الموضوع: سيارة في حدود 70.000

ان شاء الله ربنا يرزقك بسيارة جيدة أخى الكريم
ممكن حضرتك تفكر فى السيارة جيلى أعتقد انها ب 80 الف زيرو
و دة تقرير عنها أعتقد الزيرو هيكون أفضل من المستعمل
http://www.nilemotors.net/Nile/316840-a.html
تحياتى

المشاركة الأصلية كتبت بواسطة mwanted

يمكن يكون الموضوع دة مش جديد بس انا هحاول اني اقدم فية بعض الاقتراحات اللي مكن تسهل لينا الاختيار انا بتكلم يا جماعا علي (( المستعمل طبعا )).
انا كنت براسل ناس كثير علي الخاص بسبب الموضوع دة ولما زهقو مني اقترحوا عليا اني اعمل موضوع عشان نجمع فية اكبر الاراء المختلفة خصوصا من ملاك الفئة السعرية دية .. وكلنا نستفيد.
طبع في مننا كثير معاهم المبلغ دة ومشعرفين يشترو اية سعات الواحد يقول انزل لل 50.000 واجيب (لانوس ولا افيو ولا فيرنا ... وخلاص اهو نصيب ) وهبفضل معايا شوية فلوس اضبط بيهم العربية وبعدين طب ماكمل لل 80.000 واجيب (المازدا ايورو ولا هوندا الجيل الجديد ونعدي بقا ...) فضلت رايح جاي بقالي تقريبا سنتين ولا طايل دة ولا دة لما دماغي خلاص
لقيت ان ممكن الواحد يحاول يجيب عربية من دول ( الميجان / الالنترا hd / النيسان / البومة .... مين يزود )
ولازم طبعا نحط المعايير اللي عليها هنختار علشان نسهل علي بعض الاختيار المناسب لكل واحد فينا ودية هتبقي من وجهة نظري المتواضعة.
1- الامان :وخلي بلكو محدش يقولي التقييم العالمي لان العربية بتنزل مصر حاجة تانية (فاضيا)
2- العزل
3- الراحة (العفشة)
4- الثبات
5- ارتفاع السيارة :ودة عشان المطبات الجميلة اللي عندنا وخصوصا لو شايل ناس معاك
6- التصميم الداخلي ( التابلوة / مقابض الابواب / زراير التابلوة ... وغيرها)
7- الخامات الداخلية
8- التصميم الخارجي
9- اتساع المقصورة (الامامية والخلفية )
10- اتساع الشنطة
11- الموتور من حيث ( التسارع / استهلاك الوقود ..... )
12- قطع الغيار والصيانة الدورية
13- الوكيل
ولو فية اي اقتراحات او اضافات ياريييييت لان الموضوع اساسا معمول عشان كدة ..
اخيرا وليس اخرا اتمني من جميع الاعضاء المشاركة في الموضوع بما يمتلكون من الخبرة وليس التحيز لنوعية معينة علي حساب الاخري

بص يا سيدى ، بما انك عايز تقييم دقيق فأنا مش هتكلم غير عن العربيتين اللى معانا و هقيمهم من حيث النقط اللى انت بتسأل عليهم....

أولاً الهوندا سيتى (2005 - 2006 - 2007) علماً بأن 2005 موتورها مش فى تك:

1- الامان :اللى معانا مفيهاش ولا Airbags و لا ABS ، بس فيها لمبة ال ESP عموما فى النقطة دى تحديداً الفئة بتختلف و لو لقيت الفئة الأعلى من اللى معايا هيبقى فيها عوامل أمان ممتازة.
2- العزل : ممتاز ، مش بسمع صوت الموتور تقريباً
3- الراحة (العفشة) : جيدة جداً ، بس مع المطبات بتاعتنا بتبدأ تصوصو ، لاكن بتظبط لما تتربط و تتصان كويس.
4- الثبات: متوسط (نسبة لعربيتنا التانية)
5- ارتفاع السيارة :ممتاز جداً بالنسبة لعربية سيدان و تحس ان هوندا كانت بتنتقم للسيفيك و هى بتعمل السيتى فى موضوع الارتفاع ده ، و يجوز ده سبب ان الثبات بتاعها مش رائع.
6- التصميم الداخلي : جيد ، و كل حاجة فى مكانها باستثناء زراير المرايا الكهرباء مكانها نش حلو عشان فى التابلوه على الشمال و أنا بفضلها تبقى فى الباب ، بالنسبة للكاسيت هو Built in فى التابلوه.
7- الخامات الداخلية: التابلوه بسيط انيق و البلاستيك اللى فيه من النوع النضيف و مش بيطلع أصوات ، و خامات الفرش من جيد الى جيد جداً.
8- التصميم الخارجي: معقول و دى أذواق ، الشكل الجديد أحسن بمراحل ، بس أغلى بكتير من ميزانيتك.
9- اتساع المقصورة (الامامية والخلفية ): جيد جداً للأمامى و الخلفى ، بس اكيد أقل من العربيات الأكبر حجماً لأنها فى الأخر عربية صغيرة ، بس ده جه لحساب الشنطة.
10- اتساع الشنطة: ممتاز جداً
11- الموتور من حيث ( التسارع / استهلاك الوقود ..... ): مواتير الهوندا من أقوى المواتير الموجودة ، اللى معانا 1300 و اداءه ممتاز بس بيتأثر بالتكييف للاسف ، استهلاك الوقود أكثر من ممتاز.
12- قطع الغيار والصيانة الدورية: قطع غيارها غالية سنة نسبة للفئة دى ، ده بالنسبة للأصلى يعنى ، لاكن فى حاجات كتير تقليد بمستوى معقول و اللى بيشتغلوا فيها كتير جداً عشان مفيهاش أى تعقيدات تكنولوجية.

13- الوكيل: ممتاز كصيانة و خدمة بس حراق لأقصى درجة ممكنة ، حرامية من الاخر.

العيوب الاجمالية: الثبات المتوسط ، قلة الأوبشنز (مفيهاش ولا مالتى فنكشن و مثبت سرعة و تكييف بكر عادى و مفيهاش اموبيلايزر عشان السرقة فى حين ان السى 4 فيها كل ده) ، صغر حجم تنك البنزين بشكل ملحوظ (40 لتر بالاحتياطى) ، تأثر الموتور بالتكييف ، بساطة التابلوه ، عوامل أمان أقل.


ثانياً السيتروين سى 4 (2005 - 2006 - 2007) بتاعتى 2007 أوتوماتيك و كله نفس الموتور و الفتيس لحد 2007:

1- الامان :ممتاز جداً و أقل فئة فيها عوامل أمان ممتازة ، و فيها فئات نازلة ب 6 Airbags ، وزى معظم الأوروبى اللى بينزل بره زى اللى بينزل عندك بالظبط من حيث عوامل الأمان عشان معندهمش هزار فى المنطقة دى بالذات على عكس الكورى و بعض اليابانى ، طبعاً ABS ده كلام مفروغ منه.
2- العزل : ممتاز لما تقفل الازاز مش بتسمع العالم الخارجة خالص ، بس صوت الموتور أعلى من الهوندا خاصة أول ما تدور العربية ، أو لما تفتح التكييف.
3- الراحة (العفشة) : سيئة فى رأيى و يجوز تكون مشكلة عندى مخليانى أقول سيئة لاكن هى فى العموم عفشتها ناشفة ، كده كده هكشف عليها كمان كام يوم ان شاء الله.
4- الثبات: ممتاااااااااااااااز ، الأوروبى كله كده و دى خاصة لأنها أصلاً من أقوى عربيات سباقات الرالي ،لو العربية سليمة خد بيها غرزة على 180 و ميهمكش.
5- ارتفاع السيارة :جيد جداً بالنسبة للثبات ، أقل من الهوندا طبعاً بس مش وحش ، يعنى وأنا لوحدى أو معايا حد مش بحك خالص مهما كان ارتفاع المطب و عديت بيها فوق مطبات عالية بغباوة ، مجربتش بصراحة أكتر من 2 فى العربية و أعدى على مطب عالى أور كلها كانت مطبات مقرفة بس مش مرتفعة عشان أقيم.
6- التصميم الداخلي : جيد جداً ، و كل حاجة فى مكانها كزراير ، العدادات ديجيتال تحسسك انك راكب موديل 2013 ، فيها شاشة بيانات لكمبيوتر الأعطال و تكييف Dual climate zone digital ، و تصميم الكراسى شيك جداً.
7- الخامات الداخلية: ممتازة و الحتت البلاستيك اللى فيه من النوع النضيف جداً و فيه تجزيعه زى الخشب كده و مش بيطلع أصوات طبعاً ، و خامات الفرش ممتازة جداً لأنها طبعاً فئة عالية.
8- التصميم الخارجي: رااااااااااااائع بالنسبة لى و أكتر حاجة شدتنى فيها و خليتنى أجيبها بالرغم من الموروث المصرى القديم ، بس دى أذواق طبعاً.
9- اتساع المقصورة (الامامية والخلفية ): جيد جداً للأمامى و جيد للخلفى بس من أوسع العربيات الهاتش باك فى الفئة دى.
10- اتساع الشنطة: مقبول ، لو أسرة كبيرة و شنطكم كتير يبقى فكك من العربية دى تماماً ، سعتها 340 لتر ، حلوة لأسرة صغيرة.
11- الموتور من حيث ( التسارع / استهلاك الوقود ..... ): هى 1600 ، تسارع مش خارق عشان الوزن (1200 كيلو فاضية) فا ممكن عربيات أقل تطلع منك فى الأول ، انما لما بتاخد سرعة مش هشوفوها خصوصاً مع الثبات العالى و الايرودينامكس بتاعتها ن لو مانيوال بقى هيبقى التسارع أقوى بكتير ، استهلاك البنزين عالى بالنسبة للفئة ، متوسط 9 الى 11 لتر لكل 100 كيلو و انت فاتح التكييف (عشان أنا فاتحه معظم الوقت تقريباً) بس تانكها سعته ممتازة 60 لتر فى عربية هاتش باك و عداد البنزين computarized.
12- قطع الغيار والصيانة الدورية: قطع غيارها معقولة بالنسبة للفئة بتاعتها ، ده بالنسبة للأصلى الفرنساوى ، لاكن فى حاجات تقليد أسبانى بمستوى جيد جداً و فى كذا واحد بيشتغلوا فيها كانوا شغالين فى التوكيل بس هى مش زى الهوندا ، يعنى مش أى حد يمد ايده فيها عشان الغجر لو لعبوا فيها هتزعلك جامد ، هى مش معقدة للدرجة بس بالنسبة للصنايعية الفتايين سفينة فضاء.

13- الوكيل: جيد جداً بالنسبة لى بالرغم من سمعته السيئة مع البروتون ، بس مع السيتروين كويس كصيانة و خدمة و أسعاره فى الحاجات الاستهلاكية المعتادة أرخص من توكيل هوندا مثلاً ، بس الخدمة الهوندا أفضل.

العيوب الاجمالية: العفشة الناشفة ، ضعف التكييف نسبية للهوندا (مش هيخليلك الجو تلاجة بس بالنسبة لى معقول) ، صغر حجم الشنطة ، استهلاك بنزين أعلى نسبياً فى فئتها ، بعض الناس حست ان السقف واطى شوية يعنى لو ركب جنبك حد من الناس الطوال جداً (فوق مترين) ممكن ميبقاش مرتاح ، الفتيس الاوتوماتيك بيحتاج صيانة بدرى عن غيره و بيتغيرله Valve body و زيت لما المشكلة دى بتبدأ تبان فيه بس بتتظبط لو حصلت ، المانيوال مفيهاش الكلام ده طبعاً.

يا رب أكون قدرت أفيدك و ربنا يوفقك للصالح و لا تنسى الاستخارة....

راي حل وسط ياريس نظيفة وتعديلات بسيطة
مجرد رأي ..