أمام الجامع عندنا أخلاقه مش كويسة وكل الناس مش عاوزاه نتصرف أزاي ؟

**AshTurbo** · 13-08-2013 06:29 PM

السلام عليكم ... بأختصار ومن غير كلام كتير أمام المسجد غير سوي وكل الناس بتشتكي من الحاجات اللي بيعملها زي أنه بيصرف فلوس التبرعات بمزاجه وزي ماهو عاوز وطبعاً بما يخدم مصلحته تاني حاجة بيتكلم مع الستات بطريقة زبالة وبيطول فالكلام معاهم وأكتر من ست أشتكت منه وأولاده دائماً بيلعبوا فالجامع ومبهدلينه ومشتتين المصليين والجامع ماشاء الله حاجة محترمة ومش ناقصة حاجة غير أمام محترم ورجل دين وليس رجل دنيا ... نتصرف أزاي بدل ما أنزل أضربه لأنه عمل مشكله النهاردة ومش طايقه وخلاص ماسك نفسي بالعافية وياريت اللي يعرف نتصرف ازاي نروح الأوقاف ولا نعمل أيه هو الجامع في أسكندرية عامة ولكم جزيل الشكر .

**BESO516** · 13-08-2013 08:02 PM

نفس المشكله حصلت عندنا
بس غلط غلطه عمره الجمعه اللى قبل رمضان ودعا على الجيش والسيسى بطريقه مباشره وبذكر الأسماء

طبعا دلوقتى هو ولا فالجامع ولا فالمنطقه كلها لأنه يومها امه محمد كلها قامت بالواجب معاه بره المسجد طبعا

**waleedrahmy** · 13-08-2013 08:30 PM

شكاوي الي وزارة الاوقاف
وبلاغات في الشرطة
حاينقلوه
ويظبطوه جزاءات و..الخ
ده الرسمي
والودي زي ماانتوا عملتوا

**Zaki Bashkha** · 13-08-2013 11:22 PM

للاسف النوعية دي موجودة من ائمة المساجد سواء كانوا اخلاقهم مش كويسه او بيستخدموا بيت الله في السياسة وسب المعارضين لهم ,واعتقد ان المسئولية تقع علي الاوقاف لان يجب ان تسيطر علي جميع مساجد وزوايا مصر وتتحري الدقة فى اختيار الخطباء من ناحية الاخلاق والبعد عن الحديث عن السياسة .

**AshTurbo** · 13-08-2013 11:34 PM

المسجد لسه مبني ولسه مقدمناش على ورق للأوقاف ولكن أنا نزلت أتصرفت وشوفت امام اتمنى يكون قد المسئولية وهنزل بكرة عالأوقاف أقدم هناك والله المستعان وربنا يصلح حالنا جميعاً .

**Y a r i s** · 14-08-2013 02:26 PM

اهم حاااااااجة
اوعه تمد ايدك او تضرب او تشتم. امام. اوووووووووووعه .
لان لو حصل كده يبقى عليه العوض ومنو العوض في البلد .... كل واحد قايم من النوم او مدايق شوية او متزربن حبتين. يلاقي الشيخ بيخطب خطبه. وحشه او مش عجباه. يقول للشيخ هستناك بره الجامع وواللهي لا اوريك ... شيخ الجامع ليه قداسة وحرمة .... عاوز تتعامل معاه. يا اما بالنصح يا بالجوء لوزارة الاوقاف اما شغل الدراع. والصوت العالي وهوريه وهضربوا كده احنا مبقيناش في دولة ... شيخ الجامع اسمو امام. والامام في اللغة العربية. يعني قائد. ولو كل واحد ضرب. امام .... كده مش هنلاقي حد يقول قال الله وقال الرسول ويخاف ينضرب وساعتها عليه العوض ومنو العوض ...

المساجد. ليها حرمتها وقداستها والقائمين عليها ليهم احترامهم ... واحترامهم من احترام المكان ... اما موضوع عيال بتلعب كل المساجد. فيه اطفال بتلعب ورى لمن يكون عندك اطفال. هتعرف انا كاب مهم اني اشوف ابني بالطول بالعرض يمين شمال موجود في المسجد بخليه يدخل معايا. يجري شوية يلعب شوية وشوية شوية. يصلي جمبي وشوية شوية تبقى الصلاة في دمو الموضوع حساس شوية ... فالله يرضى عليك اوصيك ونفسي بسياسة ضبط النفس ...

مع الاسف مع الاسف الجيل الحالي ميعرفش يعني ايه امام. او ايه مكانة الامام. .. على زمنا كان اي معاملة حكومية. يقولك هاتلي ختم شيخ الحااااااااااااارة. ولغايت دلوقتي كل قسم شرطة في موظف اسمو شيخ الحارة مع الاسف .
كان على ايامنا لمن نيجي نتجوز ولا نجوز كنا نرووح نسئل شيخ الحااااااااااارة عن فلان او عن فلانه .... شيخ المسجد مش بس راجل بيصلي بينا لأ. ده لمن تحصل مشكلة كبيرة بينك وبين مراتك ومش قادر تتفاهم مع اهلها. على طول تبعت لشيخ الحارة يصلح بينكم ويحكم بينكم .... حتى التجار لمن يوقف بينهم موضوع. اول حاجة. يقلك طيب تعاله نروح نسئل الشيخ والي يحكم بيه يبقى عليا تنفيذه .

انا مبديش طبعاً دور الالوهية للمشايخ لأ .( حاشاا لله)) .. لان الشيوخ بشر قد يصيبوا وقد. يخطئوا. لكن مينفعش. نهائي نهائي نهائي اني اهاجم الشيخ باليد او باللفظ لمجرد اني شاعر انوا اخطاء. ... والحمدالله الوسائل السلمية موجودة وزارة الاواقف حالياً عندها مفتشين وعندها كافت السبل لتغير اي امام انا عن نفسي صبرت على شيخ عندنا سنتين. سنتين يا راجل يا مؤمن. مع انو مش من الحي خالص. ومعرفش منين كان بيجلنا كان يجي يخطب فينا خطبت الجمعة سااااااااااااااااعة ونص وطول الخطبة متفهمش منو حاجة من زعيقوا وصوتوا العالي وصريخوا وكان الله يمسيه بالخير بيتكلم الف كلمة في الدقيقة يعني مبتفهمش منوا حاجة ابداً

لكن في النهاية الحمدالله وزارة الاوقاف استجابت للاهالي ومبقيتش تبعت الشيخ ده .... طبعاً كلامي ليس موجه لاحد ولكن بتكلم بالعموم. ولكل الناس اوصيكم ونفسي بضبط النفس ... وتحياتي

**Y a r i s** · 14-08-2013 06:56 PM

المشاركة الأصلية كتبت بواسطة estimation

شيخ الجامع شخص عادي لا هو نبي ولا رسول يتعامل عادي يعني لو غلط ياخد فوق دماغه

تمااام وعظيم وشيء رائع
بس مين بقه. يا استاذي الفاضل الي يحدد اذا الامام او شيخ الجامع غلط او مغليطش ... هل معقول نسيب الموضوع عايم وكل واحد. مزاجو مش رايق او مخنوق يطلع يفش خلقوا في امام المسجد !!!
يعني بالله عليك مين الي يحدد الامام غلط ولا لأ ... واحد مبيصليش غير كل فين وفين. ... ويوم ما يجي يصلي. ينزل طلطيش في شيخ الجامع ويقلوا اخلص يا مولانا. انتا لسه. هتقعد تحكيلنا قصص وحكايات .

انا طبعاً مش عارف اعمار الشباب هنا الي بكلمهم ايه ... لكن انا بناشد فيهم ضميرهم وعقولهم ... تصور مثلاً دكتور الجامعة غلط وهوا بيديكم المحاضرة ... هل معقولة يقوم تلميذ. ويلب الدكتور على قفاه ونقول اصل الدكتور شخص والي غلط ياخود فوق دماغو ... اذا الموضوع وصل لكده يبقى انهارت جميع المثل العليا لدى الناس. ساعتها هتنهار الاخلاق في البلد ... ومش بعيد الموضوع يوصل كمان لاي اب. يغلط او يتخذ قرار خاطء الابن يشوفوا خاطئ. تبص تلاقي الابن يضرب ابوه ويقول اصل الاب شخص والي غلط ياخود فوق دماغه. ... صدقني يا عزيزي لو فوضنا الموضوع للغة اليد او السب او الشتم ... مش هنخلص. وهينهار. المجتمع اكتر ماهو منهار ... اناشد فيكم ضمائركم. يكفي ان هذا الشيخ يحفظ كتاااااااب الله ... اذا هو شيخ ووحش. بلغ عنوا الوزارة ومفيش مسجد مش تابع للوزارة الاوقاف الا اذا كان جراش قلبوه. زاوية او جامع كده ... عامةً وزارة الاوقاف بتتصرف . وشكراً لسعة صدركم

**AshTurbo** · 15-08-2013 12:56 AM

على فكرة يا أستاذ Y a r i s أنا محكيتش تفاصيل كتير في الموضوع ولكن يوم الخطبة اللي دعا فيها وقال مصر تتعرض لحرب على الأسلام ولازم نتصدى للحملة دي الناس كلها بعد الصلاة وقفت برة الجامع علشان تضربه رجاله وستات وأنا تقريباً الوحيد اللي فالشارع اللي وقفتلهم لدرجة أن أمي اللي خلفتني قالتلي أنت شكلك أخوان ولا أيه ومش قايلي حاجة مضحكةطبعاً .... يافندم أنا كمدرس علم نفس فاهم ازاي أسيطر على مشاعري وأفصل تماماً بين رأي الشخصي في واحد معين وبين أني أعبر عن الرأي ده بشكل فعلي زي أني أسبه أو أضربه ومن الآخر كدة أنا الراجل دة مش طايقة ومع ذلك بعد ماخلصت الناس منه روحت وأعتذرتله وبوست دماغه مع أني مغلطش فيه وأترجيته يرجع تاني المسجد علشان ميحصلش فتنة ويتقال أن الناس ضربت أمام مسجد وكان هو بنفسه بيقولي أنت الوحيد اللي دافعت عني وربنا يكرمك ومع ذلك أنا نفس الشخص اللي رجعته الجامع وأنا بردوا نفس الشخص اللي عملت الموضوع ده هنا فالقسم وانا نفس الشخص اللي أتفقت امبارح مع شيخ تاني يدير المسجد وبأذن الله الشيخ ده هيمشي وربنا هيكرمنا بواحد أفضل منه ...... أتفق معاك تماماً على أن طريقة الحوار لازم وأمر ضروري متبقاش بالتعدي اللفظي أو او الجسدي لأن احنا هنا بندافع عن بوزيشن الأمام ده أو دكتور الجامعة زي ماقولت أو ظابط الشرطة أو أو أو من الآخر لو أنت ضربت امام الجامع او أستاذ الجامعة أو ظابط الشرطة على قفاه الضربة دي هتلف تلف وترجعلك على قفاك أقوى 100 مرة احنا هنا بندافع عن مجتمع وعن قيم ومباديء لو أنهارت هتنهار الدولة وكلنا هنضيع .