الموضوع: رجاء المساعدة ضرورى فى 308 موديل 2008

وعليكم السلام ورحمة الله,
حضرتك عملت الموضوع من ساعة بالظبط,,
وبتقفش علي الناس هنا أن محدش رد عليك.؟؟!!!! :)

أنا بره دلوقتي, لما أروح هرد عليك باللي أعرفة,
وفي الغالب لما محدش بيرد بيكون معندوش رد يفيدك بيه,
أو اللي عنده رد لسه مشافش الموضوع.

المشاركة الأصلية كتبت بواسطة medo_ramadan

والله انا بهزر مش اكتر انا عارف ان انا لسه حاطط الموضوع وبعدين انا عارف ومتأكد ان هنا الناس محترمة جدا" وبيساعدوا بعض لله اللى يعرفوا واللى مايعرفوش واكيد محدش هيبقى عنده معلومة ومش هيقولها و اكيد مش هقفش على حد وانا داخل اشحت منه و عايزه يساعدنى ههههه
وعموما" انا اسف جدا" لو هزارى اتفهم غلط بس والله لم اقصد اى اهانة او إساءة لاحد

ياباشا ولا يهمك, ومفيش أسف ولا حاجة.
أنا فكرتك قافش بس علي الناس فحبيت أقولك أن أكيد اللي شافو مش عارفين أو لسه مش عارفين يردو عليك,

وأهو في الحقيقة الأخوة الأفاضل ردو بردود وفية يمكن لخصت الموضوع كله,

وزي ما أستاذ ديدو قالك هيا فتيس جديد, ومختلف عن اللي كان في ال 307
عشان ال307 مكنش فيها أي مشاكل في الموتور, هوا الفتيس بس كان أساس المشاكل,
والعربية بتنزل بموديلين واحد تربو بفتيس 6 نقلات الكود بتاعه AT6,
وواحد بموتور 1.6 عادي بفتيس أربع نقلات كوده AT8

والأتنين دول غير الفتيس بتاع ال 307 الل كان كوده AL4 وتصميمهم مختلف عنه.

بس أنا هعلق نقطة في رد أستاذ أحمد,,
الكنبة اللي ورا واسعة مش صغيرة, ومساحة الرجلين فيها واسعة برضه ومريحة في القعدة,

ومفيش كنبة تالتة, العربية مش Station زي البيجو 504
العربية State Wagon نازلة 4بـ 5 كراسي عادي وشنطة كبيرة,,



في بقي أوبشن أنك تشتري كرسين تحطهم في الشنطة وأسمها كراسي أطفال مش بالغين,
ودي صورتهم,



والكرسي الواحد علي حسب ما قريت هنا في موضوع ب 5 الأف جنية في التوكيل, يعني الأتنين بعشرة, كتير أووي.





وبيقضو فعلاً علي مساحة الشنطة علي عكس العربية اللي بتبقي نازلة Station ل 7 ركاب بيبقي فيه مساحة للشنطة,




لقيت وأنا بدور لك علي صورة للكراسي الخلفية صورة غريبة, واحد واخد كرسي من الكراسي الأساسية بتاعت العربية, وحاطة مكان الكراسي بتاعت الأطفال,,
فأنا أستغربت لأني مجاش في بالي قبل كدا أن ممكن أجرب أركب الكرسي العادي مكان كرسي الأطفال,
عشان الكرسي بتاع الأطفال ضهره من ورا بيبقي عريض عن الكراسي العادية لأنه بياخد المساحة ورا كلها بكرسين بدل تلاتة وأوطي من العادي عشان السقف تقريباً,

فهنزل بكرة أجرب وأشيل كرسي من التلاتة الأساسين, وأركبة ورا وأشوف هيركب ولا لأ في ال 307




نيجي لميزة العربية ال SW الأساسية أنك ممكن تشيل فيها اللي أنت عايزة,
مرة جبت فيها غسالة أوتوماتيك من محل لواحد صاحبي كان بيدور علي عربية يجيبها فيها,
شيلت التلات كراسي اللي ورا كرسي اللي سايق قبل ما أروح المعرض, ودخلنا الغسالة فيها بكرتونتها دخلت ونامت مستريحة وجبنا معاها مكنسة كهربا كمان,
ووفرنا أننا أجرة عربية نص نقل تنقل الكلام دا وأننا ندور عليها والوش دا.


دي صورة لل308 شكلها صغير في الصورة دي عشان زاوية التصوير,
بس هيا أكبر من كدا.





ودي صورة لشنطة السيتروين C5

متهيألي تشيل تلاجة مستريحة.

المهم,,
أرتفاع العربية هوا اللي فعلاً سئ, بحسها واطية أوي,
أنا حاولت أشوف كام بالظبط كل المواقع بتفتي فيه,
وأغلب المواقع كاتبة شرطة - - فواضح أنو مختلف من بلد لبلد,
بس هيا عموماً في مصر أوطي من ال 307sw فأنت ممكن تشوف هتناسب الطرق اللي هتمشي فيها والمطبات اللي بتقابلك ولا لأ, عشان متقباش ماشي متأزم طول الوقت, أنا أعرف ناس باعت ال 508 من الصعيد عشان كانت بتحك في كل المطبات في بلدهم.
وعموماً لو أخدت المطبات براحة مش هتحك من قدام, ولو فاضي مش هتضطر تاخدهم المطب بالجنب, لو معاك ناس بس هتاخد المطبات بالجنب.


قطع الغيار فلتر الزيت الأصلي بتاعها من التوكيل ب 45 جنيه من التوكيل
يعني ب 50 جنية بالضريبة, دا اللي أنا عارفة عشان ركبهولي قبل كدا بالغلط في عربيتي ال 307

باقي الأسعار أنا مش عارفها بس كلها قريبة من ال 307
أسعار ال 307 سير مجموعة بحوالي 115
الكاتينة عندك جنزير مش هعرف أفتي ف سعرها,
فلتر هوا بحوالي 100 جنيه وزية فلتر التكيف,
فلتر البنزين كان ب 75 جنيه
طقم البوجيهات بوش أصلي من التوكيل 240 جنيه, ولو جبت طقم ياباني أصلي NGK ب 120 جنيه مفيش فرق ما بينهم.
التيل قدام بحوالي 400 وشوية, وورا 300 وشوية, وحضرتك كاتب أنك معاك هيونداي جيتز شوف سعر التيل في الجيتز بكام وقارنة بسعر التيل في البيجو 308
وباقي الأسعار عموماً مش مبالغ فيها زي ما الناس بتفكر, وفي سعر الكوري وفي حاجات أقل منه زي التيل.

وأنت لما تيجي تشتري العربية, هتاخدها تطلع بيها علي التوكيل ويفضل غمرة,
هتعمل كشف عليها وهيشوف الأعطال اللي مسجلاها وهيقولك لو كانت محكوكة وراشة قبل كدا ولا لأ, ولو كانت بتعمل صيانة عندهم هيقولك غيرت أيه ومغيرتش أيه في معادة,
وهيعملك فاتورة بالحاجات اللي مطلوبة تتغير أو تتصلح, <<< ودي أهم حاجة في الكشف.
وساعتها هتعرف أسعار كل حاجة من فلاتر زيت وهوا وبنزين وتكيف وتيل وباقي الحاجات اللي محتاجة تتغير.

وساعتها تبقي تيجي وتكتب لنا الأسعار دي هنا عشان نعرف منك الأسعار الأكيدة.

بالنسبة توافر قطع الغيار, أنت لو هتغير فلتر زيت كل 10 الأف كيلو وزيت معاه, أو أي قطع غيار تانية, فهتلاقي قطع غيارها في محلات قطع غيار بيجو,
لأنها بقالها 4 سنين في السوق أهي فالقطع أنتشرت بشكل كبير في المحلات أصلي وأستيراد زي ال 307.