الموضوع: زيت موبل مع ام 11

ايه اخبار اللزوجة .. و هل فيه شوائب " رايش" ولا اللون بس هو اللي قالقك؟

مفيش شوائب هوا اللون بس وطبعا مهما كان ملمس ايدى مش عارف اللزوجة مظبوطة ولا لا يعنى ممكن تكون نسبتها قليلة يعنى ايدى مش مقياس مظبوط للزوجة

اه طبعا انا فاهم قصد حضرتك .. انا اقصد ان تغير لون الزيت ممكن يتم عند 2000 كم مثلا و ده مش معناه انه يتغير .. مجرد بس حس الزيت علي ايد حضرتك وقارنه بملمسه اول ما حضرتك جبت الزيت .. او "من رايي"
طالما الزيت 10الاف و كل اللي مشيه 6.5 الف كم ..والزيت مش مسبب ان الموتور صوته اعلي من الطبيعي او مش بينقص كثير يبقي سيبه مع المتابعة كل الف .

واخيرا ده رايي يحتمل الخطا و الصواب و انتظر رد باقي الاعضاء

فكك من زيت موبيل .......... هات شيل او ليكوي مولي
وامشي براحتك مع ليكوي مولي معاك لحد 15 الف كيلو
مع شيل مش عارف كام بالضبط
لون الزيت مش مقياس على استهلاكه ........ز بعدين الزيوت التخليقية مش بتفرق معاها اللزوجة قوي
لانه مش بتحلل بالحرارة بسرعة زي الزيوت المعدنية

من الآخر اهم حاجة مقياس الزيت يكون مضبوط ... دي اهم نقطة
ثانيا نوع الزيت .............
مفيش حاجة اسمها الزيت بيمشي 3000 او 10000 . طالما اللزوجة عند مستوى طبيعي يبقى الزيت شغال وصلاحيته سنة جوه المكنة حتى لو مشي 50 الف كيلو ...........

بالنسبة بقى للزجة ... الزيت اللي رقمه 0-40 اخف من الزيت اللي رقمه 20-50 .... ولكن 0-40 بيعيش اكتر من 20-50 رغم ان الفرق في اللزوجة كبير ............

الزيوت بتتقسم لثلاثة انواع
زيوت معدنية - زيوت شبه تخليقية - زيوت تخليقية بالكامل

الزيوت المعدنية اللي هي عند الناس بتمشي 3000 كيلو وبيكون سعرها رخيص ودي اللي اللزوجة بتاعتها بتتأثر مع الاستخدام بسرعة

الزيوت شبه التخليقة افضل من الزيوت المعدنية في خواصها وتتحمل التغيرات الحرارية لدرجة اكبر

الزيوت التخليقية هي الافضل واقصاها تحملا للضروف

الفكرة في تصنيع الزيت انه انا عايز حاجة لزوجتها عالية علشان تتحمل الاحتكاك
بس معروف ان كل ما اللزوجة زادت هتزيد درجة التجمد تدريجيا .... وهتزيد درجة الغليان

هنعمل مقارنة بين المياه والعسل كمثال مبسط ......

المياه تتجمد عند درجة حرارة صفر مئوية وتغلي عند درجة 100
بينما العسل يتجمد في الثلاجة او في الشتاء عند درجة حرارة 10 مئوية ويغلي عند اعلى من 100 ( نقول 120 مثلا )

يعني درجة اللزوجة بتبقى اعلى ما يكون عند درجة حراة قرب درجة التجمد واقل ما يمكن قبل درجة الغليان

طبعا بالنسبة للزيوت بيكون الفارق بين التجمد والغليان اكبر ...

طيب .. انا عندي في مصر درجة حرارة الجو تقريبا 30 ودرجة حرارة المحرك بتكون 90 .. فالفارق مقبول نسبيا

يعني ممكن احط زيت لزوجته كبيرة عادي لانه مش هيتجمد بسرعة لان درجة حرارة الجو عالية

طيب لو احنا في روسيا ودرجة الحرارة سالب 20 وحرارة المحرك 90 هضطر استخدم زيت خفيف نسبيا علشان ما يتجمدش ... بس المشكلة ان الزيت دا لزوجته هتكون خفيفة وهيتحلل بسرعة فهضطر اغير الزيت بسرعة لان الزيت اصلا خفيف ومش هيستحمل الحرارة العالية بتاع الماتور كتير.... ومش هقدر احط زيت لزوجته كبيره لانه هيتجمد في الماتور لما العربية تكون مركونه

علشان كدا تم اختراع الزيوت التخليقية ..... في زيوت تخليقية درجة تجمدها 35- مئوية ودرجة غليانها 245 مئوية .... وبكدا تبقى الزيوت دي مناسبة لكل الظروف في الاستخدام .... دا الى جانب ان الزيت دا هيكون خفيف نسبيا فهيقلل استهلاك الوقود

هتسمع ميكانيكي يقولك ان زيت 10000 بيبوظ الماتور ويقولك انا حطيته لزبون ولما غيرته بعد سنه لقيته ناقص كيلو .... هنا المشكلة في الماتور مش في الزيت

علشان كدا لو الماتور قديم ما تستخدمش زيت تخليقي لان الزيت التخليقي بيكون خفيف والمكنة القديمة كبسها بيكون مش تمام .. فبنستخدم زيت معدني لسببين اولهم لانه تقيل مش هيتسرب جوه المكنة بسهولة ثانيا لن سعره رخيص فلو نقص ممكن نجيب غيره ونزود بسهولة

يا رب يكون حد استفاد

بالنسبة للأرقام اللي نعرف بيها الزيت المناسب
هتلاقي الزيت مكتوب عليه 5W-40 or 0W-40 or 10W-40 or 15W-40 or 20W-40 or 20W-50

الرقم الصغير يدل على اقل درجة يعمل فيها الزيت .....

والرقم الكبير يدل على اعلى درجة حرارة يعمل فيها الزيت ...

رقم 5 دا مش معناها 5 مئوية الارقام دي بتتفك على جدول وتديك درجات الحرارة اللي بيعمل فيها الزيت

يعني رقم صفر يعني درجة حرارة سالب 35 مئوية

والرقم الكبير اللي هو 50 مش معناه 50 مئوية ... طبعا الارقام دي بتتكلم عند درجة حرارة الجو مش الماتور

طيب احنا نختار ازاي ........... كل مالرقم الصغير يقل يبقى الزيت خفيف يعني 0W - اخف من 10w

الرقم الكبير كل ما يزيد اللزوجة تزيد ...... يعني 40 اخف من 50

طيب كدا اصبح في محورين بيأثروا على الزيت واحد بيزود والتاني بيقلل

بالنسبة للدول الحارة زينا وزي الخليج يهمنا الرقم الكبير .... يعني في مصر الزيت لازم لا يقل عن 35 .... ويفضل لو يكون 50 ....... ( الكلام دا على الرقم الكبير )

الرقم الصغير بالنسبة لينا مش مهم قوي لان الزيت عندا عمره ما هيتجمد .......

طيب يبقى احسن زيت ممكن نستخدمه في مصر اللي هو 0W-50 or 5W50 or 10W-50
بس المشكلة ان الزيوت دي غالية قوي وكلها تخليقية بالكامل
فنستخدم بدلها 5W-40 or 10W40 or 20W50 ودول شبه تخليقي
او 20W-40 or 15W-40 or ودول بيكون معدني

في مصر بالنسبة لينا اهم حاجة الرقم الكبير يكون اما 40 او 50 والرقم الصغير مش هيفرق

موبيل اللي حضرتك بتحطه بيكون 5w-40

لكن انا انصح حسب كاتالوج السيارة وحسب افضل سعر انك تحط 10w-40
وهو الزيت الموصى به للاسبيرانزا ........ واعتقد انه افضل زيت شبه تخليقي يفضل استخدامه في مصر

طبعا مواتير التربو والحاجات دي ليها ظروف مختلفه ويفضل معاها الزيوت الخفيفة

عذرا على الاطالة

الكلام دا مش من شخصص متخصص ........ يعني ممكن المهندسين تلاقي اخطاء ...

عن تجربة 3 سنوات مع موبيل شيل افضل مليون مره صوت الماتور احسن من الاول