الموضوع: عايز اشترى رادياتير

السلام عليكم المشكلة فى الحرارة كانت مبهدلانى غيرت غطاء مافيش فايدة غيرت خراطيم مافيش فايدة القربة الاقيها تتملا على الاخر والكلام ده بعد تنظيف الريدياتير عند الراجل قالى مش هانفع افوره واسيخه هاغسلهولك كده قولتله اللى انت شايفه المهم غسله بمياه النار واخد 25 جنيه
روحت البيت لاقيت فيه تسريب المهم روحتله قالى ده خرطوم القربة اللى دخل على الزور عايز افيز جبتله افيز جرب لاقى لسه فى مياه الزور كان فيه خرم والكلام ده بعد الغسيل علشان ميا النار بتاكل اى لحام قعد يحاول يجيب مياه قالى الزور وحش قولتله غيره غيره وحاسس ان الزور عالى شوية واخد 20 جنيه
قولت اجرب بالعربية شوية كده لاقيت الحرارة تبقى كويسة وبعدين الاقيها بتعدى النص افتح الكبوت الاقى القربة مليانة وبتغلى اقوم جايب حته قماشة وحاطتها على الغطا وبفتح سنة سنة ودخان وفوران ميا اقوم نافخ فى القربة الميا تمشى والحرارة تهدى تانى روحتله تانى قام شايل غطا الموتور وقالى ده جوان وش سلندر فى شوية طحينة صغيرة جدا قولتله انا لسه عامل عمرة مافيش اسبوع
اخد بعضى على الميكانيى شاف الغطاء قالى ده تعريق مافيش اى حاجة وقالى بتبان من مقاس الزيت لو عامل طحين مش من فوق ودور علشان يشوف اى بقلله فى الريداياير التقليب كويس من غير بقلله قالى مين اللى قالك كده موتورك ميه ميه سليم قالى هات غطاء ريداتير جديد ستانلس زور طويل جبت واحد المياه مابقتش ترجع للقربة تمام بس وصلت سموحة وقولت افتح ابص علبى المياه درجة الحرارة تحت النص بشوية لاقيت مستوى القربة ولا زاد ولا نقص والخرطوم الاسود بتاع الكوعة العلوية اللى فوقت لاقيه اتنفخ نفخة زى البلون اكنى هايفرقع قولت يلا قومت مبطل العربية وانا خايف قوت هايفرقع مياه بتغلى والخرطوم بقى عامل زى تعبان الاناكوندا وهى بتاكل اتنفخ جامد جيب خرقة وواحد واحدة بفتح الغطا وخايف الا الخرطوم يضرب فى وشى المهم فتحت الغطا كام نقطة مياه حرقولى ايدى وضغط الخرطوم رجع تانى وانكمش لمقاسه الاصلى
روحت للميكانيى قالى الخرطوم ده طرى جيب واحد جديد 20 جنيه وركبته ومشوار والعربية بقت تسخن تانى المهم حسيت ان فيه سدد طبعا الصنايعى عايز يبيع وخلاص من عنده بيقولى هات واحد جديد بعد كل ده بقله بكام بيقولى 450 وهاخد القديم بتاعك
هو نحاس 3 ماسورة راكب بقاله سنتين
قولت مابدهاش والتاكسى واقف بقاله اسبوع مش بيشتغل بسبب الموضوع ده وانا نفسيتى تعبت واتخنقت من الصنايعية
روحت البيت قولت انا فوره واسيخه يلا بقى
لاقيه من زمان عندى فى البيت مسدس نار زى بتاع السمكرية بس مش لمبة الفهوه كبيرة بتاعته
وواصل بخرطوم غاز قمت موصله على امبوبة الغاز وطبعا بعد الفحص كويس على الخرطوم لا يوجد اى تسريب قمت مميل الردياتير وصدرت عليه الحرارة وبمفك انزل اللحام على الارض
تم فك الخزنتين الحمد لله بدون اى اضرار ومسكت عين عين وقعد اسلك واحد واحدة واشتريت مياه بطارية عطيته واحده بردهوكله تمام النصيبة بقى عايز اقفله تانى مش عارف الحمه كويس هههههههههههههه

بحاول اسخن على الازير واسحب بسرعة بس تعبت وصيام قومت اخده لبتاع الردياتير قولتله قفلهولى الحمه قالى مين اللى فوره قلتله انا قالى مش هاينفع دماغ الصنايعية بقى ياعم قفل من جنيه -100 وبره عنك قالى مش هاينفع قولتله ليه مش عارف يقول اى حاجة يبص وخلاص واللى نازل عليه مش هاينفع قالى هات راتير استعمال وادهولك غسلة ويبقى حنين فى السعرواللى نازل عليه هاخد منك القديم علشان بياخد منه حاجات بيشتغلنى والله الريدياتير من جوه فله
المهم روحت البيت وكسلت اروح لواحد تانى بتاع ريدياتير علشان الحمه

حد يعرف بتاع ردياتير كويس فى اسكندرية الاسعار؟
انا فكرت اشترى الومنيوم واركبه علطول بس سمعت انه مابيتلحمش
النحاس جديد بيقولى هاخد القديم وتدفع 450
النحاس استيراد مابين 200 \250 بس مالفتش لسه واحد قالى ماعنديش بس الاسعار مابين السعر ده
حد جرب الريدياتير الالومنيوم على مروحة دايركت زى لادا 2105 ؟
any idea

يا ترى بصيت على ترموستات الكوعة ولا لأ؟
ممكن يكون بيعلق وتكون نتيجته ان المياة ما تروحش الريداتير