معليش أنا أسف : بس أيه هيا تكاليف ومصاريف { المووت} !

**Y a r i s** · 31-08-2013 10:24 AM

معليش أنا أسف : بس أيه هيا تكاليف ومصاريف
حالات الوفاة !

بكرر اعتذاري كمان مره ... بس عارفين من باب الفضول و يعني يبقى الواحد عارف لاقدر الله لا قدر الله لو حصل عندوا حالت وفاة يبقى عارف هيدفع كام علشان يبقى الواحد عامل حسابوا وعامل احتياطاتوا ... وميتعرضش للاستغلال ... يعني الكفن تمنو كام وهل في نوع معين موصى بيه !! والمغسل بياخود كام ... سيارة نقل الموتى هل. هيا مجانية ولا بفلوس .
بعدين تكاليف. اقامة صوان وتكاليف المقرء ... والتربي كمان المفروض تديلوا قد ايه !

بكرر ... انا اسف كمان مره على فتح الموضوع ده وتعكير مزاجكم الي كده كده اساساً متعكر
لكن الهدف ان الي مش عارف يعرف ... والناس تتعلم. ومنهم انا طبعاً ... والي عارف. وفاهم ياريت يفهمنا او مر بمثل هذه التجربة المريرة ( كفانا وكفاكم الله شر فاجعة الموت ) ياريت يحكلنا عمل ايه ودفع ايه واتصرف ازاي. ... وشكراً وجزاكم الله كل خير ... واطال الله في عمركم ... ورحم الله موتانا وموت المسلمين .

@@@@@@@@
وتحياتي

**Ahmed A Rahman** · 31-08-2013 11:11 AM

ايوه كله الا الاستغلال

ما هو مببقاش ميت وكمان يفضل ينضحك عليا زي ما كنت عايش هههههههههههه

تصدق انا كمان نفسي اعرف التفاصيل دي

**Y a r i s** · 31-08-2013 12:20 PM

المشاركة الأصلية كتبت بواسطة ahmed a rahman

ايوه كله الا الاستغلال

ما هو مببقاش ميت وكمان يفضل ينضحك عليا زي ما كنت عايش هههههههههههه

تصدق انا كمان نفسي اعرف التفاصيل دي

ههههه. حبيب قلبي دكتور احمد باشا
لا ياباشا في ناس مبترحمش لا حي ولا ميت ... وبيعتبروها سببووبة ... ده انتا لو عاوز تستغرب بجد اخطف رجليك على ترب ٦ اكتوبر واتفرج على الهبل الي بجد ... يقلك عاوز مدفن بحري ولا قبلي ... عاوزوا على شارع عمومي ولا عاوزوا على ناصية ولا على المفارق ولا في حته محدوفة جوه وكل شيء بسعروا حتت ارض كان الجهاز بيبعها. ب ٤٠٠٠ جنية فجئة بقدرت قادر وصلت ل ٣٠٠٠٠ الف جنية واربعين وخمسه واربعين الف كمان .

الا صحيح يا احمد باشا متعرفش ايه الخدمات الي بتقدمها جمعية الحصري وايه هيا اسعارهم ! .... وتحياتي :)

**shaddadfalcon1** · 31-08-2013 12:41 PM

بصراحه معرفش اي حاجه من الحاجات دي بس عشان احنا عندنا مدافن بتاعة العيله فمش بنقلق بالحاجات دي واحنا الشباب اللي بنروج نفتح المقبره وبندفن الميت بنفسنا بحضو الغفير وبيتراضي بعد كده

الكفن اهو حته قماش وخلاص معتقدش انه يبقي غالي

الغسل اي حد يعرف احكام الغسل بيغسل وساعات انا بشارك فيه

المقرء والحاجات دي اعتقد بدع ومفيش منها فايده غير الفلوس اللي بتترمي علي الأرض

**Y a r i s** · 31-08-2013 01:10 PM

طيب ياشداد بااشا وعربية التكريم خدت كام ... وايجار الخشبه كام
بجد الف تحيه. وشكر. للناس الي بيبقوا حولين الواحد والي بيحاسبوا في صمت. ... ودي بجد احلى عادة في المصريين الجدعان ... بس كمان برضوا ( إيراف ). يعني في ميت إيرفتوا حلوة. تلاقي كل اموروا سالكة والدنيا رايقه وزي الفل ... وواحد تاني يقرفك ويطلع عينك. بس علشان لسه هتجيبلوا تصريح وتيجي تحجزلوا دار مناسبات علشان العزى متلقيش دار مناسبات فاضية ... تطر تفرشلوا صوان في الشارع وفرشة ويادوبك لسه المقرأ هيقرى ايتين. تبص تلاقي حد من الجيران مبلغ عنك انك عامل ازعاج سبحان الله ... اللهم احسن ختامنا يارب العالميين . وسبحان الله واحد تلاقي موكب وامة لا اله الا الله. رايحين يمشوا واره في تشيعوا والتاني. هما يادوبك عربية عربيتين بالعدد علشان كده دايماً بقول وبنصح كل الشباب (( خلي الناس تحبك ))) حب الناس غاية لا تدرك ... وتحياتي وفي انتظار معلومات اكثر عن الموضوع .

لاني اتوقع الاسعار اتغيرت وتحياتي .

**Y a r i s** · 31-08-2013 01:16 PM

المشاركة الأصلية كتبت بواسطة jam

مبدئيآ.. إحنا اللى بنغسل موتانا فى العيلة.. وبالنسبة لللكفن .. إبنى لما توفى كانت أول تجربة إنى أشترى الكفن بنفسى.. فا الكفن كان متر لإنه كان طفل صغير.. وكان فى حدود 20 جنيه.. يعنى بالنسبة للرجل البالغ هيكون فى حدود 3 متر يعنى ب 60 جنيه.. وبالنسبة للدفن.. برضه انا اللى دفنته بنفسى.. ربنا مايكتبها على حد... بس الراجل اللى بيدفن فى العادة ملهوش قيمة محددة... فيه اللى بيديله 40 وفيه اللى بيديله 50 و60... وفى ناس شفتها بتدفع 150... هوا مابيطلبش حاجة.. اللى فيه النصيب بياخده

بالنسبة لعربية نقل الموتى .. أنا معرفش بصراحة.. بس ساعات بشوف عربيات بتبقة وقف لله تعالى وبتكون مجانيه

أتمنى الدعاء إن إبنى يكون سبب لينا فى دخول الجنة وإن ربنا يعوضنا العوض الصالح

لا اله الا الله
ربنا يصبرك يافندم ويجعل مثواه الجنة قادر ياكريم وباذن الله فهو ملاك من ملائكة الجنة ... ربنا يرحموا قادر يا كريم. والصبر هو اجر وثواب باذن الله تعال. واشكرك على افادتنا بالمعلومات جزاك الله كل خير .

**Y a r i s** · 31-08-2013 01:24 PM

اهاااا
طيب هو مسجد الحميدية الشزلية في المهندسين بكام حجز دار مناسبات العزاء عندو
وعمر مكرم محدش يعرف القاعه الي هناك بكام برضوا يكون عندنا فكرة عن الاسعار الحالية هل القاعة دي من امو ٢٠٠٠ او ٣٠٠٠ ولا اغلى بكتيررر