السلام عليكم
انا مقدم علي شراء سيارة باذن الله و محتار جدا بين التويوتا كورولا 2014 فئه اولي اوتوماتك ب 175 الف و الاوبل استرا سيدان 2013 انجوي 172 الف ارجو المساعده من اهل الخبره لاني ناوي اشتري خلال الاسبوع القادم باذن الله ...
السلام عليكم
انا مقدم علي شراء سيارة باذن الله و محتار جدا بين التويوتا كورولا 2014 فئه اولي اوتوماتك ب 175 الف و الاوبل استرا سيدان 2013 انجوي 172 الف ارجو المساعده من اهل الخبره لاني ناوي اشتري خلال الاسبوع القادم باذن الله ...
بميل دائما للالماني
انا شايف ان الأسترا افخم واحلي
انا شفت الكورولا في الواقع مش قوي يعني تحس انها بقت اصغر وبقت شبابيه قوي
بفضل الاسترا بردو (مجرد راي)
الكورولا طبعا -- صيانة اسهل - اعادة بيع اعلي - قوة تحمل للبهدلة - قطع غيار ارخص -
لو كنا في بلد تانية غير مصر كنت قولتلك الاسترا ,, لكن مصر ليها معايير اخري
معايا الكوزمو ومريحاني الحمد لله بس الكورولا برده كويسه وربنا يوفقك للخير
انا شايف ان (شكل) الكورولا الجديدة احلى من الاسترا... واعتقد ان الكورولا برضع هتكون اوسع من الاسترا اللي انا شايف انها ضيقة... في المقابل تابلوه الاسترا فااااجر بصراحة وانا شايفه الافضل في الفئة دي...
عموما احنا لسة منعرفش اداء الكورولا على الطريق هيبقى عامل ازاي... ولو قسنا على اخر شكلين منها يبقى الاسترا هتكتسحها في الثبات على الطريق طبعا...
المحير هنا اننا لسة منعرفش ايه ظروف الكورولا ومحدش جربها لسة على الطريق لمسافات طويلة وعلى سرعات عالية... بس اللي اكيد ان الكورولا مع الوقت هتكون اسهل في الصيانة واقل شوية في اسعار قطع الغيار وافضل شويتين في اعادة البيع...
لو بدور علي شكل وبرستيج وفخامه وثبات =استرا
اعتماديه واعاده بيع وراحه بال وعمليه = كورولا
وبصراحه اكيد اي حد بيشتري عربيه في المبلغ ده بيدور علي البرستيج والفخامه عشان كده هختار الاسترا
مشكلتنا كمصرين اننا بنفكر في بيع العربيه قبل مانشتريها وبنفكر في حوادثها قبل مانركبها عشان كده عمرنا مبانعرف نستمتع بحاجه
.................................................
انا بشكر كل الاعضاء الي ردت ... انا روحت النهارده توكيل تويوتا الي علي صلاح سالم و شوفت الكورولا الجديده .. شكلها الخارجي حلو جدا تحس انها شبابيه اوي و سبورت بس لما ركبتها من جوه حسيت ان التابلوه بتاعها مش قد كده .. هوا حلو اكيد بالمقارنه بالكورورلا 2013 عملو تغيير كبير بس برضو موصلتش لدرجه فخامه تابلوه الاسترا .. و كمان حسيت ان الخامات في العربيه من جوه مش اوي حتي زراير الازاز الكهرباء شكلها وحش جدا مفهاش شكل البومبيه شكلها عامل زي بتاعت الاسبرانزا كده !!! .. و ده شئ غريب جدا انا اخويا معاه هيونداي أي 30 و شكل الزراير حلو جدا بالنسبه للكورولا .. حاجه كمان كل الناس بتتكلم علي ارتفاع الكورولا و بيقولو انه 125 سم ... و معني كده اني هلبس كل المطبات مرتاح !!!! ياريت حد يفيدني في النقطه دي لان حتي لما سألنا علي صفحه تويوتا مصر علي الفيس ردو علينا و قالو انها فعلا واطيه و ده عشان ثبات العربيه !!!! .. في المقابل انا روحت و شوفت الاسترا جميله جدا بس كل الناس بتزم في توكيل منصور و بيقولو انو حرامي و المعامله مش تمام و مش عارف قطع غيارها هلاقيها بره التوكيل ولا لأ !! ... بالنسبه للالوان الاسترا لاقيت لون عجبني جدا لون بني غامق شكلو شيك اوي ... الكورولا شوفت الوانها تقليديه جدا بس لاقيت لون شكله حلو اوي هوا بين السيلفر و الجراي بس مشكلته انه مش بينزل غير فرش بيج و التابلوه فيه جزء بيج فا العربيه من جوه شكلها زباله !! ... كده ما مفيش قدامي غير الجراي او الاسود .. و الجراي ماكنش معروض كانو عرضين كل الالوان الا هو فا معرفش شكله عليها هيبقي حلو ولا لأ !!! ... و نقطه اعاده البيع انا مش هتفرق معايا لاني هحط كل الفلوس الي معايا في العربيه دي و مستحيل افكر ابيعها ولا بعد 10 سنين !!! انا شوفت العربيتين و فعلا لسه محتار .. ايه رأيكم يا رجاله ؟؟!!
لو تسمح تقولي ايه اخبار العربيه معاك و بقالها قد ايه معاك و هل انت واجهت مشكله في انها ضيقه من ورا ؟؟ لاني روحت و شوفتها و حسيت ان الكنبه بتاعتها ضيقه اوي لو رجعت الكرسي شويه و قعدت مرتاح الي ورايا مش هيعرف يعد رجلو هتخبط في الكرسي !! ... و أداء العربيه بشكل عام ايه و اخبار التوكيل ايه و قطع الغيار ؟؟ ياريت تفيدني بالمميزات و العيوب الي شوفتها حتي الان و الف شكر مقدما :)
انا بالصدفة كنت مع احد الاصدقاء كان عاوز يشوف السوبارو اكس في واحنا رايحين شوفت التويوتا وشايف انها سيئة للغاية خامات رديئة وشكلها مسروق من الهوندا ومش واسعة وشكل التابلوة عادي
المهم روحنا ابو غالي نشوف الاكس في. طبعا عربية غاية في الروعة
ولكن لفت انتباهي الامبريزا حجم كبير وخامات ممتازة وشكل التبلوة كويس الي حد كبير وطبعا فور ويل وجنوط 16 وزجاج ملون وسعر الهاي لاين 185
دة بخلاف فرق قفلة الباب بينها وبين التويوتا فرق شاسع والعربية وهي دايرة هدوء تام مافيش فايبريشن نهائي
بخلاف النقطة الاهم وهي ان السوبارو ياباني والكورولا ودي المفاجئة تركي
انا شايف لو ياباني يبقي السوبارو ولو اوروبي يبقي الاوبل
انا مش قاصد احيرك بس انا للاسف ماكنتش متخيل تويوتا تعمل كدا
العربية التويوتا الجديدة اخرها تتقارن باللوجان
مش هاتخسر حاجة خد فكرة وروح شوفها مش هاتندم وخاصة قطع الغيار سألت عليها رخيصة العيب اللي فيها الوحيد سعر اعادة البيع
وعموما ربنا يهديك و يوفقك للي فية الخير ان شاء الله
بص يا باشا... بناء على جملة حضرتك الأخيرة (و نقطه اعاده البيع انا مش هتفرق معايا لاني هحط كل الفلوس الي معايا في العربيه دي و مستحيل افكر ابيعها ولا بعد 10 سنين !!!)... انا هقول لحضرتك توكل على الله وهات الأسترا لأني شبه متأكد انها افضل من الكورولا حتى قبل ما اجرب الكورولا... طالما انت -زيــي- مش بتهتم قوي بإعادة البيع يبقى تجيب الأسترا على طول وتسيبك من الكورولا والالنترا والسيراتو والحاجات دي (مع احترامي ليهم)...
انا معايا الكوزمو وهيه مريحاني جدا الحمد لله عشان اغلب سواقتي فى طرق سريعه و النقطه دي الاسترا تكتسح فى الثبات و الامان
لكن لو مشاويرك كلها جوه البلد اظن كرولا حتبقي احسنلك بس استني شويه لمي تعرف كل عيوبها
الاستاذ redshot بعتلك علي الخاص موضوع الكوزمو بس مش عارف ليه الرد بتاعي مش ظاهر عندي في الصندوق فمش عارف وصلك ولا لا
8 استرا .... 7 كورولا ... حيرتوني اكتر :majd(4):
عموما انا معاك لو احتجت تسال فى اي حاجه عن الاسترا و كمان حتلاقي اكتر من تقرير وافي عنها هنا فى المنتدي
بالنسبه للكورولا لسه شويه عليها عشان نعرف مميزاتها و عيوبها
رايي لو ناوي على الكورولا استني لما الناس تجربها خصوصا بعد مشاكل التقفيل فى جنوب افريقيا
انا عندي سوال بس للناس اللي مختاره الكورولا في الاستطلاع ده عن تجربة وللا بس عشان اسم تويوتا؟
الكورولا الجديدة علي فكرة عربية حكاية وفيها اوبشن كتير بس برضو الالماني لا يعلي علية
انا اختار الاسترا
بالنسبه لموضوع منصور انا دايما بسمع انو توكيل مش تمام بس شفت موقف قدامي مختلف كنت مع ابن خالي شاري اوبترا بقالو فتره والعوامه بتاعت البنزبن فيها مشكله بتقرا غلط وسعات متقراش اصلا قالهم عليها غيروها من غير اي اعتراض بعد ما كشفو عليها من غير مشاكل ومن غير ولا مليم فا حاسس ان الناس بتبالغ لكن هو بيبالغ جدا في اسعار فطع الغيار ودي الي مفروض تجيبها من برا مع اي توكيل
انا شايف الكورولا الجديدة ممتازة جدا بس مشكلة ارتفاعها عن الارض هتبقى فعلا صعبة عشان كده استرا افضل بكتير
من أفضل العربيات السيدان الامبريزا عن تجربة بعض الاصدقاء، يابانى 100% و4 وييلدرايف ومش بتحتاج تغيير قطع غيار قبل 75000 (حسب تقرير بملحق الاهرام للسيارات خلال معرض الفورميلا السابق) مشكلتها إعادة البيع وللاسف وكيلها مش مسوقها كويس فى مصر.
بس أنا عن نفسى كنت بفكر فى الأوبل أسترا الفئة التانية لما كنت بشترى من فترة قريبة ولكنى جبت شكل تاني غير السيدان (suv).
انا شفت الكورولا النهاردة في معرض جنب بيتي، بصراحة عربية أقل حاجة تتقال عليها انها وهم، سيبكم من الصور، العربية في الحقيقة أجمل بكتير.
انا داخل اقولك فكك من الكورولا و لو عايز فى المقارنة دى يبقى الاوبل
لو عايز حاجة من بره المقارنة دى يبقى السوبارو الامبريزا عربية وهم و احسن عربية فى الفئه دى
احجز تست درايف ليها و روح اتفرج عليها و اسأل على قطع غيارها و صياناتها و مصنعياتها و متسمعش لحد من الشعب الى بيفكر فى اللى هيشترى العربية لما يجى يبيعها هياخدها بكام
شعب باصص لما يبيع يبيع بكام مش مهم هيركب ايه
و طالما انت كده كده مش ناوى تبيع غير بعد 10 سنين يبقى توكل على الله فى السوبارو لو شوفتها و عجبتك
الكورولا طبعا
والله انا زعلت لما لقيت الكورلا تقفيل تركي مش عشان اردوغان :) ... لأ عشان عن تجربة مش هجيب عربية غير لما تكون تقفيل بلدها حتي لو ايه كل الكلام عن مثلا ال BMW بتتقفل في مصر كله هيبقول الجودة والمعايير بتاعت البي ام هي هي .. وده كلام مش مظبوط نظرا لأن بعض مكونات السيارة بتبقي من بلد المصنع ... وتاريخ الكورولا في حكاية التقفيل خارج اليابان سئ .. لو تقفيل اوروبي اقولك ممكن زي اليارس تقفيل فرنسي .. بس تركي لأ .....
نيجي للعربية ك:
-نعومة واداء وسحب الكورولا احسن ... الاسترا سحبها ضعيف حتي الموتور التربو .. صوتها عالي ....الفتيس بينتش في السرعات في بعض الاحيان...
- الاسترا كشكل وثبات احسن بكتير بس ده مش معناه ان الكورولا سيئة لا الكورولا ثباتها برده كويس احنا مبنمشيش علي 180 طول الوقت ...
- عموما الاسترا عربية انا مش بحبها عشان هيا مش ناعمة وسلسة مقارنة بمثلتها الالماني .... الكورولا سلة وناعمة ولكن لا تقارن برده بمثلتها الياباني ...
رأي ممكن تجيب :
- سوبارو (قطع غيار وصيانة غالية جدا) عربية مفهاش غلطة. بس اعادة البيع
- فورد فوكس .. الماني 100% .. صيانة وقطع غيار كويسة وفيها كل الاوبشن ... برده ااعاده البيع...
-اوكتافيا الجديدة اعتقد ...
- الجيتا نفس الكلام بالنسبة للاوكتافيا بس مش عارف هيا تقفيل ايه اعتقد بارازيلي
- موتسوبيشي لانسر الشارك برده مش وحشة ...
-تيوتا اوريس .. ياباني 100% .. بس هاتش باك...
- ممكن تستاني التيدا 2014 ممكن بيقي فيها كلام تاني ....
- ابعد عن النيسان خالص الا لو هتجيب JUKE او Qashaquai .... الجوك تقفيل ياباني عربية جميلة ... القشاقاي تقفيل انجليزي وبرده جميلة بس الاثنين فقراء جدا في الاوبشن....
- واخيرا وليس اخر ... شيفروليه كروز ...... العريبة جميلة جدا .. كل حاجة فيها كويسة وجميلة... بس التوكيل اخ من الاخ منصور واولاده :) ... لازم المشكلة تحصل قدام عنيهم عشان يسدأ ان العربية فيها حاجة لو ده حصل مش بيتأخر ... مش بيكشف علي المشاكل الي بتقول عليه ... لو عايز كل حاجة تتحل .. الحل السري .... زعق جامد واعمل خناقة ... هتتحل وهيتعملك دسكونت كمان :)...
انا طولت عليك انا عارف واتمني اني مكنش حيرت حضرتك عشان انا نفسي احترت :)
توكل علي الله .. وصلي استخارة ... اعمل تست دريف .... واهات اللللللللللل
سوبارو
وربنا يوفق حضرتك للاختيار .. اه يست .. اياك ثم اياك والصني :) قديم جديد ... ان شله حتي لو عملوها hybird .... طول ماهيا تقفيل مصري ابعد عن المصري وغنيله ... وبلاش تشجع الصناعة المصرية كفاية احنا شجعناها :) .. مع الاحترام للتوكيل (السبع واوتو ايجيبت افضل توكيلان في مصر)....
شكرا
مش قصدى احيرك بس الفلوانس الجديدة جامعه بين الموتور اليابانى والامان والاوبشن الاوروبى فمن رأيى انك تبص عليها بردة
انا من عشاق الكورولا وركبت انواعها كلها على مدار ١٥ سنه
ولكن فى الاخر جبت الاسترا
لو هنقارن العربيتين ببعض يبقى هنظلم الكورولا لسبب انها لسه متباعتش
الكورولا قدامها على الاقل سنه عشان نكتشف مالها وماعليها وبالتالى اللى هيشتريها هيشترى اسم فقط لانها ممكن جدا تبقى مقلب زى الحنوب افريقى (اتمنى عكس ذلك) وممكن جدا ترجع سمعتها بعد مافقدتها الى حد ما من بعد ٢٠٠٧
الاسترا عربيه ملوكى تقيله وراسيه على الارض وانا عامل تقرير مفصل عنها بكل مزاياها وعيوبها اللى كتير منها اتغير بعد التجربه والاستعمال.
تعليق اخير على العربيه الوهميه سوبارو امبريزا انها عربيه تحفه ولكن معجبنيش خامات الابواب والتابلوه لانها بلاستيك
بالتوفيق ان شاء الله فى الاختيار
انا من عشاق الكورولا وركبت انواعها كلها على مدار ١٥ سنه
ولكن فى الاخر جبت الاسترا
لو هنقارن العربيتين ببعض يبقى هنظلم الكورولا لسبب انها لسه متباعتش
الكورولا قدامها على الاقل سنه عشان نكتشف مالها وماعليها وبالتالى اللى هيشتريها هيشترى اسم فقط لانها ممكن جدا تبقى مقلب زى الحنوب افريقى (اتمنى عكس ذلك) وممكن جدا ترجع سمعتها بعد مافقدتها الى حد ما من بعد ٢٠٠٧
الاسترا عربيه ملوكى تقيله وراسيه على الارض وانا عامل تقرير مفصل عنها بكل مزاياها وعيوبها اللى كتير منها اتغير بعد التجربه والاستعمال.http://www.nilemotors.net/Nile/356327-a.html
بالنسبه للتوكيل فهو حتى الان ناس فاهمه ومحترمه جدا.
تعليق اخير على العربيه الوهميه سوبارو امبريزا انها عربيه تحفه ولكن معجبنيش خامات الابواب والتابلوه لانها بلاستيك
بالتوفيق ان شاء الله فى الاختيار
انا بشكركم جميعا علي الردود و النصائح و انا نويت انزل اشوف الفلوانس و الامبريزا قبل ما اقرر لاني لسه مش قادر اخد قرار اكون واثق من انه الافضل !
أنا واقع في نفس الحيرة و محتاج حد ينصحني.... رغم أني ميال أكثر للكورولا بس بحس من شكلها الخارجي إنها صغيرة رغم وسعها الكبير من الداخل....
كمان بحس برضة من شكلها إن صاجها ضعيف...... الكﻻم ده من الشكل فقط بدون فحص حقيقي
علي العكس.... الأسترا تحس إنها كبيرة و صاجها قوي....بس برضة ده إحساس من الشكل الخارجي فقط
أنا ميال للكورولا خصوصا بعد التغيير الشامل فيها و إضافة أوبشن كتيرة جدا عليها و تغيير شكلها القديم اللي زهق الناس..... و في النهاية هي عربية تويوتا
برجاء النصيحة
على فكرة ده كان نفس انطباعي عن الامبريزا لما قعدت فيها...حسيت برخص في الخامات الداخلية غير متوافق مع سعرها ...خصوصا زراير الزجاج الكهربائي و مفتاح التحكم في المرايات الكهربائية... بالاضافة للشعور العام بكثرة البلاستيك حواليك...و نفس الكلام ينطبق على الxvاقتباس:
المشاركة الأصلية كتبت بواسطة mezo73
سؤال سريع.....هو ليه كل الأعضاء ما عدا عضو واحد فقط مسقطين الرينو فلوانس من حسابتهم لما بيجوا يتكلموا عن الأوروبي .....يا جماعة العربية دى Best Value For Money من وجهه نظرى الشخصية
العربية قاعدة العجلات بتاعتها طويلة و ده بيخليها فى فئة ال D segment مش ال C segment يعنى مش compact sedan
التوكيل و بعد تعامل لمدة فوق السبع سنين و مقارنة بباقى التوكيلات فى مصر يعتبر من أفضلهم
العربية خاماتها من جوه وهميه
شنطة الأوسع فى فئتها ٥٣٠ لتر
أوبشنز ملهاش حل أو مثيل.....أنا هتكلم على الهاى لاين اللى ب١٨٨ألف اللى أنا حاجزها
موتور ١١٥ حصان -فتيس ناعم جداً Xtronic CVT
Keyless entry-keyless start-keyles lock
أربعة زجاج كهرباء one touch-anti pinch مع مكن رفع
٦ أيرباجز
مساند رأس من الجيل الحديث أربع أتجاهات
led and daylight
زينون مع بخاخات
حساس مطر و ضوء
Rear Parking sensor
Follow me home light
فتحة سقف مع ميل و غلق من الريموت
جنوط ١٦
أرتفاع ١٦ سم عن الأرض
من أنعم السيارات و العفشات على الطرق المصرية
كاسيت من ٨ سماعات 3D من تصميم Arkamys
Bluetooth - Telephone-Media streaming
فرش جلد أسود كامل مع فتيس و طارة من الجلد
Cruise control
Speed limiter
طارة Multi function
أنوار فى العتب
٣ ستائر زجاج خلفى
عدادات Digital
ده اللى فاكره من الكماليات دلوقتى....
أنا شايف العربية دى ملهاش حل و أحسن أختيار لسيارة أوروبى أقل من ٢٠٠ ألف جنيه
و بالتوفيق لكل الأعضاء.....