواقع عربية و اجنبية ان استهلاكها العام 7 لتر = 100 كيلو

واسعة و شنطتها كبيرة / عزلها رائع و تكيفها تلاجة

سوقها الاول و جربها تلاقيها حاجة ناعمة كدا ! الفتيس صحيح فيه سوسته للمارش و الخامس يترفع بصباعبن لفوق سنة لما تجرب هتعرف و متخافش مش وحشه القصة دى تعود مش اكتر

رغم ان العربية دى تتفوق على غيرها مع ذلك مش منتشرة كتير عيب التوكيل الحمار اظن

انا بدور على سيينا ، حضرتك لو عايز تبيع ممكن تكلمنى ؟ 01207799376 - حلوان

المشاركة الأصلية كتبت بواسطة mahmoud83mizo

انا بدور على سيينا ، حضرتك لو عايز تبيع ممكن تكلمنى ؟ 01207799376 - حلوان

بص ياباشا اللى معايا بتاعة الاسرة و الوالد مش هيبيبع حاليا ( لو هبيع هبعتلك رسالة خاصة) بس عامة الصراحة محناجة تترش من خدوش عادية و خبطة فى الرفرف ماشية 172 الف كيلو انت تتمنها بكام وهى معاها اكصدام جديد لسه متحطش لحد دلوقت لان الموجود حاليا متجرح و شكلو مش حلو
و محتاجة كاسيت جديد و تسيلك فتحات التكييف حاجات بسطة يعنى

معلش حضرتك زعلان من الكوري ليه ؟

بص ياباشا أنا هقول كلام ممكن يضايقك بس صدقني ابعد عن الشخصنة هتستفيد ...أنا لا أعرفك ولا تعرفني وبالتالي مش عاوز أضايقك ...
البحث عن التميز لمجرد التميز ده مشكلة ...الكوري ممتاز فعلا وأثبت جدارة ...قطع غيار متوفرة ورخيصة وبتعيش وعربيات زي الفل...لو الصيني كدة يبقى أهلا بالصيني ...لو الصعيدي كدة يبقى أهلا بالصعيدي ...
أنا الأول بردو كنت بفكر في إني أشتري حاجة مميزة مابقاش زي الشعب بس اكتشفت اني غلطان ...
الكلام ده تعمله لو عايش في الخليج أو أوروبا ...أو أي بلد محترمة ...انما بلد زي مصر حاول تعيش زي الشعب علشان ماتلبسش في الحيطة ....حتى في التليفونات ...ياتجيب نوكيا ياتجيب سامسونج ...لنفس السبب لو الشاشة اتكسرت ... شاشات السامسونج في عبد العزيز مرطرطة وأي حد بيعرف يركبها ...انما تروح تشتيريلي سمارت فون توشيبا !!!!!!!!!!!!! دور بقى على بطاريته لو جدع !!!