أنسب نوع زيت لأي محرك بيتم تحديده عن طريق معرفة حالة المحرك و عمره و مدي حبك الخلوصات بين البستم و الشميز داخل المحرك و اللي بالتالي هتمنع اختراق الزيت ليها و احتراقة و بالتالي نقصانه
السؤال هنا ... هل بتشتكي من نقص في الزيت اللي انت بتستخدمه دلوقتي و اللي نوعه معدني ؟؟ و لزوجته عالية و تقيل عن التخليقي ؟؟
انواع الزيوت بالترتيب من اعلي لأسفل حسب الأخف الي الأثقل و اللي كلما زاد عمر المحرك و بدأ يتهالك بننزل بنوع الزيت لتحت
1- زيت تخليقي و ده اخفهم و اغلاهم سعرا و اللي بيقعد اطول فترة تشغيل (من 10 الي 15 الف )
2- زيت نصف تخليقي و ده بيتغير من 7 الي 10 الاف كيلومتر
3- زيت معدني و ده بيتغير من 4 الي 5 الاف كيلومتر (و ده اللي انت بتستخدمه اللي هو شيل الاصفر مثلا )
4- زيت متعدد الدرجات و ده بيتغير من 2 الي 3 الاف و ده بيماثل شيل الأحمر
طبعا كل شركة مصنعه للزيوت عندها كل الانواع دي و بيضاف عليها انواع اخري حسب اختلاف درجات الحرارة و الأداء و قوة المحرك و تصميمه و عنفوانه و لكن بالنسبه لينا احنا بتنحصر في الانواع دي
مصر حاليا بتشهد طفرة في توفر انواع مختلفة من الزيوت و تنوع لم تشهده من قبل و كل نوع له خصائصه و مكان للتعبئة و انا شخصيا بحبذ الانواع الجديده علي سبيل التجربة و خاصة انها معبأه تحت كوالتي كنترول و مراقبة اعلي مما يتم في مصر
اللي بيعبأ في مصر و الامارات ( موبيل - شيل - فيسكو - كاسترول - و انوع اخري معرفش بتتعبي فين )
اللي بيعبأ في اوروبا ( زادو - وولف - و انواع اخري )
بعد استخدام اخوه هنا للأنواع الاخيره بيشكروا فيها جدا فممكن نجربها من هنخسر حاجه
طيب انت عايز تعرف انهي نوع من الأربعه اللي ذكرتهم فوق هتستخدمه :-
انت حاليا بتستخدم زيت معدني فممكن تجرب النصف تخليقي عشان تبقي مسكت العصاية من النص و تتابعه و تتاكد انه مش بينقص طوال فترة استخدامه و بعدها لو لقيته كويس اثبت عليه و لو حبيت تعلي كمان حط تخليقي كامل و برضه تابعه حتي تتأكد عدم النقصان و اللي بيأكد ان حالة المحرك كويسه داخليا
في النهاية حابب اقلك ان افضل الأنواع من حيث الأداء و الحفاظ علي المحرك و السحب و استهلاك البنزين و كل شيء هو نفس الترتيب اللي كتبته فوق من التخليقي و نزولا الي متعدد الدرجات
انا شخصيا حاليا بفاضل بين زادو و وولف و هشوف عشان اغير من فيسكو التخليقي الي اي منهما التخليقي برده ان شاء الله
المفضلات