أنا عملتها والحمد لله في مارس 2009 بعد ما كان نظري حوالي -4 وكنت لابس نظارة من تالتة ابتدائي... الحمد لله!!
العملية ليها شوية تجهيزات زي الكشف على حالة القرنية ودرجة الاستجماتيزم علشان يشوفوا ينفع العملية تتعنل ولا لأ...
العملية نفسها أخدت حوالي 20 دقيقة وبعدين ركبولي عدسات معينة لمدة يومين وبعدين شالوها وكتبولي نوع قطرة لمدة اسبوع وبعدين رحت تاني كتبولي نوع قطرة اسمه Refresh Plus لتقليل جفاف العين اللي بتسببه العملية... قالولي تستخدمه بانتظام لمدة 6 شهور بس انا طنشت بعد شهرين ولا حاجة!!
من بعد العملية مباشرة لازم تلبس نظارة شمسية (ماركة محترمة) اثناء التعرض لأشعة شمس... وده بيكون لمدة شهر وبعدين مش بتبقى مضطر تلبسها على طول...
خلي بالك ان النظر بيتحسن تدريجيا وممكن يفضل يتدرج لحد 6 شهور لحد ما يوصل لأعلى درجة...
بتروح بعد العملية بشهر يتأكدوا من وصول النظر للدرجة المطلوبة وبتتكرر الزيارة دي بعد 6 شهور...
خلال الفترة الأولى بعد العملية (ممكن توصل لشهور) بتحس بجفاف شوية في العين بالليل ولما بتبقى راكب عربية مثلا بتشوف اضاءة اعمدة الانارة مشوشة شوية... وده طبعا بيروح بالتدريج!!
أساسا هم هينصحوك ما تسوقش خاااالص لمدة 3 ايام او اسبوع على ما اتذكر بعد العملية...
أخيرا انا عملت العملية في مستشفى مغربي (طول عمري كنت بتعامل معاهم هم بس عموما سواء نظارات او كشوفات)... التكلفة كانت 500جنيه للتحليلات قبل العملية + 5500 للعملية نفسها (للعينين)... وطبعا ده كان في 2009 فمش عارف ايه الدنيا دلوقتي!!
نصيحة لوجه الله: بلاش تسترخص في الموضوع ده وروح مكان موثوق زي مغربي لأن والله زميلي في الشغل عملها بعدي بسنة وكان متحمس جدا لما شاف حالتي بس للأسف راح مكان عملوها له بحوالي 3000جنيه وقتها وبعد شهرين تلاتة بدأ يشتكي تاني من قصر نظر فلما راحلهم قالوله العملية ما نجحتش والفترة ال6 شهور اللي بعد العملية بتبقى اختبار لنجاح العملية من عدمه(!!!) ورجع زميلي يلبس نظارة تاني لحد دلوقتي! للأمانة مش فاكر اسم المستشفى اللي عمل فيه بس النقطة انك يا ريت ما تسترخصش في الحكاية دي!!! دي عينيك!!
اسف للإطالة واتمنى لك التوفيق!!
المفضلات