الموضوع: مساعده في شراء بيجو 307

مبدئياً 50 ألف كيلو علي عمر العربية معناه إن العربية بنت ناس وكان أستهلاكها خفيف جداً.
خصوصاً لو العداد مظبوط, وأنا مش شاكك أنو ملعوب فيهبس طبعاً هتتأكد منه برضه في التوكيل,
وهيبان من حالة صالون العربية لو بحالته يبقي العربية مكنتش بتستخدم كتير,

وأنا شايف أنها لقطة خصوصاً أنو لو حالة الفتيس كويس, وأنت طالما طلبت أنك تستلمها في التوكيل والراجل متجاوب في كل الحاجة يبقي واثق من عربيته و بايع ,, وأنا لو مكانك بالحالة دي هبقي شاري..
لأنك مش هتلاقي حاجة تانية زي دي بالسعر دا تاني,

بالنسبة للفتيس هوا اللي فيه عيوب, بس علي حسب ما شوفت في كل الموديلات, في ناس كتير اعرفهم معندهاش أي مشاكل معاه..
لو عايز تستلم العربية بقي أكشف عليها وأستلمها في بيجو غمرة, أبو رواش سئ جداً, أبعد عنهم هياخد منك كشف ومش هيعمل لك أي حاجة..

وأنت أطلع معا صاحب العربية في يوم جرب العربية وأحرق علي الغيارات يعني أنقل علي rpm 3.5 ل 4 لو قدرت..
وأقف وأطلع تاني مرتين تلاتة, لو الفتيس رزع معاك أو أتاخر في أنه ياخد الاول بعد ربع ساعة من مشواركم ويكون الزيت بتاعه سخن يبقي هيتعبك,
غير كدا لو محلصش أي رزع ولا نت بعد ما تسخن يبقي إن شاء الله هيكون مفهوش مشاكل.

الدينامو برضة زيه زي أي عربية تانية, في عربيات كان فيها مشاكل في الدينامو, وعربيات كتيرر لأ.
فمتخوفش نفسك منك لأنك كدا كدا بتتكلم في عربية عمرها 6 سنين, بس عاملة كيلو متر قليل يعني مش متهانة,
وأي عربية في العمر دا بتطلب بعد فترة شوية أصلاحات وتكاليف.

ال 307 قطع الغيا رفيها مش غالية أوي وفي رينج أسعار الكوري, والدينامو بتاع الميتسوبيشي هوا اللي بيركب فيها لو حصله حاجة, بس عيب الدينامو مش منتشر زي الفتيس فأتاكد من حالة الفتيس الأول في غمرة لأن دا المكان الوحيد اللي بيفهم فيه.

طبعاً علي الكيلو متر دا لو لسه معملش صيانة ال 60
هتعمل حسابك أول ما تجيبها تغير سير كاتينة وبلي, وسير مجموعة والبلية الخارجية بتاعته,
لأن السير كاوتش وليه عمر أفتراضي 60 ل 70 ألف كيلو متر, أو 3 لأربع سنين, وبعد كدا بيقي خطر تمشي عليه, ومتخاطرش أنك تقول أستني بيه وأغيره كمان 10 الأف مش هتفرق معاك وتكلفة تغيرهم حوالي الف جنية,

وهتغير برضه الأربع كاوتشات لو لسه كاوتش الفابريكة عليها لأنو أكيد هيكون ناشف حجر.
ولما تغيره هتحس أنك راكب عربية زيرو عن تجربة في تغير ال 4 فرد. لأن البيجو 307 كاوتشها عريض وعفشتها مريحة جداً, بكاوتش جديد كمان وتربيط عفشة هتحس أنك راكب زيرو.