باركولى ياجماعه اخيرا اشتريت عربيه ايه اكس بعد مفاوضات وبعد تردد منى حيث ان كتير من اصحابى وبعض الصنايعيه قالوا لا اوعى والكلام اللى انتو عارفينه. انا قلت لازم اخرج من الفيات واجرب حاجه تانيه واشتريت والحمد لله.
ادونى بقى النصايح الاوليه
عرض للطباعة
باركولى ياجماعه اخيرا اشتريت عربيه ايه اكس بعد مفاوضات وبعد تردد منى حيث ان كتير من اصحابى وبعض الصنايعيه قالوا لا اوعى والكلام اللى انتو عارفينه. انا قلت لازم اخرج من الفيات واجرب حاجه تانيه واشتريت والحمد لله.
ادونى بقى النصايح الاوليه
الف مبروك
اعمل الصيانات الدوريه الكامله
تغيير كل السيور والفلاتروالزيوت واهمهم سير التقسيمه
مراجعه للاربع عجلات الكاوتش البلى العفشه نظام الفرامل والتيل وزيت الباكم
غسيل دوره التبريد وتنظيفها جيدا وبعد مشوارين والتاكد انها مبتسربش وضع ميه خضراء
انت كده امنت فراملك عفشتك فلاترك زيوتك تبريدك اساسيات مشيك على الطريق
متشكر جدا على النصائح الرائعه . بالنسبه لسير الكاتينه والزيت والفلتر هو لسه مغيره قبل مااشترى العربيه بيومين. اما سير التقسيمه ده اول مره اسمع عنه ياريت تقولى ايه هو واقول ايه للميكانيكى.
بالنسبه للعجل والكاوتش صاحب العربيه كان مغير خمس فرد كاوتش جديد وملاه نتروجين . الفرامل تمام التبريد كويس بس انا برضه هنظف دوره التبريد واحط ميه خضراء.
بالنسبه للعفشه الكبالن بتخبط فى الملفات ياريت لو عندك فكره تقولى تمنها كام. وبرضه علبه الدركسيون فيها رجه ياريت برضه تقولى تعمل كام.
برضه فيه اكره بايظه بتاع باب السواق عايزه تتغير وايضا السنتر فيه باب والشنطه بيعلق مش بيقفل من اول مره مش عارف بقى اغير القربه بتاعتهم والا اركب سنتر جديد بس انا مستخسر السنتر الاصلى
عايز نصيحه بقى فى تركيب انذار اركبه والا بلاش عشان الكهربائى مايلعبش فى الضفيره ومش لازم انذار. والا اركبه
وشكرا مقدما
تقريبا تسميتك لسير الكاتينه هى اللى اقصده بسير التقسيمه
الكبالن معرفش سعرها حاليا بس لو قولنا بالتقريب زى الكبيره حيبقو فى حدود600
السكاتره(اللى بتقصد بيها علبه الدركسيون) كانت بتخبط عندى ودى من اغلى الاشياء فى الصغيره وتعمل فى حدود 500 ومستعمله مشوفتش منها جديد بصراحه
شوف بتاع ابواب يظبطلك الابواب والسنتر الاصلى ميتعوضش بيركب جزء من الطبله هات البايظ استعمال
العربيه دلوقت بقالها معايا اسبوعين والحمد لله ماشيه تمام. لسه مغيرتش الكبالن والسكاترا لانى قلت امشى بيها على كده لحد مااشوف كل اللى فيها
العربيه لما بمشى مشوار طويل الاقى عداد الحراره رفع الى 110 يعنى عدا د الحراره بيعدى النص بشرطتين . وبيرجع شويه تانى بس انا خايف تكون كده بتسخن والمروحه بتفضل شغاله على طول وبعد مااطفى العربيه تفضل المروحه شغاله حوالى 10 دقائق. هل ده طبيعى والا مش طبيعى وايه الحل؟ اعمل ايه.
السخونه واجهتنى اول ماجبت العربيه وبهدلتنى جدا عشان احدد مصدرها واخليها فى سخونه الفيات بس جاوبنى على الاسئله دى عشان احدد واقولك تعمل ايه
الرداتير عندك الاصلى الالومنيوم ولا نحاس
المروحه الاصليه حجمها كبير جدا وضغط هواها جامد هى دى اللى عندك بتسحب 15 امبير لوحدها من البطاريه
انت فاهم كويس نظام اخد الهوا ولا اقولهولك
سربنتينه التكييف موجوده قدام الرداتير ولا شايلها
عملت غسيل للدوره ولا لا عندك تسريب ولا لا الغطا محكم بتاع الرداتير حاطط ميه خضرا
الراداتير اللى راكب نحاس مش الاصلى
المروحه اللى راكبه عاديه يعنى مش كبيره اوى
لا مش فاهم ايه هو نظام اخد الهوا
سربنتينه التكييف مش موجوده اصلا فى العربيه بس ناوى اركب واحده على الصيف الجاى
لا لسه مش عملت غسيل للدوره ومش حاطط ميه خضرا
اعتقد افيش تسريب لانى لما حبيت ازود ميه لقيت الراداتير مليان زى ماهو مش بينقص منه ميه
الرداتير النحاس وده ميزته انه بيتفك ويتنضف ماسوره هاسوره بس عايز صنايعى كويس وتشوفه وهو بيسلك ماسوره ماسوره(ده كان اساس المشكله عندى)
المروحه تعرفها من قطر الموتور الصغيره قطر الموتور زى موتور المساحات 5 سنتى والكبيره حاجه 10 الى 12 سنتى ولازم الكبيره عشان التكييف وعشان سرعه التبريد ومتغيبش شغاله
سربنتينه التكييف لما بتكون قديمه بتبقى معظمها مسدوده من التراب والطينه الخ فتركب واحده تتاكد انها مبتعقش الهوى لانها بتفرق
اجل غسل دوره التبريد بعد تسليك الرداتير
نظام اخد الهوا
العربيات دى بتشتغل بدوره مغلقه 1.4 ضغط جوى وده معناه ان الميه بتوصل ل120 بدون ما تغلى
عشان تحكم دوره التبريد بتتاكد ان الغطا محكم عشان يحافظ على الضغط ومينفعش تزود ميه بعد لما العربيه تسخن لان الضغط حيتسرب وتاخد هوا
معنى الهوى ان مسارات التبريد فيها هوى بيقلل كفائه التبريد
عندك مكانين تاخد منهم الهوى مكان خلفى عند مواسير السخن بتاع التكييف وده غير ضرورى الا لو انت موصل مواسير السخن يبقى لازم تاخد منه الهوى(كان ملغى عندى) ومكن قدام جنب ترموستات الكوعه ومكنه الحراره بيبقى الن كيه 10 بتدور العربيه (طبعا بارده)وتفتح الغطا وتزود ميه وتفتح مسمار الان كيه وتفضل تزود حتى يطلع ميه من المسمار تقفله وتقفل الغطا والدوره كده مظبوطه
فى سبب ثانوى تانى كان مسخن عربيتى كان خرطوم الباكم بتاع عجله عامل زى صمام عدم رجوع يدخل الباكم وميرجعوش فكان كاتم العربيه لحد لما فهمت وعملته
انا معايه دكتوراه فى الax فى تبريدها ووصلت بيها انها تبقى درجه حرارتها 60-70 فى الشتا و70-80 فى الصيف حتى مع التكييف وعمرها ما وصلت كسرت ال90 لحد لما بعتها (يعنى خلتها زى الفيات فى السخونهfبعد لما كنت الحراره 120 عادى فيها)وعمرك ما حتستمتع بالعربيه الا لما موضوع السخونه يكون امره انتهى تماما (ومستحيل تاخد من العربيه دى تكييف الا لما تنى قصه السخونه نهائئ
وانا معاك بس متبخلش عليها ونفذ الخطوات دى مره واحده ورا بعض
متشكر جدا على النصايح الغاليه دى وهنفذها خطوه بخطوه بعد العيد على طول . وحسب مافهمت هتبقى بالترتيب كده:
1. اروح لبتاع راداتير يسلك الراداتير تمام ماسوره ماسوره ويحط مياه خضرا وطبعا ياخد هوا
2. لو المروحه صغيره اشترى مروحه كبيره واخلى بتاع الراداتير يركبها مكان الصغيره
كده ابقى خلصت موضوع الراداتير والسخونه . نيجى بقى للتكييف هو دلوقت السربنتينه مش موجوده انا هشترى واحده جديده واركبها. وعلى فكره اللى اشتريت العربيه منه كان شايل السربنتينه من 3 سنين وقالى انه لما كان بيشغل التكييف كانت العربيه تطفى بس الكباس شغال تمام وباقى المواسير والوصلات موجوده وحالتها حلوه يعنى ناقصه على السربنتينه وموضوع انها بتطفى لما يشغل التكييف.