ساعدوني في مكان أجيب منه سيراميك بسعر كويس

**asaeed** · 13-08-2013 12:01 AM

السلام عليكم إخواني الكرام
كل عام وأنتم بخير
الحمد لله ربنا أكرمني واشتريت شقة بعد ما زهقت من الإيجار.. ربنا يدي كل إنسان المسكن الطيب
دلوأتي أنا في مرحلة التوضيب وكنت عايز مكان أجيب منه سيراميك بسعر كويس ويكون عنده تشكيلة كبيرة من السيراميك
في بعض من الإخوة أفادوني أني ممكن أجيب من مكان اسمه (المهاجرين، أو ترسا في الهرم (سوق فكيهة)} بس البعض الآخر قالوا لي أنهم بيسرقوا في الأمتار الكلام ده صحيح؟؟

والبعض الآخر شار عليا أجيب من منفذ بيع كليوباترا خصوصًا أنه مكان مضمون بس متخوف من الأسعار تكون غالية..

ياريت يا جماعة الله يبارك فيكم تفيدوني أجيب من أي مكان ويكون أهم حاجة السعر والمعاملة لحسن أنا مزنوق في الوقت، ولو حد من الإخوة عنده معلومات عن أسعار السيراميك ياريت يكتبهالي برده وأكون شاكر ليه جدااااااااااا

**أبو صلاح** · 13-08-2013 09:29 AM

بص ياباشا
انت هتنزل معارض الشركات الكبيرة زي السلاب وغيره وتختار شكل البلاطة اللي يعجبك وكذلك طقم الحمام لو حبيت وتاخد ارقام الموديلات
تنزل على سوق المهاجرين في عين شمس وتسال برقم الموديل والفرز وتشوف اقل سعر وتتوكل على الله
المقاس محدش يقدر يخدعك فيه لانه معروف جوه كل كرتونة كام متر وكام بلاطة
خد بالك في سوق المهاجرين حتى لو اتفقت مع محل صغير ماتقلقش لانه بيروح ياخد من مخازن الوكيل وبيديلك انطباع ان دي مخازنه

**Ahmed_selmy** · 13-08-2013 10:19 AM

فى ناس يتجيب من الفجاله

**fepsceasar** · 13-08-2013 10:22 AM

انت لو مكانك فى الهرم فى معرض ومخزن كليوباترا فى اخر شارع المطبعة عند الدائري ..الميزة ان المعرض والمخزن جنب بعض وبتشيل حاجتك وتمشي وفى كليوباترا ممكن تجيب فرز تانى وانت مش قلقان قوى

**amr011111** · 13-08-2013 10:27 AM

بالنسبه لموضوع انك تروح السلاب وتاخد رقم البلاطه اعتقد ان ده مش هينفع علشان تقريبا هما عاملين كود خاص بالبلاطه علشان مش كل الناس تروح تتفرج عندهم ومش متشترى
فملهاش لزمه الفرجه هناك
انت شوف شقتك قريبه منين
عندك ترسا فى الهرم وعندك سوق المهاجرين فى عين شمس

وهتتفرج وتشيل برضه ان شاء الله
موضوع ان الامتار تتسرق ديه مستبعده جدا لان كرتونه مثلا بيبقى فيها 9 بلاطات ( مثلا 40 فى 40 سم ) يبقى الكرتونه عباره عن 1.44 متر مربع
وبالتالى هتشوف عاوز كام متر وهتجيب كام كرتونه
هو بس خد بالك ان انت ممكن تجيب فرز اول وتطلع فيه برضه بلاطات لونها افتح من بقية البلاطات وساعتها ابقى جمعهم فى كرتونه ولا حاجه ورجعهم وبالتوفيق

**asaeed** · 13-08-2013 01:40 PM

النهاردة نزلت اتفرجت في معرض السلاب إللي على اتوستراد المعادي لأن شقتي قريبة منه.. بالفعل عنده أشكال وألوان كتييييييييرة أوي.. وهو عارض منتجات شركات السيراميك (كليوباترا، رويال، ألفا، الجوهرة) وكل شركة ليها نسبة خصم بس المشكلة أن السعر بعد الخصم غالي برده الفرث الثاني بيتراوح بين 40 إلى 75 جنيه.. الحاجة الثانية وهي الأهم.. أن المندوب قال لي ممكن تعجبك بلاطة معينة ومتلاقيش الفرز الثاني بتاعها وتضطر أنك تأخذ الفرز الأول وده أغلى برده وذلك لأن الفرز الثاني عليه طلب كتييييييير وبيخلص على طول
ياريت يا رجالة رأيكم ضروري هل فعلاً أجيب من المهاجرين ولا الفجالة ولا سوق ترسا؟؟ ياريت إللي جرب من الأماكن دي يقول لي إيه نظامهم وهل هما بيغلوا في الأسعار وانت تفاصل معاهم؟؟؟

**ayman20100** · 13-08-2013 05:42 PM

انا جبت من ترسا اكتر من مرة

الخلاصة فيها ان الاسعار واحدة من محل للتاني ياعنى مش هتلف كتير واغلب المحلات عارضة نفس الموديلات وهتبقى نفس المخازن الفرض الوحيد انهم سماسرة بس بياعني والمخازن واحدة والموديلات تقريباً واحدة والتفاوت في الاسعار مش كبير والفرز التاني برضه كويس مش فرق كبير عن الاول ومش بيقل كتير في السعر اوقات بيقل 2 جنيه بس في المتر

لو فيه خصومات في كليوباترا (بيعملوا خصومات كبيرة كل فترة ) يبقى روح واشتري من هناك
ما فيش انزل ترسة واتفرج واشتري من اي محل واي بلاطة تلاقيها هتلاقيها في كل المحلات التانية تقريباً وشوف فرق السعر الى يريحك

اختار براحتك وخليك في الكليوباترا ومش اقل من فرز تاني وفاصل في الاسعار والى ما يعجبكش سيبه كلهم تقريباً زي بعض

**Akram** · 13-08-2013 06:04 PM

انا جبت من ترسا اكتر من مرة .......
نصيحتي ليك روح و اتفرج اول مرة و اكتب الموديلات اللي عاجباك (نوع و رقم السيراميك مش بيتكرر)
و بعدين تجيب من محل كبير ويفضل لو المخزن قريب
أهم حاجة غير السعر موضوع الـ tone , وده معناه ان الكمية اللي انت عاوزها لازم تكون من نفس الرصة بمعني نفس التشغيلة من المصنع علشان لو هيديلك جزء من الكمية من رصة و جزء من رصة تانية أو مخزن تاني يبقى ممكن تلاقي فرق في اللون و أحيانا فرق في المقاس و لو مللي ....
لما تروح تجيب من المخزن لازم يكون معاك حد ناصح يشرف على التحميل و يشرف على التسليم في بيتك
و أي كرتونة شكلها مش سليم متاخدهاش اصلاً و اشترط عليهم لو في زيادة في الكراتين انك ممكن ترجعها .

**mr.foxman** · 13-08-2013 08:18 PM

منفذ بيع اي مصنع سيراميك

**asaeed** · 14-08-2013 12:02 AM

جزا الله كل من ساعدني بالرأي والمشورة
ولكن يتبقى سؤال للأخوة إللي دوروا كتييير في المعارض الكبرى زي كليوباتر والجوهرة والرويال.. الخ.... وفي الآخر جابوا من سوق ترسا هل هناك فرق كبير في السعر بين سوق ترسا والمعارض إللي ذكرتها دي؟؟؟
يعني أنا كانت عجباني السيراميكا إللي شكل الباركيه 13×40 سم إللي هي في الصورة دي وأنا سالت عليها في كليوباترا الفرز الأول بعد الخصم 48 جنيه بس بصراحة حاجتهم مضمونة ولو فيه حاجة هرجع لهم تاني
فهل لو نزلت ترسا ممكن أجيبها بأقل من السعر ده؟؟؟؟